រដ្ឋបាលខេត្តព្រះសីហនុ អាជីវករ លក់ដូរនៅឆ្នេរអូរឈើទាល នឹងមានតូបគំរូថ្មីសម្រាប់ការលក់ដូរ

2019-08-16 04:02:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជីវករ លក់ដូរនៅឆ្នេរអូរឈើទាល នៅខេត្តព្រះសីហនុ នឹងមានតូបគំរូថ្មីសម្រាប់ការលក់ដូរ។ នេះបើតាមការបង្ហោះនៅលើផេក ហ្វេសបុករបស់ រដ្ឋបាលខេត្តព្រះសីហនុ នៅក្នុងកិច្ចប្រជុំបង្ហាញប្លង់តូបគំរូថ្មីដល់អាជីវករកាលពីថ្ងៃទី ១៥ ខែសីហា ឆ្នាំ២០១៩ ។

ឆ្នេរអូរឈឺទាល នៅខេត្តព្រះសីហនុ

លោក គួច ចំរើន អភិបាលខេត្តព្រះសីហនុបានជួបប្រជុំជាលើកទី២ ជាមួយបងប្អូនអាជីវករលក់ដូរនៅឆ្នេរអូរឈើទាលចំនួន ៤៤តូប ស្ថិតក្នុងសង្កាត់លេខ៤ ក្រុង ខេត្តព្រះសីហនុ ដើម្បីដាក់បង្ហាញប្លង់សាងសង់តូបគំរូថ្មី របស់គណៈកម្មការឆ្នេរកម្ពុជា។

តាមការបង្ហាញរបស់មន្ត្រីមន្ទីររៀបចំដែនដីនគរូបនីយកម្ម និងសំណង់ ខេត្តព្រះសីហនុ បានបញ្ជាក់ថា តាមប្លង់សាងសង់តូបគំរូថ្មីនៅឆ្នេរអូរឈើទាលមាន ២ប្រភេទ គឺតូបទោល និងតូបភ្លោះ ដែលគណកម្មការបានចុះវាស់កំណត់។

លោក គួច ចំរើន បានសំណេះសំណាលជាមួយអាជីវករលក់ដូរនៅឆ្នេរអូរឈើទាលថា តាមការឯកភាពរបស់គណកម្មការឆ្នេរ បានរៀបចំគំរូប្លង់តូប ដើម្បីឱ្យបងប្អូនយកទៅសាងសង់តាមគំរូថ្មីមានរចនាបទ សោភ័ណភាពក្នុងការទាក់ទាញភ្ញៀវ ហើយមន្ត្រីជំនាញនៅរង់ចាំជួយសម្របសម្រួលដើម្បីឱ្យការសាងសង់ប្រព្រឹត្តទៅដោយរលូន។

លោក ក៏បានបន្តថា បងប្អូនត្រូវជម្រុញការសាងសង់ឱ្យបានលឿន ដើម្បីត្រៀមរៀបចំទទួលភ្ញៀវទេសចរជាតិ និងអន្តរជាតិ នៅថ្ងៃបុណ្យឆ្លងឆ្នាំសកល នឹងធ្វើឲ្យតំបន់ឆ្នេរអូរឈើទាល ក្លាយជាតំបន់ទេសចរណ៍ដ៏ទាក់ទាញជាងគេ ក្នុងចំណោមតំបន់ឆ្នេរផ្សេងៗទៀតក្នុងក្រុងព្រះសីហនុ ៕

ចុចអាន៖

អត្ថបទ៖ ម៉េងងី