ភាពយន្តចិន រឿង «ទេវតាការពារ» ចំណាយ ១,៥លានដុល្លារ ចាប់ផ្ដើមថតនៅកម្ពុជា
- 2019-03-25 04:33:07
- ចំនួនមតិ 0 | ចំនួនចែករំលែក 0
ភាពយន្តចិន រឿង «ទេវតាការពារ» ចំណាយ ១,៥លានដុល្លារ ចាប់ផ្ដើមថតនៅកម្ពុជា
ចន្លោះមិនឃើញ
ខ្សែភាពយន្តចិន រឿង «ទេវតាការពារ» បានចាប់ផ្តើមថតជាផ្លូវការនៅប្រទេសកម្ពុជា កាលពីថ្ងៃទី២៥ ខែមីនា ឆ្នាំ២០១៩។ រឿងនេះនឹងចំណាយថវិកាប្រមាណ ១,៥ លានដុល្លារអាមេរិក និងថតនៅរាជធានីភ្នំពេញ និងខេត្តសៀមរាប។ នេះជារឿងដំបូងតំណាងឱ្យ «ឆ្នាំវប្បធម៌ទេសចរណ៍រវាងកម្ពុជា និងចិន» និងជាគំនិតផ្តួចផ្តើមផ្លូវមួយខ្សែក្រវាត់មួយ។
សាច់រឿង «ទេវតាការពារ» បង្ហាញពីទិដ្ឋភាពនៅក្នុងសង្គមចំពោះបញ្ហារឿងជួញដូរកុមារ ដោយរួមបញ្ចូលទាំងការប្រយុទ្ធក្បាច់គុនកុងហ៊្វូរបស់ចិន និងល្បុក្កតោរបស់ខ្មែរ បង្ហាញពីមនោសញ្ចេតនារបស់ឪពុក ភាពយុត្តិធម៌ និងភាពអង់អាចក្លាហានជាច្រើន ដែលឆ្លុះបញ្ចាំងឱ្យមហាជនគ្រប់រូបយកចិត្តទុកដាក់ និងចូលរួមរួមគ្នាបង្ក្រាបក្រុមជនទុច្ចរិតជួញដូរកុមារតូចៗផងដែរ។
ខ្សែភាពយន្តរឿង «ទេវតាការពារ» ជាស្នាដៃនិពន្ធ របស់អ្នកនិពន្ធចិនដ៏ល្បីឈ្មោះ លោក កាវ យែន ដែលទទួលបានប្រជាប្រិយភាពខ្លាំង និងធ្លាប់ទទួលបានពានរង្វាន់និពន្ធឆ្នើមក្នុងការនិពន្ធរឿង Wolf Warrior2 និង Sky Hunter ជាដើម។
ក្នុងការថតខ្សែភាពយន្តរឿង «ទេវតាការពារ» នេះដែរ ក៏មានការចូលរួមសហការដោយក្រុមហ៊ុនល្បីៗ ដូចជាក្រុមហ៊ុន ZHONGSHI SHANGYIN International Culture Media Co., Ltd, WEENANT PICTURE, THINK & DO Culture Development Co., Ltd និង UNICORN INTERNATIONAL UNITED Media Co., Ltd និងមានការចូលរួមពីអ្នកផលិតខ្សែភាពយន្តរហូតដល់៧ប្រទេស និងមានតួរសម្តែងមកពីបណ្តាប្រទេសផ្សេងៗគ្នា រហូតដល់៩ប្រទេស ក្រោមការដឹកនាំសម្តែងដោយលោក Jimmy Henderson ដែលជាអ្នកដឹកនាំថតប្លង់ជួយសង្គ្រោះនៅក្រៅប្រទេស។
នៅក្នុងរឿងនេះដែរក៏មានការចូលរួមពីតារាសម្តែងល្បីៗជាច្រើនរូបដូចជា លោក GU SHANG WEI តារាសម្តែងរង្វាន់មេដាយមាស លោក AN ZHI JIE តារាសម្តែងក្បាច់គុនហុងកុងជើងចាស់ លោក ZENG ZHI WEI និងលោក LI ZI XIONG រួមទាំងមានតារាសម្តែងជនជាតិខ្មែរ និងតារាសម្តែងជាច្រើនរូបផ្សេងទៀតផងដែរ។
