សម្តេច ហ៊ុន សែន លើកឡើងពីបញ្ហាកង្វល់ទៅកាន់ប្រធានអង្គការ IFAD
- 2019-07-26 06:36:43
- ចំនួនមតិ 0 | ចំនួនចែករំលែក 0
សម្តេច ហ៊ុន សែន លើកឡើងពីបញ្ហាកង្វល់ទៅកាន់ប្រធានអង្គការ IFAD
ចន្លោះមិនឃើញ
ក្នុងជំនួបជាមួយលោក Gilbert Houngbo ប្រធានអង្គការ IFAD នាព្រឹកថ្ងៃទី២៦ ខែកក្កដា ឆ្នាំ២០១៩ សម្តេចនាយករដ្ឋមន្រ្តី ហ៊ុន សែន បានលើកឡើងអំពីបញ្ហាកង្វល់២ចំណុចលើវិស័យកសិកម្ម គឺទី១ ផលិតកម្ម និងទី២ បរិមាណនៃការនាំចេញដែលសំដៅលើទីផ្សារតែម្តង។
សម្តេចបានថ្លែងថា ចំពោះគម្រោងនៃការនាំអង្ករចេញកន្លងទៅនេះគឺមានចំនួន ១លានតោន។ ប៉ុន្តែកម្ពុជាធ្វើមិនបានទទួលជោគជ័យទេ គឺជោគជ័យបានតែ ៥០% ប៉ុណ្ណោះ ។ ពិតណាស់ ចំពោះការផលិតស្រូវគឺមានការកើនឡើងតាមគោលដៅមែន ប៉ុន្តែការនាំចេញ គឺពុំទាន់បានទទួលជោគជ័យនៅឡើយ។ ក្នុងន័យនេះ កត្តាមិនជោគជ័យ គឺមូលហេតុមកពី ទី១ បណ្ដាប្រទេសនៅក្នុងតំបន់អាស៊ាន គឺមានផលិតស្រូវអង្ករដើម្បីនាំចេញដូចគ្នាដែរ និងទី២ ការផលិតរបស់កម្ពុជាគឺនៅមានតម្លៃខ្ពស់នៅឡើយ។
ទន្ទឹមនឹងនេះ សម្តេចតេជោ បានស្នើសុំឲ្យអង្គការ IFAD ជួយពិនិត្យមើល និងចែករំលែកនូវបទពិសោធន៍ដែលមាន និងការស្រាវជ្រាវ ដើម្បីជួយដល់កម្ពុជា។ ការបារម្ភដទៃទៀត រួមមានការកើនឡើងរបស់ប្រជាជនកម្ពុជា ដែលតម្រូវការលើទំហំដីសម្រាប់ធ្វើកសិកម្មកាន់តែច្រើនឡើង។ ក្នុងន័យនេះ សម្តេចបានជម្រាបជូនគណៈប្រតិភូថា កម្ពុជាកំពុងតែធ្វើយ៉ាងណាឲ្យប្រជាកសិករ ធ្វើការដាំដុះនៅលើទីតាំងដីដែលសមស្របនឹងដំណាំកសិកម្មនីមួយៗដែលអាចទទួលបានផលច្រើន និងជំរុញការអនុវត្តប្រពលវប្បកម្មនោះសោត គឺជំរុញការដាំដុះដើម្បីឲ្យបានទទួលផលច្រើននៅលើផ្ទៃដីដែលមានស្រាប់ ដោយពុំចាំបាច់ធ្វើការពង្រីកផ្ទៃដីឡើយ។
ប្រមុខរាជរដ្ឋាភិបាល ក៏បានលើកឡើងអំពីការកង្វល់របស់កម្ពុជាលើបញ្ហាបម្រែបម្រួលអាកាសធាតុ ដែលតម្រូវឲ្យមានការសិក្សាស្រាវជ្រាវដើម្បីធ្វើយ៉ាងណា ឲ្យមានពូជដែលអាចបន្សាំទៅនឹងការប្រែប្រួលអាកាសធាតុបាន ព្រោះតំបន់មួយចំនួននៅកម្ពុជា គឺមានកម្តៅឡើងជាង ៤២អង្សារហើយ ដែលអាចបំផ្លាញដំណាំស្រូវបាន។
ក្នុងជំនួបនេះ លោក Gilbert Houngbo បានបញ្ជាក់ថា លោកធ្លាប់បានមកប្រទេសកម្ពុជាកាលពីប៉ុន្មានឆ្នាំមុន ប៉ុន្តែពេលនេះ គឺបានឃើញកម្ពុជាមានការរីកចម្រើនខុសគ្នាប្លែកខ្លាំងមែនទែន ដែលធ្វើឱ្យលោកមានចំណាប់អារម្មណ៍ និងគោរពនូវវីរភាពដឹកនាំរបស់សម្តេច។
ក្នុងឱកាសនេះដែរ លោក Gilbert បានគោរពស្នើសុំសម្ដេចតេជោ ដើម្បីស្វែងយល់អំពីស្ថានភាពនៃវិស័យកសិកម្មនៅកម្ពុជា ព្រោះស្អែកនេះលោកនឹងអញ្ជើញទៅខេត្តកណ្ដាល ដើម្បីពិនិត្យមើលស្ថានភាពកសិកម្មនៅទីនោះ៕
អត្ថបទ និងរូបថត៖ ហ្វេសប៊ុកសម្តេច ហ៊ុន សែន