លោក ហ៊ុន ម៉ាណែត ស្នើឲ្យសិង្ហបុរីបន្តផ្ដល់ការគាំទ្រលើវិស័យយោធាកម្ពុជា

2020-01-22 02:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងទ័ពជើងគោក បានថែ្លងអំណរគុណចំពោះកងទ័ពសិង្ហបុរី ដែលបានជួយបណ្តុះបណ្ដាលនាយទាហានវ័យក្មេងកម្ពុជា និងបានសំណូមពរឱ្យសិង្ហបុរីបន្តផ្ដល់ការគាំទ្របន្ថែមទៀតលើវិស័យហ្វឹកហ្វឺនបណ្តុះបណ្តាលធនធានមនុស្ស ក្នុងជួរកងយោធពលខេមរភូមិន្ទ។ កាលលើកឡើងនេះ ធ្វើឡើងក្នុងជំជួបពិភាក្សាការងារជាមួយលោកឧត្តមសេនីយ៍ទោ ហ្គូ ស៊ីហ៊ូ (GOH SI HOU) មេបញ្ជាការកងទ័ពជើងគោកសិង្ហបុរី កាលថ្ងៃទី២០ ខែមករា ឆ្នាំ២០២០ នៅទីបញ្ជាការកងទ័ពជើងគោក។

ចំណែកមេបញ្ជាការកងទ័ពជើងគោកសិង្ហបុរី បានថ្លែងអំណរគុណចំពោះបដិសណ្ឋារកិច្ចស្វាគមន៍ដ៏កក់ក្តៅ និងបានបង្ហាញភាពរីករាយចំពោះការបានទៅទស្សនាប្រាង្គប្រាសាទនានានៅក្នុងខេត្តសៀមរាប ព្រមទាំងបានកត់សម្គាល់អំពីការរីកចម្រើនដ៏ឆាប់រហ័សនៃរាជធានីភ្នំពេញ ក្នុងបរិយាកាសប្រកបដោយសុខសន្តិភាព។

មេបញ្ជាការកងទ័ពជើងគោកសិង្ហបុរីបានបញ្ជាក់ថា ដំណើរទស្សនកិច្ចផ្លូវការលើកទី១ របស់មេបញ្ជាការកងទ័ពជើងគោកកម្ពុជា កាលពីពេលកន្លងទៅថ្មីៗនេះ និងដំណើរទស្សនកិច្ចផ្លូវការលើកទី១ របស់លោកនាពេលនេះ គឺជាសញ្ញាវិជ្ជមានមួយដ៏ល្អ សម្រាប់ពង្រឹងកិច្ចសហប្រតិបត្តិការ នៃកងទ័ពរបស់ប្រទេសទាំងពីរ ដោយនឹងបន្តជំរុញអនុវត្តការងារដែលបានពិភាក្សា និងឯកភាពព្រមព្រៀងគ្នាកន្លងមកឱ្យទទួលបានលទ្ធផលល្អប្រសើរ៕

អត្ថបទ៖ កុសល