នៅក្នុងពិធីសម្ពោធដំណើរការថតខ្សែភាពយន្តរឿង «ទេវតាការពារ» នៅល្ងាចថ្ងៃទី២៣ ខែមីនា ឆ្នាំ២០១៩ នៅសណ្ឋាគារហ័ងសាន រាជធានីភ្នំពេញ លោក សោម សុគន្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ បានថ្លែងថា លោកពិតជាមានសេចក្តីសោមនស្សរីករាយ ដែលបានភាគីចិនមកដាក់ទុនវិនិយោគមកលើវិស័យភាពយន្តនៅប្រទេសកម្ពុជា និងបានមើលឃើញពីទេសភាព ស្ថានភាព សម្បត្តិវប្បធម៌ និងបេតិកភណ្ឌ ដ៏សម្បូរបែប ដែលមាននៅក្នុងប្រទេសកម្ពុជា រហូតដល់បានជ្រើសរើសជាទីកន្លែងថតខ្សែភាពយន្តដ៏ធំមួយ ។
លោកបានលើកឡើងថា នេះជាលទ្ធផល និងជាចំណងមិត្តភាពដ៏យូរអង្វែងរបស់ប្រទេសចិន និងប្រទេសកម្ពុជា ដែលធ្វើយ៉ាងណាឱ្យនយោយបាយផ្លូវមួយ ខ្សែក្រវាត់មួយ របស់លោកប្រមុខរាជរដ្ឋាភិបាលចិន បានសម្រេច និងបានជោគជ័យផងដែរ។
លោករដ្ឋលេខាធិការបានបន្តទៀតថា នៅគ្រប់បណ្តាប្រទេសទាំងអស់តែងតែយល់ថាភាពយន្តជាឧបករណ៍ដើម្បីទាក់ទាញផលប្រយោជន៍ខាងវប្បធម៌ និងនយោបាយ ដូចនេះថ្នាក់ដឹកនាំប្រទេសទាំងអស់ តែងតែយកចិត្តទុកដាក់ និងជួយឧបត្ថម្ភ ដល់ឧស្សាហកម្មនៃបណ្តាប្រទេសរបស់ខ្លួនឱ្យមានភាពរុងរឿង។ ចំពោះប្រទេសកម្ពុជារាជរដ្ឋាភិបាលតែងតែបានជំរុញ និងចាត់ទុកផលិតករភាពយន្ត ជាកម្លាំងចលករក្នុងការអភិវឌ្ឍវិស័យភាពយន្តផងដែរដូចនេះដើម្បីឱ្យរីកចំរើននៅក្នុងវិស័យភាពយន្តបាន ក្រសួងវប្បធម៍ក៏បានខិតខំធ្វើយ៉ាងណាឱ្យវិស័យភាពយន្តនេះ មានការរីកចំរើនផងដែរ។
លោក ប៉ុក បូរក្ស ប្រធាននាយកដ្ឋានភាពយន្តនៃក្រសួងវប្បធម៌និងវិចិត្រសិល្បៈបានឱ្យដឹងដែរថា ការផលិតភាពយន្តដើម្បីឈានទៅរកការអភិវឌ្ឍបាន គឺយើងត្រូវមានការសហការគ្នាក្នុងការផលិតរឿង ហើយការផលិតនេះមិនត្រឹមតែសហការគ្នាតែក្នុងបច្ចេកទេសនោះទេ គឺត្រូវមានទាំងតារាសម្តែងលាយឡំគ្នាថែមទៀតផង ដើម្បីអាចឈានទៅដល់ទីផ្សារអន្តរជាតិបាន ហើយចំពោះភាពយន្តរឿង «ទេវតាការពារ» ហើយមានសិល្បករជាច្រើនប្រទេសចូលរួមថតរឿងនេះ ដែលនេះវាពិតជាផ្តល់ប្រយោជន៍ច្រើនដល់ប្រទេសកម្ពុជាផងដែរ។
លោក ជីមមី ហេនឌឺសុន អ្នកដឹកនាំរឿង «ទេវតាការពារ» បានឱ្យដឹងថា៖រឿងនេះ នឹងចំណាយ ១លានដុល្លារកន្លះ ដើម្បីផលិត។ ទីតាំងថត នៅក្នុងរាជធានីភ្នំពេញ និងខេត្តសៀមរាប និងចំណាយពេលថតរយៈពេលជាង១ខែ។ រឿងនេះគ្រោងនឹងចាក់បញ្ចាំងនៅកម្ពុជា និងទីផ្សារអន្តរជាតិជាពិសេសទីផ្សារចិន។ សូមជម្រាបថា លោក ជីមមី ធ្លាប់បានដឹកនាំរឿង Jail Break ដែលថតនៅស្រុកខ្មែរ និងចាក់បញ្ចាំងនៅប្រទេសអាមេរិក ថៃ កូរ៉េ និងប្រទេសមួយចំនួនទៀត៕