ថៃ៖ គ្រាន់តែកែវស្រាមួយធ្វើឱ្យអ្នកឆ្លងកូរ៉ូណា ដល់ ១១នាក់ ក្នុងពិធីជប់លៀង

2020-03-12 04:28:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ជនជាតិថៃ ១១នាក់ ត្រូវបានរកឃើញថាឆ្លងវីរុសកូរ៉ូណាថ្មី COVID-19 បន្ទាប់ពួកគេបានហុចកែវស្រាមួយ និងបារី ឱ្យតៗគ្នា ក្នុងពិធីជប់លៀងមួយ កាលពីពេលថ្មីៗនេះ។ នេះបើតាមការប្រកាសរបស់ក្រសួងសុខភាពសាធារណៈថៃ នៅថ្ងៃទី១២ ខែមីនា ឆ្នាំ២០២០។

ប្រជាជនថៃ ពាក់ម៉ាសការពារវីរុសកូរ៉ូណា (រូបថត៖ Bangkok Post)

អ្នកជំងឺខាងលើ ស្ថិតក្នុងចំណោមមនុស្ស១៥នាក់ ដែលបានប្រមូលផ្តុំជប់លៀង ដោយក្នុងនោះមានជនជាតិចិនម្នាក់ មកពីហុងកុងផងដែរ។

យ៉ាងណាមិញ ក្រសួងមិនទាន់អាចបញ្ជាក់បានទេថា ជនជាតិចិននោះ មានផ្ទុក COVID-19 ឬអត់ទេ ព្រោះតែគាត់បានវិលត្រឡប់ទៅហុងកុងវិញទៅហើយ ម្យ៉ាងក្នុងពិធីជប់លៀងនោះ គាត់ក៏គ្មានចេញរោគសញ្ញាអ្វីដែលគួរឱ្យកត់សម្គាល់ឡើយ។

ដូច្នេះ គិតមកត្រឹមថ្ងៃទី១២ ខែមីនា ឆ្នាំ២០២០នេះ ថៃមានករណីឆ្លង COVID-19 ដល់ ៧០នាក់ហើយ ក្នុងនោះ ត្រូវបានព្យាបាលជាសះស្បើយចំនួន ៣៤នាក់៕

ប្រភព៖ Khaosod English ប្រែសម្រួល៖ សំភី