ឈ្មោះកីឡដ្ឋានចំណាស់ ៦៣ ឆ្នាំនេះនឹងផ្លាស់ថ្មី បើរកបានអ្នកឧបត្ថម្ភ

2020-04-22 07:14:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

វិបសាយផ្លូវការក្លឹប FC Barcelona បានចេញផ្សាយនូវដំណឹង ប្រកាសស្វែងរកអ្នកឧបត្ថម្ភឈ្មោះកីឡដ្ឋាន ចាប់ពីរដូវកាល ២០២០-២០២១ តទៅ (រយៈពេលតែ ១ ឆ្នាំប៉ុណ្ណោះ)។

Camp Nou ផ្នែកខាងក្នុង /រូបថត Alejandro García/EPA

ដូចនេះ ប្រសិនបើរកបានក្រុមហ៊ុន ឬអ្នកឧបត្ថម្ភ ប្រាកដមែននោះ **Camp Nou** ដែលជាឈ្មោះកីឡដ្ឋានវ័យចំណាស់ជាង ៦៣ ឆ្នាំមួយនេះអាចនឹងផ្លាស់ថ្មី ឬមានពាក្យភ្ជាប់នៅខាងក្រោមដូចដែលក្លឹបដទៃទៀតបានធ្វើរួចហើយ។ ជាក់ស្ដែងក្លឹបមួយនៅអាល្លឺម៉ង VfB Stuttgart ក៏បានដាក់ឈ្មោះកីឡដ្ឋានខ្លួនយោងទៅតាមម្ចាស់ឧបត្ថម្ភគឺ **Mercedes-Benz Arena ។**

ប្រការនេះ គឺជាលើកដំបូងបំផុត ដែលថ្នាក់ដឹកនាំសម្រេចធ្វើបែបនេះ(ដាក់លក់ឈ្មោះ) ចាប់តាំងពីកីឡដ្ឋានសាងសង់រួចរាល់នៅឆ្នាំ ១៩៥៧ គឺប្រើតែឈ្មោះ Camp Nou តែមួយប៉ុណ្ណោះមិនដែលប្ដូរឡើយ។

ចំពោះគោលបំណងនៃការស្វែងរកអ្នកឧបត្ថម្ភ គឺដើម្បីយកប្រាក់ទៅវិនិយោគលើគម្រោងសង់កីឡដ្ឋានថ្មី មួយចំណែកទៀតបរិច្ចាគដល់អង្គការសប្បុរសធម៍នានា និងជួយដល់ការប្រយុទ្ធប្រឆាំងវីរុសកូវីដ ១៩ ព្រមទាំងការផ្គង់ផ្គង់នានាក្នុងគ្រានេះ។

រំឮកផងដែរថា ក្លឹបដែលមានរហស្សនាម អ្នកមានបុណ្យ រកចំណូលបានក្នុងមួយឆ្នាំជាង ១ ប៊ីលានដុល្លារអាមេរិក ដែលជាចំនូលខ្ពស់បំផុតមួយ ក្នុងចំណោមក្លឹបធំៗលើពិភពលោក។

ក្លឹបមួយនេះ ត្រុូវបានគេដឹងថា តែងតែមានប្រពៃណីសប្បុរស (ប្រភពចំណូលក្លឹប ភាគច្រើនបានមកពីអ្នកគាំទ្រ) ។ កន្លងមក ក្លឹបនេះព្រមព្រៀងជាមួយអង្គការ Unicef ដែលគេឃើញមាននៅលើអាវកីឡាករអំឡុងឆ្នាំ ២០០៦ ដល់ ២០១០ និងបន្តរកបានម្ចាស់ឧបត្ថម្ភថ្មី Qatar Foundation អំឡុងឆ្នាំ ២០១០ និងចាប់ពីឆ្នាំ ២០១៧ មកទល់ពេលនេះ ក៏ទើបតែមានអ្នកឧបត្ថម្ភនៅលើអាវកីឡាករគឺ Rakuten នេះឯង៕

ទទួលបានព័ត៌មានថ្មីៗ លឿនរហ័សទាន់ចិត្ត កុំភ្លេចទាញយក App Kley Kley ឥឡូវនេះ

-Android: play.google.com

-iOS: apps.apple.com/us/app

ប្រភព៖ FC Barcelona ប្រែសម្រួល៖ រក្សា