ពូទីនថា រុស្ស៊ីរៀបចំកម្លាំងរួចជាស្រេច ត្រៀមបញ្ជូនទៅអន្តរាគមន៍នៅបេឡារុស
- 2020-08-28 03:07:03
- ចំនួនមតិ 0 | ចំនួនចែករំលែក 0
ពូទីនថា រុស្ស៊ីរៀបចំកម្លាំងរួចជាស្រេច ត្រៀមបញ្ជូនទៅអន្តរាគមន៍នៅបេឡារុស
ចន្លោះមិនឃើញ
ប្រធានាធិបតីរុស្ស៊ី លោក វ្លាឌីមៀ ពូទីន បានអះអាងថា រុស្ស៊ីបានបង្កើតកម្លាំងប៉ូលិសបម្រុងមួយរួចជាស្រេច ដើម្បីត្រៀមបញ្ជូនទៅធ្វើអន្តរាគមន៍នៅប្រទេសបេឡារុស ក្នុងករណីចាំបាច់ ខណៈដែលប្រទេសនេះកំពុងរាំរ៉ៃដោយការធ្វើមហាបាតុកម្មប្រឆាំងនឹងរដ្ឋាភិបាល ពោលគឺប្រឆាំងនឹងលទ្ធផលបោះឆ្នោត។ លោកថ្លែងដូច្នេះ តាមកញ្ចក់ទូរទស្សន៍រដ្ឋ កាលពីថ្ងៃទី២៧ ខែសីហា ឆ្នាំ២០២០។
លោក ពូទីន បញ្ជាក់ដូច្នេះថា៖ «ប្រធានាធិបតីបេឡារុស Alexander Lukashenko បានស្នើសុំឱ្យខ្ញុំបង្កើតប៉ូលិសបម្រុង១ក្រុម ហើយខ្ញុំបានបង្កើតរួចហើយដែរ។ យើងក៏បានឯកភាពគ្នាដែរថា កម្លាំងប៉ូលិសនេះ នឹងមិនត្រូវបញ្ជូនទៅឡើយ ប្រសិនបើស្ថានការណ៍នៅបេឡារុស អាចបន្តគ្រប់គ្រងបាន»។
លោក ពូទីន លើកឡើងទៀតថា រុស្ស៊ីមានកាតព្វកិច្ចជួយដល់សន្តិសុខប្រទេសបេឡារុស ក្រោមភាពជាដៃគូសម្ព័ន្ធមិត្ត ហើយលោកក៏បានសង្កត់ធ្ងន់ពីចំណងវប្បធម៌ ភាសា ដ៏ស្អិតរមួតរវាងប្រទេសទាំងពីរផងដែរ។
ប្រធានាធិបតីរុស្ស៊ី បញ្ជាក់ថា កម្លាំងអន្តរាគមន៍នេះ នឹងមិនបញ្ជូនទៅបេឡារុសឡើយ ប្រសិនបើក្រុមជ្រុលនិយមក្នុងចំណោមអ្នកធ្វើបាតុកម្មនោះ មិនបានបង្កហិង្សាដូចជាដុតឡាន ឆ្លៀតប្លន់ផ្ទះ ធនាគារ និងកាន់កាប់អគាររដ្ឋាភិបាលទេនោះ៕