អ្នកនេសាទ៣នាក់ រៀបរាប់ពីទិដ្ឋភាព ពេលយន្តហោះឥណ្ឌូណេស៊ីធ្លាក់ចូលសមុទ្រម្សិលមិញ

2021-01-10 01:24:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យន្តហោះដឹកអ្នកដំណើររបស់ក្រុមហ៊ុនអាកាសចរណ៍ Sriwijaya Air ដែលដឹកមនុស្ស៦២នាក់ បានធ្លាក់ចូលសមុទ្រជ្វា កាលពីថ្ងៃទី៩ មករា ២០២១ ភ្លាមៗបន្ទាប់ពីហោះចេញពីក្រុងហ្សាកាតា ឆ្ពោះទៅកាន់ក្រុង Pontianak ដែលស្ថិតនៅលើកោះប៊័រណេអូ។

រូបតំណាង

ភ្នាក់ងារស្រាវជ្រាវ និងសង្គ្រោះជាតិឥណ្ឌូណេស៊ី បានសន្និដ្ឋានថា យន្តហោះនេះអាចនឹងធ្លាក់ក្នុងសមុទ្រនៅចន្លោះកោះ Laki និង Lancang ក្នុងតំបន់មួយដែលគេស្គាល់ថា កោះរាប់ពាន់ (Thousand Islands) ស្ថិតនៅប៉ែកពាយព្យនៃក្រុងហ្សាកាតា។

អ្នកនេសាទ៣នាក់ដែលនៅកៀកនឹងហេតុការណ៍ធ្លាក់យន្តហោះនេះ បានប្រាប់ CNN ថា ពួកគេបានលឺសំឡេងផ្ទុះ និងឃើញរលកធំភ្លាមៗ ក្នុងអំឡុងពេលដែលយន្តហោះបានបាត់ខ្លួនកាលពីរសៀលម្សិលមិញ។

អ្នកនេសាទម្នាក់ឈ្មោះ Hendrik Mulyadi បាននិយាយថា «ខ្ញុំបានលឺសំឡេងផ្ទុះយ៉ាងខ្លាំង។ ខ្ញុំគិតថាវាជាគ្រាប់បែកមួយ ឬជាផ្គរលាន់។ ពេលនោះយើងស្រាប់តែឃើញរលកដ៏ធំដែលមានកម្ពស់ប្រហែល ២ម៉ែត្រ មកបុកទូករបស់យើង»។

អ្នកនេសាទម្នាក់ទៀតឈ្មោះ Solihin ក៏លើកឡើងថា វាជាសំឡេងគ្រាប់បែកដែរ។

យ៉ាងណាមិញដោយសារពេលនោះ មេឃងងឹតដោយសារមានភ្លៀងធ្លាក់ ពួកគេមិនបានឃើញយន្តហោះធ្លាក់ចូលសមុទ្រស្តែងៗនោះទេ ប៉ុន្តែធំក្លិនសាំង និងឃើញបំណែក។ បន្ទាប់មកពួកគេត្រឡប់មកឆ្នេរវិញ ដើម្បីរាយការណ៍ទៅប៉ូលិស។

សូមជម្រាបថា ជើងហោះហើរលេខ១៨២ដែលបានធ្លាក់នេះ គឺផ្ទុកអ្នកដំណើរ៥០នាក់ (ក្នុងនោះកូនក្មេង៧នាក់) រួមទាំងពីឡុត និងអ្នកបម្រើការលើយន្តហោះ ១២នាក់ សរុប ៦២នាក់។ នេះបើតាមក្រសួងដឹកជញ្ជូនឥណ្ឌូណេស៊ី។

បើតាមការចុះផ្សាយរបស់ Flightradar24 ឱ្យដឹងថា ៤នាទីក្រោយយន្តហោះនេះហោះចេញ គឺមានភ្លៀងធ្លាក់យ៉ាងខ្លាំង ធ្វើឱ្យវាបាត់រយៈកម្ពស់ ១ម៉ឺនហ្វីត ក្នុងរយៈពេលមិនដល់៦០វិនាទីឡើយ៕