ស្លៀកខោអាវដេកយប់អត់បោក២ថ្ងៃជាប់គ្នាប៉ះពាល់អ្វីខ្លះ?

2020-11-25 07:06:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ជាទម្លាប់ទៅហើយសម្រាប់មនុស្សមួយចំនួនដែលឧស្សាហ៍ស្លៀកខោអាវដេកយប់ប៉ុន្មានថ្ងៃជាប់ៗគ្នាដោយមិនបានបោកសម្អាតទាល់តែសោះ។ តើនេះជារឿងល្អដែរឬទេចំពោះសុខភាព? បើតាមអ្នកជំនាញ ទម្លាប់នេះអាចផ្ដល់ជាគុណវិបត្តិចំនួន៧ចំពោះសុខភាព ដូចខាងក្រោម៖

១.បង្កើតបានជាបរិស្ថានគ្មានអនាម័យ

ក្រណាត់ដែលអ្នកស្លៀកម្ដងហើយម្ដងទៀតដោយមិនបានបោកសម្អាត អាចបង្កបង្កើតជាពពួកបាក់តេរី និងកោសិកាស្បែកងាប់ ដែលធ្វើឲ្យកើតមានមេរោគឆ្លងបាន។ មួយវិញទៀត បើទោះជាអ្នកសម្អាតកន្លែងដេកជាញឹកញាប់ក៏ដោយ ក៏មេរោគដែលទុំជាប់នៅលើក្រណាត់ខោអាវនៅតែអាចចម្លងទៅកន្លែងដេកបានដដែល ហើយធ្វើឲ្យបរិស្ថានជុំវិញកង្វក់មិនស្រស់ស្រាយនោះឡើយ។

២. ចម្លងមេរោគទៅសម្លៀកបំពាក់ដទៃទៀត

បើយូរម្ដងៗទើបបោកខោអាវដេក នោះការសម្អាតតែម្ដងនឹងមិនជួយជម្រះចោលនូវមេរោគបាននោះទេ ហើយវាថែមទៀតអាចចម្លងមេរោគទៅកាន់សម្លៀកបំពាក់ដទៃដែលបោកសម្អាតជាមួយផងដែរ។

៣. ប៉ះពាល់ដំណេកយប់

ខោអាវដែលពាក់ដដែលៗនោះអាចបង្កជាការរមាស់ស្បែក ហើយប៉ះពាល់ដល់ដំណេកយប់របស់អ្នកបាន។

៤. ធ្វើឲ្យអ្នកមានបញ្ហាផ្លូវដង្ហើម ឬអាល្លែកហ្ស៊ីកាន់តែធ្ងន់ធ្ងរ

សម្រាប់អ្នកមានបញ្ហាផ្លូវដង្ហើមឬអាល្លែកហ្ស៊ី គួរគប្បីផ្លាស់ប្ដូរ និងបោកសម្អាតខោអាវដេកយប់ឲ្យបានជាប្រចាំ ដើម្បីបញ្ចៀសភាពធ្ងន់ធ្ងរមួយកម្រិតទៀត ដែលបង្កឡើងដោយមេរោគដែលនៅជាប់ក្រណាត់ខោអាវ។

៥. កើតមុន

ញើសដែលហូរជាប់នៅក្រណាត់ខោអាវ ហើយបន្សល់ទុកចោលច្រើនថ្ងៃ អាចបង្កឲ្យអ្នកកើតមានមុននៅលើមុខ និងដងខ្លួនបាន។

៦. ធុំក្លិន

ការធុំក្លិនជារឿងជៀសមិនផុតឡើយសម្រាប់អ្នកស្លៀកខោអាវដដែលៗ។

៧. ធ្វើឲ្យចុះខ្សោយប្រព័ន្ធស៊ាំ

ប្រព័ន្ធស៊ាំនៃរាងកាយអ្នកនឹងប្រឹងធ្វើការទប់ទល់ជាមួយមេរោគទាំងប៉ុន្មានដែលនៅជាប់ខោអាវ ហើយចម្លងទៅលើស្បែក ឬផ្លូវដង្ហើម។ កត្តានេះហើយដែលយូរៗទៅនឹងធ្វើឲ្យប្រព័ន្ធស៊ាំនៃរាងកាយថយចុះបន្តិចម្ដងៗ៕