ក្រសួងស្នើឱ្យប្រជាពលរដ្ឋនៅតាមបណ្តោយផ្លូវជាតិលេខ២ ដែលទទួលសំណងរួចហើយ កុំបង្កការរាំងស្ទះដល់ការសាងសង់

2020-06-24 04:51:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងសាធារណការ និងដឹកជញ្ជូន បានឱ្យដឹងថា ការដោះស្រាយផលប៉ះពាល់ក្នុងគម្រោងធ្វើឱ្យប្រសើរឡើងវិញផ្លូវជាតិលេខ២ សម្រេចបាន ៩៨,៥% និងផ្លូវជាតិលេខ២២ សម្រេចបាន ១០០% ហើយ។

ក្នុងកិច្ចប្រជុំពិភាក្សាស្ដីពីការពិនិត្យ និងតាមដានអំពីដំណើរការដោះស្រាយផលប៉ះពាល់ កាលពីថ្ងៃទី២៣ ខែមិថុនា ឆ្នាំ២០២០ លោក តូច ចាន់កុសល រដ្ឋលេខាធិការប្រចាំការនៃក្រសួងសាធារណការ និងដឹកជញ្ជូន បានស្នើឱ្យប្រជាពលរដ្ឋ ក្រុមហ៊ុន សហគ្រាស និងអាជីវករដែលកំពុងប្រកបរបរនៅតាមបណ្ដោយផ្លូវជាតិទាំងពីរ ជាពិសេសបងប្អូនប្រជាពលរដ្ឋ ដែលទទួលបានសំណងលើផលប៉ះពាល់រួចហើយ សូមអនុវត្តតាមកិច្ចព្រមព្រៀងឱ្យមានប្រសិទ្ធភាពបំផុតដើម្បីកុំឱ្យមានការរាំងស្ទះដល់ការសាងសង់ ក៏ដូចជាការធ្វើដំណើរ និងការប្រកបរបរចិញ្ចឹមជីវិតរបស់បងប្អូនប្រជាពលរដ្ឋផងដែរ។

លោកលើកឡើងក្នុងកិច្ចប្រជុំនេះថា ក្រុមការងារពាក់ព័ន្ធទាំងអស់បាននឹងកំពុងបន្តកិច្ចសហការយ៉ាងជិតស្និទ្ធជាមួយក្រុមហ៊ុនឯកជន សហគ្រាស និងអាជីវករនានាដែលប្រកបរបរលើបណ្ដាញទឹកស្អាត បង្គោលអគ្គិសនី ខ្សែកាបិ៍្ល អុបទិក ជាដើម ដើម្បីរុះរើ និងប្ដូរទៅទីតាំងថ្មី ក្នុងគោលបំណងបង្កភាពងាយស្រួលដល់ក្រុមហ៊ុនសាងសង់អនុវត្តគម្រោងរបស់ខ្លួនប្រកបដោយប្រសិទ្ធភាពបំផុត និងអាចបញ្ចប់គម្រោងតាមការគ្រោងទុក។

ជាមួយគ្នានេះផងដែរ លោករដ្ឋលេខាធិការប្រចាំការបានណែនាំឱ្យក្រុមហ៊ុនសាងសង់ក្រុមហ៊ុនត្រួតពិនិត្យបច្ចេកទេស និងភាគីពាក់ព័ន្ធទាំងអស់ត្រូវយកចិត្តទុកដាក់រៀបចំប្រឡាយបង្ហូរទឹក នៅសងខាងផ្លូវដែលកំពុងសាងសង់ឱ្យបានត្រឹមត្រូវ និងសមស្របតាមគម្រោង ដើម្បីជៀសវាងការជន់លិចលង់ភូមិ និងទ្រព្យសម្បត្តិរបស់បងប្អូនប្រជាពលរដ្ឋ ដោយហេតុថា រដូវភ្លៀងបានមកដល់ហើយ ហើយ ភ្លៀងបានបន្តធ្លាក់ជាបន្តបន្ទាប់ជារៀងរាល់ថ្ងៃនៅតាមតំបន់មួយចំនួនផងដែរ។

លោកបានស្នើឱ្យក្រុមការងារពាក់ព័ន្ធទាំងអស់ ព្រមទាំងអនុគណៈកម្មការទាំងពីរ គឺអនុគណៈកម្មការខេត្តតាកែវ និងខេត្តកណ្ដាល សហការជាមួយភាគីពាក់ព័ន្ធចុះពិនិត្យទីតាំងរងផលប៉ះពាល់នៅតាមបណ្ដោយផ្លូវជាតិទាំងពីរ ដែលពិបាកក្នុងការដោះស្រាយដើម្បីស្វែងរកយន្តការ ដោះស្រាយឱ្យបានលឿនបំផុត សំដៅជៀសវាងការរាំងស្ទះក្នុងការសាងសង់៕

ប្រភព៖ ក្រសួងសាធារណការ និងដឹកជញ្ជូន