អ្នកនាំពាក្យក្រសួងសុខាភិបាល បញ្ជាក់រឿងស្រ្តីកងទ័ពមួកខៀវនៅក្រុងតាខ្មៅ ដែលមានផ្ទុកកូវីដ
- 2020-08-10 06:24:21
- ចំនួនមតិ 0 | ចំនួនចែករំលែក 0
អ្នកនាំពាក្យក្រសួងសុខាភិបាល បញ្ជាក់រឿងស្រ្តីកងទ័ពមួកខៀវនៅក្រុងតាខ្មៅ ដែលមានផ្ទុកកូវីដ
ចន្លោះមិនឃើញ
រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានបញ្ជាក់នៅរសៀលថ្ងៃទី១០ ខែសីហា ឆ្នាំ២០២០នេះថា ស្ត្រីជនជាតិខ្មែរ ដែលជាកងទ័ពមួកខៀវ ដែលមានវីជ្ជមានវីរុសកូវីដ-១៩ រស់នៅក្នុងសង្កាត់សិត្បូ ក្រុងតាខ្មៅ ខេត្តកណ្ដាល បច្ចុប្បន្នត្រូវក្រសួងសុខាភិបាលយកស្ត្រីរូបនេះ ទៅដាក់ឲ្យព្យាបាលនៅមន្ទីរពេទ្យ មិត្តភាព ខ្មែរ-សូវៀតហើយ។ នេះបើតាមការចុះផ្សាយរបស់ ទ.ទ.ក។
លោកស្រីបានបញ្ជាក់ទៀតថា តាមការសាកសួរផ្ទាល់ស្ត្រីដែលមានវីរុសកូវីដ-១៩របស់មន្ត្រីជំនាញសុខាភិបាលបានឲ្យដឹងថា នៅមុនពេលដែលស្ត្រីរូបនេះ មិនទាន់ទៅធ្វើតេស្តរកវីរុសកូវីដ-១៩ ស្ត្រីរូបនេះ គាត់មិនបានដើរទៅទីណាទេ គឺគាត់សម្រាកនៅក្នុងផ្ទះ ដែលមានសមាជិកគ្រួសារចំនួន៤នាក់ផ្សេងទៀត ហើយក្នុងការស្នាក់នៅក្នុងផ្ទះ ស្ត្រីរូបនេះ មិនបានប៉ះពាល់ផ្ទាល់ ឬ ប្រាស្រ័យទាក់ទងជាមួយសមាជិកគ្រួសារទាំង៤នាក់នេះឡើយ។
យ៉ាងណាមិញ បើតាមរបាយការណ៍របស់ចៅសង្កាត់សិត្បូ ផ្ញើទៅកាន់អភិបាលក្រុងតាខ្មៅ នៅថ្ងៃទី១០សីហានេះ បានឱ្យដឹងថា ស្រ្តីផ្ទុកកូវីដ១៩ខាងលើ បានមកដល់ផ្ទះនៅសង្កាត់សិត្បូ នាថ្ងៃទី៣០ ខែកក្កដា ឆ្នាំ២០២០ ហើយពេលមកដល់ផ្ទះ ស្រ្តីរូបនេះបានធ្វើបាយសម្លជូនចាស់ៗ និងចែកប្រាក់ដល់ក្មេងៗ ព្រមទាំងបានធ្វើចង្ហាន់ទៅប្រគេនព្រះសង្ឃនៅវត្តជម្ពព្រឹកថែមទៀត។ បន្ទាប់មក ស្រ្តីរូបនេះមានអាការៈក្តៅខ្លួន ក៏បានឱ្យពេទ្យជិតផ្ទះចាកថ្នាំ និងផ្សំថ្នាំឱ្យ ដោយជំងឺមិនធូរស្រាលសាម៉ីខ្លួន ក៏បានទៅធ្វើតេស្តរកមេរោគកូវីដ១៩ នៅមន្ទីរពេទ្យជ័យជំនះ តែលទ្ធផលអវិជ្ជមានទៀត ពេទ្យក៏ឱ្យសាម៉ីខ្លួនត្រឡប់មកផ្ទះវិញ។ លុះពីថ្ងៃក្រោយមកដោយមានអាការៈក្តៅខ្លួនខ្លាំង និងមានហៀសំបោ ទើបទៅធ្វើតេស្តនៅមន្ទីរពេទ្យជ័យជំនះម្តងទៀត ហើយលទ្ធផលគឺវិជ្ជមាន។
របាយការណ៍បន្ថែមថា បច្ចុប្បន្នប្រជាពលរដ្ឋមានការព្រួយបារម្ភខ្លាំងដោយអ្នកជំងឺបានប៉ះពាល់ជាមួយអ្នកជិតខាងជាច្រើន៕