ទូតថៃ នាំយកថវិកា ២លានបាត ជូនសម្តេច ហ៊ុន សែន
- 2020-05-27 06:29:20
- ចំនួនមតិ 0 | ចំនួនចែករំលែក 0
ទូតថៃ នាំយកថវិកា ២លានបាត ជូនសម្តេច ហ៊ុន សែន
ចន្លោះមិនឃើញ
លោក Panyarak Poolthup ឯកអគ្គរាជទូតថៃប្រចាំកម្ពុជា បាននាំយកថវិកាចំនួន ២លានបាត ប្រគល់ជូនសម្តេច ហ៊ុន សែន ដើម្បីចូលរួមចំណែកទប់ស្កាត់ការប្រយុទ្ធប្រឆាំងជំងឺកូវីដ១៩ នៅកម្ពុជា និងក្នុងឱកាសលើកទី៧០ឆ្នាំ នៃទំនាក់ទំនងការទូតប្រទេសទាំង២។ ការប្រគល់ថវិកានេះ ធ្វើឡើងក្នុងជំនួបមួយនាព្រឹកថ្ងៃទី២៧ ខែឧសភា ឆ្នាំ២០២០។
លោកឯកអគ្គរាជទូតបានបញ្ជាក់ថា វិធានការដែលរាជរដ្ឋាភិបាលបានដាក់ចេញនេះ គឺមានប្រសិទ្ធភាពខ្ពស់ហើយទប់ស្កាត់មិនឲ្យមានការរាតត្បាតនៅកម្ពុជាទៀតឡើយ។
លោកក៏បានរាយការណ៍ជូនសម្ដេចអំពីសកម្មភាពរបស់ស្ថានទូតថៃប្រចាំកម្ពុជា គឺលោកបានធ្វើការជាមួយនឹងក្រុមហ៊ុនថៃនៅកម្ពុជា ដោយបានធ្វើការណែនាំធ្វើយ៉ាងណាមិនឲ្យក្រុមហ៊ុនទាំងនោះដំឡើងតម្លៃទំនិញនៅកម្ពុជា និងបានធ្វើការជាមួយក្រុមហ៊ុនទាំងនោះ ឲ្យមានការចែករំលែកនូវសម្ភារៈ ដូចជាសម្ភារៈអនាម័យមានម៉ាក់ដើម្បីចូលរួមចំណែកទប់ស្កាត់ការរីករាលដាលជំងឺកូវីដ១៩ នៅកម្ពុជា។
សម្ដេចតេជោ មានប្រសាសន៍ថា វាជាការឆ្លុះបញ្ចាំងនៃការសាមគ្គីភាពរវាងកម្ពុជា នឹងថៃ ក៏ដូចជាប្រជាជនកម្ពុជានិងប្រជាជនថៃផងដែរ សម្ដេចបានវាយតម្លៃខ្ពស់ចំពោះវិធានការដែលរាជរដ្ឋាភិបាលថៃបានដាក់ចេញក្នុងការទប់ស្កាត់ប្រយុទ្ធប្រឆាំងនឹងជំងឺកូវីដ១៩។
សម្ដេច ហ៊ុន សែន មានប្រសាសន៍ថា វិធានការទាំងឡាយដែលដាក់ចេញដោយរាជរដ្ឋាភិបាលថៃ គឺមានភាពប្រាកដនិយម។ ក្នុងន័យនេះសម្ដេចមានប្រសាសន៍ថា ជាសក្ខីភាពប្រជាជនកម្ពុជាបានឆ្លងកាត់ព្រំប្រទល់ថៃមកកម្ពុជាកន្លងមកជាង ៩ម៉ឺននាក់ ហើយអ្នកទាំងនោះគ្មានជនណាម្នាក់ឆ្លង ឬនាំយកជំងឺកូវីដ១៩មកកម្ពុជាឡើយ។ ក្នុងន័យនេះ សម្ដេចតេជោមានប្រសាសន៍ថា នេះជាការឆ្លុះបញ្ចាំងមួយថាប្រទេសថៃមិនមែនជាប្រទេសចម្លងមេរោគកូវីដនោះទេ។
សម្ដេចតេជោក៏បានជម្រាបជូនឯកអគ្គរាជទូតថៃផងដែរថា ថ្មីៗនេះអគ្គរាជទូតកម្ពុជាប្រចាំនៅប្រទេសថៃបានអំពាវនាវនិងធ្វើការជាមួយនឹងប្រជាជនកម្ពុជាដែលកំពុងរស់នៅប្រទេសថៃធ្វើយ៉ាងណាឱ្យអនុវត្តឲ្យខានតែបានតាមគោលការណ៍របស់រាជរដ្ឋាភិបាលថៃដែលបានដាក់ចេញ ដើម្បីទប់ស្កាត់ការរីករាលដាល និងប្រយុទ្ធប្រឆាំងនឹងជំងឺកូវីដ១៩៕
អត្ថបទ និងរូបថត៖ ហ្វេសប៊ុកសម្តេច ហ៊ុន សែន