ច្បាប់ស្តីពីចរាចរណ៍ផ្លូវគោក នឹងត្រូវកែសម្រួលពាក្យពេចន៍ អត្ថន័យ ចៀសវាងបកស្រាយខុស
- 2020-05-13 01:44:23
- ចំនួនមតិ 0 | ចំនួនចែករំលែក 0
ច្បាប់ស្តីពីចរាចរណ៍ផ្លូវគោក នឹងត្រូវកែសម្រួលពាក្យពេចន៍ អត្ថន័យ ចៀសវាងបកស្រាយខុស
ចន្លោះមិនឃើញ
កាលពីថ្ងៃទី១២ ខែឧសភា ឆ្នាំ២០២០ នៅទីស្ដីការក្រសួង លោក តូច ចាន់កុសល រដ្ឋលេខាធិការប្រចាំការ នៃក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំវិសោធនកម្មច្បាប់ស្ដីពីចរាចរណ៍ផ្លូវគោក ដោយមានការចូលរួមពីថ្នាក់ដឹកនាំ និងមន្ត្រីជំនាញពាក់ព័ន្ធផងដែរ។
កិច្ចប្រជុំនេះធ្វើឡើង ដើម្បីកែសម្រួលពាក្យពេចន៍ ឃ្លាឃ្លោង ខ្លឹមសារ និងការកំណត់និយមន័យពាក្យគន្លឹះឱ្យមានន័យកាន់តែច្បាស់លាស់ ជាក់លាក់ទៅតាមបរិបទច្បាប់នេះ សំដៅការការពារផលប្រយោជន៍បងប្អូនប្រជាពលរដ្ឋ និងបរិស្ថានជារួម ព្រមទាំងងាយស្រួលអនុវត្ត និងជៀសវាងការបកស្រាយខុស។
លោករដ្ឋលេខាធិការប្រចាំការបានមានប្រសាសន៍ថា ការកែសម្រួលពាក្យពេចន៍ ឃ្លាឃ្លោង អត្ថន័យ និងការកំណត់និយមន័យនៃច្បាប់នេះ គឺនឹងបន្តពិភាក្សាម្ដងមួយជំពូកៗរហូតដល់ចប់ ដើម្បីដាក់ឆ្លងស្ថាប័នពាក់ព័ន្ធទាំងអស់ធ្វើការពិនិត្យកែសម្រួល មុននឹងប្រកាសឱ្យប្រើប្រាស់ជាផ្លូវការដោយព្រះរាជក្រម។
លោកបានឱ្យដឹងផងដែរថា កិច្ចប្រជុំនេះបានកែសម្រួលពាក្យពេចន៍ ឃ្លាឃ្លោងជាច្រើនក្នុងនោះរួមមានពាក្យដូចជារថយន្តទេសចរណ៍ទៅជារថយន្តគ្រួសារជាដើម។
លោករដ្ឋលេខាធិការបានថ្លែងអំណរគុណយ៉ាងជ្រាលជ្រៅចំពោះអង្គប្រជុំ ដែលបានចូលរួមយ៉ាងផុលផុសក្នុងការផ្ដល់មតិយោបល់ប្រកបដោយខ្លឹមសារ និងដែលបានផ្តល់ធាតុចូលសំខាន់ៗក្នុងកែសម្រួលច្បាប់នេះឱ្យកាន់តែមានន័យច្បាស់លាស់ និងជៀសវាងការបកស្រាយខុស និងអាចបម្រើឱ្យប្រយោជន៍ជាតិ៕
អត្ថបទ និងរូបថត៖ ក្រសួងសាធារណការ និងដឹកជញ្ជូន