ដឹងអត់ថា កម្ពុជា កំពុងសម្រុកសាងសង់ផ្លូវ ៤គន្លងចេញពីភ្នំពេញទៅបណ្តាខេត្តទាំងនេះ

2020-05-19 07:16:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងរយៈពេលមួយឆ្នាំ ឬពីរឆ្នាំមកនេះ កម្ពុជាកំពុងសម្រុកសាងសង់ពង្រីកផ្លូវជាតិសំខាន់ៗក្នុងនោះ ផ្លូវជាតិលេខ៣, ផ្លូវជាតិលេខ៥ និងផ្លូវល្បឿនលឿន ដែលមានផ្លូវដល់ ៤គន្លង។

ផ្លូវជាតិលេខ៣

គិតត្រឹមខែមេសា ឆ្នាំ២០២០ ការសាងសង់ពង្រីកផ្លូវជាតិលេខ៣ បានសម្រេច ៦៧ភាគរយហើយ ដោយតាមផែនការគ្រោងទុក នឹងបញ្ចប់នៅក្នុងឆ្នាំ២០២២។ ការពង្រីកផ្លូវនេះគឺត្រូវបានបែងចែកជា ២កំណាត់ គឺពីចោមចៅ-បែកគូស និងបែកគូស-ក្រុងកំពត។ ផ្លូវពីចោមចៅ ទៅបែកគូស ក្នុងខេត្តតាកែវ ប្រវែង ៦៤,៩០គីឡូម៉ែត្រ នឹងត្រូវពង្រីក ២គន្លងទៅ ៤គន្លង (២ទៅ ២មក) និងមានសួនកណ្តាល។ ចំណែកកំណាត់ផ្លូវពីបែកគូស ទៅក្រុងកំពត ប្រវែងជាង ៦៤គីឡូម៉ែត្រ នឹងត្រូវពង្រីកតួផ្លូវដល់ ១២ម៉ែត្រ ដោយមាន ២គន្លងផ្លូវដដែល (១ទៅ ១មក)។

ផ្លូវជាតិលេខ៥

គិតត្រឹមខែមេសា ឆ្នាំ២០២០ គម្រោងធ្វើឱ្យប្រសើរឡើងផ្លូវជាតិលេខ៥ (ផ្លូវអាស៊ានហាយវេលេខ១) ភាគខាងជើង (បាត់ដំបង-សិរីសោភ័ណ) សម្រេចបាន ៨០,០២%, ភាគកណ្ដាល (ធ្លាម្អម ខេត្តពោធិ៍សាត់-ក្រុងបាត់ដំបង និងពីក្រុងសិរីសោភ័ណ-ប៉ោយប៉ែត) សម្រេចបាន ១៤,៩០% និងភាគខាងត្បូង (ពីស្ពានព្រែកក្តាម-ធ្លាម្អម) សម្រេចបាន ២៣,៩០%។ ផ្លូវនេះ ត្រូវបានពង្រីកជា៤គន្លង ប្រវែងសរុប ៣៦៦គីឡូម៉ែត្រ។

ផ្លូវល្បឿនលឿន ភ្នំពេញ-ព្រះសីហនុ

គិតត្រឹមខែមេសា ឆ្នាំ២០២០ គម្រោងសាងសង់ផ្លូវល្បឿនលឿន(Expressway ) ភ្នំពេញ-ព្រះសីហនុ ប្រវែងជាង ១៩០ គីឡូម៉ែត្រ សម្រេចបាន ២០,៦៥% ហើយ ដោយគ្រោងបញ្ចប់នៅចុងឆ្នាំ២០២២។ ផ្លូវនេះមានទទឹងតួសរុប ២៤,៥ម៉ែត្រ ក្រាលបេតុងកៅស៊ូ (AC) កម្រាស់ ១០សង់ទីម៉ែត្រ ចែកជា ៤គន្លង (២គន្លងទៅ ២គន្លងមក) ហើយគន្លងនីមួយៗមានទទឹង ៣,៧៥ម៉ែត្រ ដែលអនុញ្ញាតឱ្យយានយន្តគ្រប់ប្រភេទអាចបើកបរក្នុងល្បឿនរហូតដល់ ១០០គ.ម ទៅ ១២០គ.ម ក្នុងមួយម៉ោង។ ផ្លូវនេះតភ្ជាប់ពីភូមិទី១ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិទី១ សង្កាត់លេខ៣ ក្រុងព្រះសីហនុ ពោលគឺឆ្លងកាត់រាជធានីភ្នំពេញ (ប្រវែង ៨,៣០គ.ម) ខេត្តកណ្តាល (ប្រវែង ៩,១០គ.ម) ខេត្តកំពង់ស្ពឺ (ប្រវែង ៨០,៨០គ.ម) ខេត្តកោះកុង (ប្រវែង ១,៩២គ.ម) និងខេត្តព្រះសីហនុ (ប្រវែង ៨៩,៨៩គ.ម)៕