ព្រឹត្តិការណ៍នយោបាយជាតិសំខាន់ៗប្រចាំសប្តាហ៍

2018-09-30 08:07:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

[ខ្លីៗ] សូមលើកយកព្រឹត្តិការណ៍នយោបាយក្នុងស្រុកសំខាន់ៗប្រចាំសប្តាហ៍នេះ មកបង្ហាញជូនដូចខាងក្រោមនេះ។

១. សម្តេច ហ៊ុន សែន អញ្ជើញទៅគោរពវិញ្ញាណក្ខន្ធសពលោក ត្រាន់ ដាយក្វាង

កាលពីថ្ងៃទី២៦ ខែកញ្ញា ឆ្នាំ២០១៨ សម្តេចនាយករដ្ឋមន្រ្តី ហ៊ុន សែន បានអញ្ជើញទៅក្រុងហាណូយ ប្រទេសវៀតណាម ដើម្បីគោរពវិញ្ញាណក្ខន្ធសព លោក ត្រាន់ ដាយក្វាង អតីតប្រធានាធិបតីវៀតណាម ដែលបានទទួលមរណភាពកាលពីថ្ងៃទី២១ ខែកញ្ញា។ បន្ទាប់ពីពិធីគោរពវិញ្ញាណក្ខន្ធ សម្ដេច ហ៊ុន សែន ក៏បានជួបសំណេះសំណាលជាមួយថ្នាក់ដឹកនាំវៀតណាម និងក្រុមគ្រួសារ ព្រមទាំងសរសេរនៅលើក្រាំង ចូលរួមរំលែកទុក្ខផងដែរ។

ចុចអានលម្អិត

២. សម្តេច ហ៊ុន សែន អញ្ជើញចូលរួមមហាសន្និបាតអង្គការសហប្រជាជាតិ

សម្តេចនាយករដ្ឋមន្រ្តី ហ៊ុន សែន បានដឹកនាំគណៈប្រតិភូជាន់ខ្ពស់កម្ពុជា ទៅចូលរួមកិច្ចប្រជុំទូទៅលើកទី៧៣ នៃមហាសន្និបាតអង្គការសហប្រជាជាតិ និងកិច្ចប្រជុំពាក់ព័ន្ធផ្សេងទៀត នៅក្រុងញ៊ូវយ៉ក សហរដ្ឋអាមេរិក ពីថ្ងៃទី២៧ ដល់ ៣០កញ្ញា ឆ្នាំ២០១៨។ ក្នុងមហាសន្និបាតនេះ សម្តេចបានឡើងថ្លែងសុន្ទរកថា ដោយផ្តោតលើសមិទ្ធផលសំខាន់ៗដែលរាជរដ្ឋាភិបាលសម្រេចបាន បញ្ហាតំបន់ និងអន្តរជាតិ ដែលជាការព្រួយបារម្ភរួម។

ចុចអានលម្អិត

៣. គ.ជ.ប អំពាវនាវឱ្យប្រជាពលរដ្ឋ ទៅពិនិត្យបញ្ជីឈ្មោះ និងចុះឈ្មោះបោះឆ្នោត

កាលពីថ្ងៃទី២៨ ខែកញ្ញា ឆ្នាំ២០១៨ គណៈកម្មាធិការជាតិរៀបចំការបោះឆ្នោត (គ.ជ.ប) បានអំពាវនាវឱ្យប្រជាពលរដ្ឋ អញ្ជើញទៅពិនិត្យមើលឈ្មោះរបស់ខ្លួន និងទៅចុះឈ្មោះបោះឆ្នោត នៅតាមសាលាឃុំសង្កាត់ ចាប់ពីថ្ងៃទី១ ដល់ ១៨ខែតុលា ឆ្នាំ២០១៨។ ការអំពាវនាវឱ្យទៅពិនិត្យមើលឈ្មោះ គឺដើម្បីឱ្យប្រជាពលរដ្ឋប្រាកដថា ខ្លួនពិតជាមានឈ្មោះ និងទិន្នន័យត្រឹមត្រូវ នៅក្នុងបញ្ជីបោះឆ្នោត។

ចុចអានលម្អិត

៤. លោក ប្រាក់ សុខុន នឹងធ្វើទស្សនកិច្ចនៅតួកគី នៅដើមខែតុលា

ក្រសួងការបរទេសកម្ពុជា បានប្រកាសឱ្យដឹងកាលពីថ្ងៃទី២៨ ខែកញ្ញាថា លោកឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស នឹងអញ្ជើញទៅបំពេញទស្សនកិច្ចផ្លូវការ នៅសាធារណរដ្ឋតួកគី ពីថ្ងៃទី១-៣ ខែតុលា ឆ្នាំ២០១៨។ លោកឧបនាយករដ្ឋមន្រ្តី នឹងជួបប្រជុំផ្លូវការជាមួយលោក ម៉េវលូត សាវូសូគ្លូរ រដ្ឋមន្រ្តីការបរទេសតួកគី ដើម្បីពិភាក្សាអំពីបញ្ហាផ្សេងៗ ដែលជាការព្រួយបារម្ភ និងយកចិត្តទុកដាក់រួម ក្នុងបរិបទនៃកិច្ចសហប្រតិបត្តិការទេ្វភាគី តំបន់ និងអន្តរជាតិ។

ចុចអានលម្អិត

អត្ថបទ៖ សំភី