ក្រសួងធនធានទឹក ប្រាប់ពីការកើនឡើងកម្ពស់ទឹកទន្លេមេគង្គចាប់ពីថ្ងៃនេះ

2019-08-21 06:45:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងធនធានទឹក និងឧតុនិយម បានប្រាប់ពីការកើនកម្ពស់ទឹកទន្លេមេគង្គ ដែលបណ្ដាលមកពី ប្រព័ន្ធសម្ពាធទាប (ITCZ) បានកើតឡើងកាលពីថ្ងៃទី ២០ សីហា កន្លងមក និងកំពុងអូសកាត់លើអាងទន្លេមេគង្គ ចាប់ពីប្រទេសវៀតណាម ដល់ប្រទេសមីយ៉ាន់ម៉ា។ ប្រព័ន្ធសម្ពាធទាបនេះ នឹងបន្តមានឥទ្ធិពលមកលើប្រទេសឡាវ ថៃ និងកម្ពុជាផងដែរ ពិសេសតំបន់ខ្ពង់រាបភាគឦសាន តំបន់រង់ទឺកភ្លៀងនៃទន្លេសេកុង សេសាន និងទន្លេស្រែពក ដោយបង្កឲ្យមានភ្លៀងធ្លាក់ជាប់គ្នាក្នុងកម្រិតពីមធ្យមទៅខ្លាំង ចាប់ពីថ្ងៃទី ២១ សីហា នេះទៅ។

ការធ្លាក់ភ្លៀងនេះ នឹងធ្វើឲ្យទឹកទន្លេមេគង្គកើនឡើងជាបន្តបន្ទាប់ មាន៖

ស្ថានីយជលសាស្ត្រស្ទឹងត្រែង ទឹកអាចកើនដល់កម្ពស់ ៨,៥០ ទៅទាបជាងកម្រិតកម្ពស់ត្រូវប្រុងប្រយ័ត្ន (កម្ពស់ប្រុងប្រយ័ត្ន ១០,៧០ ម៉ែត្រ)។
ស្ថានីយជលសាស្ត្រក្រចេះ ទឹកអាចកើនដល់កម្ពស់ ១៨,៥០ ទៅទាបជាងកម្រិតកម្ពស់ត្រូវប្រុងប្រយ័ត្ន (កម្ពស់ប្រុងប្រយ័ត្ន ២២,០០ ម៉ែត្រ)។
ស្ថានីយជលសាស្ត្រកំពង់ចាម ទឹកអាចកើនដល់កម្ពស់ ១០,០០ ទៅទាបជាងកម្រិតកម្ពស់ត្រូវប្រុងប្រយ័ត្ន (កម្ពស់ប្រុងប្រយ័ត្ន ១៥,២០ ម៉ែត្រ)។
រីឯទន្លេមេគង្គក្រោម ទន្លេសាប ទន្លេបាសាក់ ទឹកបន្តកើនឡើងជាបន្តបន្ទាប់។

ការកើនឡើងទឹកទន្លេនេះ អាចចាត់ចូលជាការហក់ឡើងអតិបរមាលើកទី ១។ ជាទូទៅទឹកទន្លេមេគង្គ តែងហក់ឡើង ២ដង់ក្នុងមួយឆ្នាំ ដែលហៅថា អតិបរមាលើកទី ១ និងអតិបរមាលើកទី ២។

ដូចនេះសូមក្រសួង ស្ថាប័ន អាជ្ញាធរ ដែនដីពាក់ព័ន្ធ ពិសេសប្រជាកសិករដែលរស់នៅអមតាមដងទន្លេទាំងអស់រួសរាន់ប្រមូលកសិផល និងបង្កើនការប្រុងប្រយ័ត្ន ដើម្បីចៀសវាងគ្រោះថ្នាក់ផ្សេងៗ៕

អត្ថបទ៖ ម៉េងងី