ព្រឹត្តិការណ៍នយោបាយជាតិសំខាន់ៗ ប្រចាំសប្តាហ៍
- 2018-10-14 09:23:46
- ចំនួនមតិ 0 | ចំនួនចែករំលែក 0
ព្រឹត្តិការណ៍នយោបាយជាតិសំខាន់ៗ ប្រចាំសប្តាហ៍
ចន្លោះមិនឃើញ
[ខ្លី] សូមលើកយកព្រឹត្តិការណ៍នយោបាយក្នុងស្រុកសំខាន់ៗប្រចាំសប្តាហ៍ មកបង្ហាញជូនដូចខាងក្រោមនេះ។
១. សម្តេច ហ៊ុន សែន អញ្ជើញទៅចូលរួមកិច្ចប្រជុំកំពូលមេគង្គ-ជប៉ុន
សម្ដេច ហ៊ុន សែន នាយករដ្ឋមន្រ្តីកម្ពុជា បានដឹកនាំគណៈប្រតិភូជាន់ខ្ពស់ ទៅចូលរួមកិច្ចប្រជុំកំពូល មេគង្គ-ជប៉ុន លើកទី១០ ពីថ្ងៃទី៦ ដល់ ១០ ខែតុលា ឆ្នាំ២០១៨ នៅទីក្រុងតូក្យូ ប្រទេសជប៉ុន។ អំឡុងពេលនោះ សម្ដេច ហ៊ុន សែន បានជួបពិភាក្សាទ្វេភាគីជាមួយលោក ស៊ីនហ្សូ អាបេ នាយករដ្ឋមន្រ្តីជប៉ុន ព្រមទាំងជួបសំណេះសំណាលជាមួយសហគមន៍ និងនិស្សិតកម្ពុជា ដែលកំពុងរស់នៅ និងសិក្សានៅក្នុងប្រទេសជប៉ុនផងដែរ៕
២. កម្ពុជា ហៅការសម្រេចចិត្តរបស់ EU ជុំវិញដំណើរការដកការអនុគ្រោះពន្ធ ជាភាពអយុត្តិធម៌
កាលពីថ្ងៃទី១០ ខែតុលា ឆ្នាំ២០១៨ រាជរដ្ឋាភិបាលកម្ពុជា តាមរយៈសេចក្តីថ្លែងការណ៍របស់ក្រសួងការបរទេស បានសម្តែងនូវការខកចិត្ត និងបានចាត់ទុកការសម្រេចចិត្តរបស់សហភាពអឺរ៉ុប EU ក្នុងការដាក់ចេញនូវដំណើរការដកប្រព័ន្ធអនុគ្រោះពន្ធក្រោមកម្មវិធី "គ្រប់មុខទំនិញលើកលែងសព្វាវុធ (EBA)" ថាជាភាពអយុត្តិធម៌។
៣. ព្រឹទ្ធសភា ជ្រើសរើសបានអនុប្រធានទី១ថ្មី
កាលពីព្រឹកថ្ងៃទី១១ ខែតុលា ឆ្នាំ២០១៨ លោក ស៊ឹម កា ត្រូវបានបោះឆ្នោតជ្រើសរើសជាអនុប្រធានទី១ថ្មី នៃព្រឹទ្ធសភា ជំនួសលោក នៃ ប៉េណា ដែលបានទទួលមរណភាពកាលពីថ្ងៃទី២៩ ខែកញ្ញា ឆ្នាំ២០១៨។ លោក ស៊ឹម កា ទទួលបានសំឡេងគាំទ្រចំនួន ៥៨សំឡេង លើ ៥៨សំឡេង នៃសមាជិកព្រឹទ្ធសភាទាំងមូល។
៤. កម្ពុជា បន្តប្រតិបត្តិការស្វែងរកអដ្ឋិធាតុទាហានអាមេរិកឡើងវិញ
តាមរយៈលិខិតមួយផ្ញើទៅកាន់សមាជិកព្រឹទ្ធសភាអាមេរិក លោក Doug Ericksen និងលោកតំណាងរាស្រ្ត Vincent Buys នៅរដ្ឋវ៉ាស៊ីងតោន កាលពីថ្ងៃទី១២ ខែតុលា ឆ្នាំ២០១៨ សម្តេចនាយករដ្ឋមន្រ្តី ហ៊ុន សែន បានសម្រេចយល់ព្រមបន្តប្រតិបត្តិការឡើងវិញនូវការស្វែងរកអដ្ឋិធាតុឈ្លើយសឹក និងទាហានអាមេរិក ដែលបានបាត់ខ្លួនក្នុងសម័យសង្គ្រាម នៅកម្ពុជា ឡើងវិញក្រោយផ្អាកមួយឆ្នាំ។ ការសម្រេចនេះ ធ្វើឡើងបើទោះបីជាអាមេរិក បានដាក់កម្រិតតឹងតែងទិដ្ឋាការមកលើមន្រ្តីកម្ពុជាក៏ដោយ។