ទ័ពចក្រភពម៉ុងហ្គោល ឆ្លងសមុទ្រទៅឈ្លានពានជប៉ុន ២ដង សុទ្ធតែបរាជ័យរាល់លើក (មានវីដេអូ)

2020-09-07 07:22:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ចក្រភពម៉ុងហ្គោល បានវាតទីក្នុងពិភពលោក ចាប់ពីអាស៊ី ដល់អឺរ៉ុបខាងកើត និងរុស្ស៊ី ពីឆ្នាំ១២០៦ ដល់ ១២៩៤។ ក្នុងអាស៊ី មានតែអាស៊ីខាងត្បូង និងអាស៊ីអាគ្នេយ៍ ដែលរួចផុតពីការត្រួតត្រារបស់ម៉ុងហ្គោល ក្រៅពីនោះ ក៏មានជប៉ុនមួយផងដែរ។

ម៉ុងហ្គោល ក្រោមការដឹកនាំរបស់អធិរាជគូប៊ីឡៃខាន់ បានបញ្ជូនទ័ពទៅឈ្លានពាន ជប៉ុន ២ដង នៅក្នុងឆ្នាំ១២៧៤ និង ១២៨១ ប៉ុន្តែសុទ្ធតែមិនបានសម្រេច។ ទ័ពម៉ុងហ្គោលរាប់ម៉ឺននាក់ បានធ្វើដំណើរតាមសំពៅដែលសង់ដោយចិន និងកូរ៉េ (ប្រទេសទាំងពីរ ស្ថិតក្រោមការត្រួតត្រាម៉ុងហ្គោល) ឆ្លងកាត់សមុទ្រសំដៅទៅវាយប្រហារកោះ Kyushu នៃប្រទេសជប៉ុន។

ការឈ្លានពានលើកទីមួយ ក្នុងឆ្នាំ១២៧៤ កងទ័ពម៉ុងហ្គោល ប្រមាណពី ១៦០០០នាក់ ទៅ ៤ម៉ឺននាក់ បានជិះលើសំពៅ ៨០០គ្រឿង ចេញពីកូរ៉េ ទៅវាយប្រហារកោះ ២របស់ជប៉ុន គឺ Tusuhima និង Iki ដោយម៉ុងហ្គោលទទួលបានជោគជ័យ។ គោលដៅបន្ទាប់របស់ទ័ពម៉ុងហ្គោលគឺ Hakata Bay នៃកោះ Kyushu។

ជប៉ុន បានរៀបចំប្រព័ន្ធការពាររួចជាស្រេច បើទោះបីជាមានទ័ពត្រឹម ៥ពាន់នាក់ក៏ដោយ។ យ៉ាងណាមិញ ម៉ុងហ្គោលមិនបានវាយចូលជ្រៅក្នុងទឹកដីជប៉ុនឡើយ នេះក៏ដោយសារតែបញ្ហាខ្វះខាតស្បៀង ដែលជាមូលហេតុដ៏ធំមួយ។ ក្រោយមកមិនបានប៉ុន្មានថ្ងៃ ទ័ពម៉ុងហ្គោលត្រូវបានដកចេញពី Hakata Bay មកកូរ៉េវិញ។

ការចេញទៅឈ្លានពានជប៉ុនលើកទី២ របស់ម៉ុងហ្គោលក្នុងឆ្នាំ ១២៨១ គឺកាន់តែធំជាងមុន បន្ទាប់ពីម៉ុងហ្គោលផ្តួលរំលំរាជវង្សសុងទាំងស្រុង ដោយមានទ័ពប្រមាណ១០ម៉ឺននាក់ ជិះសំពៅប្រមាណ ៤៤០០គ្រឿង។ ទ័ពម៉ុងហ្គោល បានបើកការវាយប្រហារលើកោះ Tsushima និង Hakata Bay ម្តងទៀត ហើយលើកនេះទ័ពជប៉ុនក៏បានពង្រឹងប្រព័ន្ធការពារខ្លាំងជាងមុខផងដែរ។

ម៉ុងហ្គោល ដោយមានទ័ពជំនួយបន្ថែម ៤ម៉ឺននាក់ទៀត បានវាយលុកចូលតំបន់ Takashima។ សមរភូមិនេះ គឺមានការប្រយុទ្ធគ្នាយ៉ាងសាហាវជាទីបំផុតអស់រយៈពេលជាច្រើនសប្តាហ៍។ ឧបសគ្គដ៏ធំបំផុតរបស់ម៉ុងហ្គោលលើកនេះ គឺមានខ្យល់ព្យុះមួយបានកម្ទេចសំពៅម៉ុងហ្គោលប្រមាណ ២ភាគ ៣ ដែលធ្វើឱ្យកងទ័ពជាច្រើនបានស្លាប់។ ពេលនោះ ម៉ុងហ្គោលក៏សម្រេចដកទ័ពចេញវិញ ដោយជប៉ុន ទទួលបានជ័យជម្នះ៕

សូមទស្សនាវីដេអូបន្ថែមខាងក្រោម៖