ប្រទេសនេះ នឹងទទួលបានវ៉ាក់សាំងប្រឆាំងកូវីដទី១ក្នុងលោក ពីរុស្ស៊ី នៅខែវិច្ឆិកាខាងមុខ

2020-09-12 02:03:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនមូលនិធិវិនិយោគផ្ទាល់របស់រុស្ស៊ី ហៅកាត់ថា RDIF បានប្រកាសថា រុស្ស៊ី នឹងផ្គត់ផ្គង់វ៉ាក់សាំងប្រឆាំងវីរុសកូវីដ១៩ Sputnik V ចំនួន ៣២លានដូស ទៅប្រទេសម៉ិចស៊ីកូ ដោយរំពឹងថានឹងអាចបញ្ជូនទៅក្នុងអំឡុងខែវិច្ឆិកា ឆ្នាំ២០២០ខាងមុខ បន្ទាប់ពីទទួលបានការយល់ព្រមពីរដ្ឋាភិបាលម៉ិចស៊ីកូ។

លោក Kirill Dmitriev នាយកប្រតិបត្តិក្រុមហ៊ុនRDIF បានថ្លែងថា នៅក្នុងការស្ទង់មតិថ្មីៗនេះបង្ហាញថា ប្រជាជនម៉ិចស៊ីកូ ប្រមាណ ៦៦% គឺបានជឿទុកចិត្តលើវ៉ាក់សាំង Sputnik V។ ការផ្គត់ផ្គង់នេះ នឹងជួយឱ្យប្រជាជនម៉ិចស៊ីកូ ប្រមាណ២៥% ទទួលបានវ៉ាក់សាំងដែលមានសុវត្ថិភាព និងប្រសិទ្ធភាព។

គួររំលឹកថា វ៉ាក់សាំង Sputnik V ត្រូវបានចុះបញ្ជីអនុញ្ញាតឱ្យប្រើប្រាស់កាលពីថ្ងៃទី១១ ខែសីហា ដែលធ្វើឱ្យវាក្លាយជាវ៉ាក់សាំងប្រឆាំងមេរោគកូវីដ១៩ ទីមួយក្នុងពិភពលោក។ បន្ទាប់មកនៅថ្ងៃទី៧ ខែកញ្ញា រុស្ស៊ី បានប្រកាសបញ្ចេញវ៉ាក់សាំងនេះឱ្យចរាចរជាសាធារណៈ។ ក្រៅពីម៉ិចស៊ីកូ ប្រទេសមួយចំនួនទៀតដែលបានបង្ហាញការចាប់អារម្មណ៍លើវ៉ាក់សាំងនេះ រួមមាន អារ៉ាប់រួម, អារ៉ាប៊ី សាអ៊ូឌីត, ឥណ្ឌូណេស៊ី, ហ្វីលីពីន, ប្រេស៊ីល និងឥណ្ឌាជាដើម។

ក្រុមហ៊ុន RDIF ក៏បានឱ្យដឹងដែរថា ខ្លួនបានចុះកិច្ចព្រមព្រៀងក្នុងការបញ្ជូនវ៉ាក់សាំង Sputnik V ទៅកាន់រដ្ឋ Bahia នៃប្រទេសប្រេស៊ីលផងដែរ ដោយរដ្ឋនេះគ្រោងនឹងទិញវ៉ាក់សាំង ៥០លានដូស។ ជាមួយគ្នានេះ ក្រុមហ៊ុនក៏មានកិច្ចព្រមព្រៀងជាមួយប្រទេសកាហ្សាក់ស្ថាន ដែលគ្រោងទិញវ៉ាក់សាំងនេះ ២លានដូស ហើយក៏គ្រោងនឹងបង្កើនដល់ ៥លានដូសថែមទៀតផង។

ជារួម ក្រុមហ៊ុន RDIF អះអាងថា ប្រជាជនលើពិភពលោកជាង ១ពាន់លាននាក់ នឹងទទួលបានវ៉ាក់សាំង Sputnik V៕

ប្រភព៖ europeanpharmaceuticalreview