ព្រះមហាក្សត្រកម្ពុជា ផ្ញើព្រះរាជសាររំលែកទុក្ខដល់ឥណ្ឌូណេស៊ី ដែលរងគ្រោះរញ្ជួយដីយ៉ាងធ្ងន់ធ្ងរ

2018-08-09 10:19:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា បានផ្ញើព្រះរាជសារចូលរួមរំលែកទុក្ខទៅកាន់លោកប្រធានាធិបតីឥណ្ឌូណេស៊ី ចូកូ វីដូដូ បន្ទាប់ពីមនុស្សជាច្រើនរយនាក់បាត់បង់ជីវិត ដោយសារគ្រោះរញ្ជួយដី បានវាយប្រហារកោះ Lombok របស់ប្រទេសនេះ។ នេះបើយោងតាមព្រះរាជសារជាភាសាអង់គ្លេស ត្រូវបានឡាយព្រះហត្ថលេខាកាលពីថ្ងៃទី៧សីហា ហើយដែល [ខ្លីៗ] ទើបទទួលបាននៅថ្ងៃទី៩សីហានេះ។

គ្រឿងចក្រ កាយថ្ម ស្វែងរកជនរងគ្រោះ ដែលអាចជាប់នៅក្រោមបំណែកថ្ម ក្រោយកើតមានរញ្ជួយដី (រូបថត៖ Reuters)

ក្នុងព្រះរាជសារនេះ មានខ្លឹមសារយ៉ាងដូច្នេះថា៖ «**តាំងនាមឱ្យប្រជាជនកម្ពុជា និងខ្លួនខ្ញុំផ្ទាល់ ខ្ញុំសូមចូលរួមរំលែកទុក្ខចំពោះឯកឧត្តម និងតាមរយៈឯកឧត្តម ទៅកាន់ក្រុមគ្រួសារជនរងគ្រោះទាំងអស់ នូវសមានទុក្ខ និងសេចក្តីអាណិតអាសូររបស់យើងខ្ញុំផង**»។

ជាមួយគ្នានេះ ព្រះមហាក្សត្រកម្ពុជា បានប្រោសព្រះរាជទានពរដល់ជនរងគ្រោះ ឱ្យឆាប់ជាសះស្បើយ ហើយក៏បានប្រោសព្រះរាជទានពរឱ្យអាជ្ញាធរឥណ្ឌូណេស៊ី ទទួលបានជោគជ័យក្នុងការជួយសង្គ្រោះដល់ជនរងគ្រោះ នៅតំបន់ដែលទទួលរងការរញ្ជួយដីនេះផងដែរ។

សូមរំលឹកថា កាលពីថ្ងៃអាទិត្យកន្លងទៅ មានគ្រោះរញ្ជួយដីមួយកម្រិត ៦,៩រ៉ិចទ័រ បានវាយប្រហារកោះ Lombok ដែលស្ថិតនៅភាគខាងកើតកោះបាលី ប្រទេសឥណ្ឌូណេស៊ី។ បើតាមទីភ្នាក់ងារសារព័ត៌មានឥណ្ឌូណេស៊ី មកទល់ពេលនេះ មានមនុស្សស្លាប់ជិត ៣៥០នាក់ហើយ និងជាច្រើននាក់ទៀតរងរបួស ខណៈដែលមនុស្សរាប់ពាន់នាក់ទៀតកំពុងគ្មានទីជម្រក៕

អត្ថបទទាក់ទង៖

អត្ថបទ៖ សំភី