ការបូមប្រេងរបស់ក្រុមហ៊ុន Kris Energy នៅកម្ពុជា ទទួលបានផលទាបជាងការរំពឹងទុក
- 2021-04-02 08:53:55
- ចំនួនមតិ 0 | ចំនួនចែករំលែក 0
ការបូមប្រេងរបស់ក្រុមហ៊ុន Kris Energy នៅកម្ពុជា ទទួលបានផលទាបជាងការរំពឹងទុក
ចន្លោះមិនឃើញ
ការបូមប្រេងនៅតំបន់ប្លុកA របស់ក្រុមហ៊ុន Kris Energy គឺទទួលបានបរិមាណទាបជាងការរំពឹងទុក ពោលគឺមិនគ្រប់ចំនួននៃផែនការ ៧៥០០បារ៉ែលក្នុងមួយថ្ងៃឡើយ ដែលនឹងអាចប៉ះពាល់ដល់លំហូរសាច់ប្រាក់វិនិយោគ។ នេះបើយោងតាមសេចក្តីប្រកាសព័ត៌មានរបស់ក្រុមហ៊ុន Kris Energy កាលពីចុងខែមីនាកន្លងទៅ។
គិតត្រឹមថ្ងៃទី៣០មីនា ២០២១ អត្រាផលិតកម្មសរុបនៅតំបន់ប្លុកA គឺទទួលបានតែ ២៤៩៣បារ៉ែលក្នុងមួយថ្ងៃតែប៉ុណ្ណោះ។ បើគិតជាមធ្យមវិញ ពីថ្ងៃទី២៣កុម្ភៈ ដល់ ៣០មីនា ២០២១ គឺបូមបានតែ ២៨៨៣បារ៉ែលក្នុងមួយថ្ងៃ។
ថ្ងៃដែលទទួលបានបរិមាណខ្ពស់បំផុត គឺមានចំនួន ៣៥៣៤បារ៉ែល ដែលបូមបាននៅថ្ងៃទី២៧ មីនា ២០២១។
ក្រុមហ៊ុនបានកត់សម្គាល់ថា កត្តាដែលមិនអាចសម្រេចនូវបរិមាណប្រេង ៧៥០០បារ៉ែលក្នុងមួយថ្ងៃនោះ គឺទំនងអាចមកពីអណ្តូងប្រេង មានកម្រិតប្រេងទាបជាងការរំពឹងទុក។ ក្រុមហ៊ុននឹងពិនិត្យមើលទិន្នន័យទាំងអស់សាជាថ្មី និងដាក់ផែនការឡើងវិញ។
សូមរំលឹកថា កាលពីថ្ងៃទី២៩ ខែធ្នូ ឆ្នាំ២០២១ កម្ពុជាបានទទួលតំណក់ប្រេងជាលើកដំបូងក្នុងដែនសមុទ្ររបស់ខ្លួន ដែលមានក្រុមហ៊ុន Kris Energy ជាប្រតិបត្តិករ។ តំណក់ប្រេងលើកដំបូងនេះ ចាប់ផ្តើមផលិតចេញពីអណ្តូងប្រេងទី១ ឈ្មោះ A-0ID នៃ ផ្លាតហ្វម A។ ក្រៅពីនេះ ក៏មានអណ្តូងប្រេង៤ទៀត ដែលក្រុមហ៊ុននឹងបូម ជាបន្តបន្ទាប់ក្នុងឆ្នាំ២០២១នេះ។
សម្តេចនាយករដ្ឋមន្រ្តី ហ៊ុន សែន ធ្លាប់បានលើកឡើងកាលពីខែកុម្ភៈថា តាមការប៉ាន់ប្រមាណ កម្ពុជានឹងទទួលបានក្នុងមួយថ្ងៃ ក្នុងបរិមាណពី ៧ពាន់ ទៅ ៧៥០០បារ៉ែលតែប៉ុណ្ណោះ គឺជាទំហំតូចណាស់ និងមិនទាន់ជះឥទ្ធិពលលើផ្នែកសេដ្ឋកិច្ចទេ ប៉ុន្តែវាជាការចាប់ផ្តើមមួយដ៏ល្អនៃឧស្សាហកម្មប្រេង និងឧស្ម័ននៅកម្ពុជា៕
ប្រភព៖ Oedigital