នៅកូរ៉េ ពេលមានករណីជំងឺកូវីដ១៩ថ្មី ពលរដ្ឋនឹងទទួលបានដំណឹងតាមទូរសព្ទភ្លាមៗ

2020-04-13 01:15:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ដើម្បីទប់ទល់នឹងជំងឺកូវីដ១៩ រដ្ឋាភិបាលកូរ៉េខាងត្បូងបានរិះរកដំណោះស្រាយជាច្រើនដែលមានដូចជាបង្កើនចំនួនធ្វើតេស្តឲ្យបានច្រើនតាមដែលអាចធ្វើទៅបានក្នុងមួយថ្ងៃ និងបង្កើតប្រព័ន្ធផ្ដល់ដំណឹងដល់ពលរដ្ឋអំពីករណីជំងឺកូវីដ១៩ថ្មីជាដើម។

កូរ៉េខាងត្បូងជាអ្នកចាប់ផ្ដើមមុនគេក្នុងការប្រើប្រាស់វិធីសាស្ត្រចាប់ទីតាំងរបស់ពលរដ្ឋតាមរយៈទូរសព្ទរបស់ពួកគេ ដើម្បីបង្កើតជាកម្មវិធីផែនទីមួយសម្រាប់កូវីដ១៩។ ពលរដ្ឋនឹងទទួលបានសារជាដំណឹង នៅពេលឆ្ពោះទៅដល់ទីតាំងណាមួយដែលមានអ្នកឆ្លងកូវីដ១៩បានទៅដល់។ រដ្ឋាភិបាលកូរ៉េក៏នឹងផ្ញើសារជាបន្តបន្ទាប់ដល់ពលរដ្ឋ នៅពេលមានករណីឆ្លងថ្មី ដោយមានប្រាប់អំពីទីកន្លែងដែលអ្នកឆ្លងថ្មីបានទៅដល់ និងអ្នកដែលគេធ្លាប់មានទំនាក់ទំនងជាមួយទៀតផង។

កម្មវិធីផែនទីរបស់កូរ៉េគឺមានផ្ដល់ព័ត៌មានជាក់លាក់តែម្ដង ដូចជាការផ្ញើសារប្រាប់ថា "អ្នកផ្ទុកកូវីដ១៩ម្នាក់ បានមានវត្តមាននៅហាងខារ៉ាអូខេ Magic Coin នៅ Jayang-dong នៅពាក់កណ្ដាលយប់នាថ្ងៃទី ២០ ខែកុម្ភៈ" និង "មានស្ត្រីវ័យខ្ទង់ ៦០ ឆ្នាំម្នាក់បានតេស្តវិជ្ជមានកូវដី១៩។ ចុចលើតំណភ្ជាប់នេះដើម្បីមើលនូវទីតាំងដែលស្ត្រីរូបនេះធ្លាប់ទៅដល់ មុនត្រូវបញ្ជូនទៅមន្ទីរពេទ្យ” ជាដើម។

ក្រៅពីការរួមចំណែករបស់រដ្ឋាភិបាល អ្នកបង្កើតកម្មវិធីមួយចំនួន ក៏បានចូលរួមក្នុងការទប់ស្កាត់ជំងឺកូវីដ១៩ ដោយបានបង្កើតកម្មវិធី ដែលអាចឲ្យអ្នកប្រើប្រាស់ដឹងព័ត៌មានអំពីវីរុសកូរ៉ូណា និងទីតាំងដែលកើតមានវីរុសនេះ។

ជាក់ស្ដែងដូចជាកម្មវិធី Corona 100m បានដាក់ដំណើរការនៅថ្ងៃទី ១១ ខែកុម្ភៈ ហើយមកទល់ពេលនេះមានចំនួនទាញយកដល់ជាង ១ លានដង។ នេះបើតាមការចុះផ្សាយរបស់ CNN Business។

កម្មវិធីនេះប្រមូលទិន្នន័យពីរដ្ឋបាលសាធារណៈ រួមមានមជ្ឈមណ្ឌលគ្រប់គ្រងជម្ងឺឆ្លងរបស់កូរ៉េ ដើម្បីបង្ហាញអំពីកាលបរិច្ឆេទដែលអ្នកជំងឺម្នាក់ឆ្លងវីរុសកូរ៉ូណា រួមជាមួយសញ្ជាតិ អាយុ ភេទ និងទីកន្លែងដែលគេបានទៅដល់ផងដែរ។

ប្រសិនបើអ្នកប្រើប្រាស់កម្មវិធីនេះស្ថិតនៅចម្ងាយ ១០០ ម៉ែត្រ ពីទីកន្លែងដែលមានមនុស្សឆ្លងវីរុសកូរ៉ូណាបានទៅដល់នោះ គេនឹងទទួលបានការឲ្យដំណឹង (Notification) ព្រមានតែម្ដង ដែលដូចជាឈ្មោះរបស់កម្មវិធីនេះអ៊ីចឹង។

អ្នកបង្កើតកម្មវិធីនេះដែលមានឈ្មោះ Bae Won-Seok និយាយថាកម្មវិធីនេះបន្តរីកធំ ដោយរៀងរាល់មួយម៉ោងមានការទាញយក ២ ម៉ឺនដង ហើយពេលខ្លះគាំងដោយសារមានចំនួនទាញយកច្រើនពេក៕

ប្រភព៖ vnexpress ប្រែសម្រួល៖ សុខហេង