បើចង់បានរាងស្លីមស្អាតដូចជប៉ុន គួរចាប់យកទម្លាប់អាហារទាំង៦នេះ!
- 2020-07-20 01:49:36
- ចំនួនមតិ 0 | ចំនួនចែករំលែក 0
បើចង់បានរាងស្លីមស្អាតដូចជប៉ុន គួរចាប់យកទម្លាប់អាហារទាំង៦នេះ!
ចន្លោះមិនឃើញ
វិបសាយ Bright Side បានចងក្រងនូវទម្លាប់អាហារល្អៗចំនួន ៦ របស់ស្ត្រីជនជាតិជប៉ុន ដែលជួយឲ្យពួកគេមានសុខភាពមាំមួន ជាពិសេសគឺរូបរាងកាយស្លីមស្អាត៖
១. ការទទួលទានរបបអាហារដែលមានតុល្យភាព និងសម្បូរវីតាមីន
ជនជាតិជប៉ុនចូលចិត្តបរិភោគអាហារជាច្រើនប្រភេទដូចជា ត្រី សារ៉ាយសមុទ្រ បន្លែ សណ្ដែក បាយ ផ្លែឈើ និងតែបៃតង។ អាហារទាំងនេះសុទ្ធតែមានសារធាតុចិញ្ចឹមចម្រុះ និងតុល្យភាពល្អ ហើយមិនសូវមានជាតិកាឡូរីខ្ពស់នោះឡើយ។ មួយវិញទៀត ពួកគេមានទម្លាប់ទទួលទានអាហារទៅតាមរដូវកាល។ ឧទាហរណ៍នៅរដូវរងា ជប៉ុនជាធម្មតាចូលចិត្តហូបត្រី សាច់ ស៊ុប និងភេសជ្ជៈក្ដៅៗ ខណៈដែលនៅរដូវក្ដៅវិញ ពួកគេហូបស៊ុបត្រជាក់ៗ អាហារសមុទ្រ និងបន្លែចម្រុះ ជាដើម។
២. របៀបចម្អិនអាហារ
តាមបែបទំនៀមទម្លាប់ ជប៉ុននិយមចម្អិនអាហារដោយការស្ងោរ អាំង ចំហុយ ឬក៏ចៀន ដែលប្រើប្រភេទខ្ទះពិសេសម៉្យាង ដោយចម្អិនប្រើប្រេងតិចបំផុត។ បន្ថែមពីនេះ បន្លែដែលត្រូវចម្អិនគឺចិតជាចំណិតតូចៗ ដើម្បីឲ្យឆ្អិនលឿន។ ការធ្វើដូច្នេះនឹងជួយឲ្យសារធាតុចិញ្ចឹមមិនសូវបាត់បង់ច្រើន។
នារីជប៉ុនមានភាពប្រុងប្រយ័ត្នខ្លាំងចំពោះការប្រើគ្រឿងទេសណាស់ ដោយធ្វើយ៉ាងណាមិនចម្អិនអាហារឲ្យឡើងពណ៌ជ្រុលឡើយ ពោលគឺរក្សាភាពស្រស់ និងពណ៌នៃអាហារឲ្យបានច្រើន។ ការចម្អិនអាហារឲ្យឡើងពណ៌ជ្រុលពេក នឹងផ្ដល់ផលប៉ះពាល់ចំពោះក្រពះ ថ្លើម និងតម្រង់នោម។
៣. វប្បធម៌នៃការញ៉ាំ
ជប៉ុនមានទម្លាប់បរិភោគអាហារយឺតៗ ហើយតិចៗ។ សូម្បីតែចានបាយ ឬចានសម្លក៏មានទំហំតូចៗផងដែរ។ កាន់តែចាប់អារម្មណ៍ជាងនេះ អាហារនៅក្នុងចានគឺមិនដែលដួសឲ្យពេញហូរហៀរមាត់ចានដែរ។
៤. បាយជំនួសឲ្យនំបុ័ង
បាយមានសារសំខាន់ណាស់សម្រាប់របបអាហារមួយពេលៗ ហើយការដាំបាយគឺគេមិនបន្ថែមគ្រឿងផ្សំផ្សេងៗដូចជា អំបិល ឬក៏ប័រនោះឡើយ។
៥. អាហារព្រឹកគឺសំខាន់ជាងគេបង្អស់
អាហារចម្បងប្រចាំថ្ងៃរបស់ជប៉ុនគឺអាហារពេលព្រឹក។ អាហារពេលព្រឹកពួកគេ មានភាពចម្រុះគ្នាច្រើនដូចជា ត្រី បាយ ស៊ុតចៀន ស៊ុប សណ្ដែក សារ៉ាយសមុទ្រ និងទឹកតែ។
៦. ការមិនទទួលទានបង្អែម ឬនំផ្អែម
បើឲ្យជប៉ុនទទួលទានបង្អែម គឺវាកម្រណាស់ ទាល់តែមានកម្មវិធីណាមួយទើបគេទទួលទានបង្អែម តែក្នុងបរិមាណតិចតួចប៉ុណ្ណោះ។ ប្រភេទបង្អែមដែលគេនិយមនៅជប៉ុន មានឈ្មោះថា Mochi ដែលធ្វើពីគ្រាប់អង្ករ។ បង្អែមនេះមានជាតិខ្លាញ់ និងស្ករតិចបំផុត៕