រុស្ស៊ី ដាក់ឈ្មោះវ៉ាក់សាំងកូវីដដំបូងគេក្នុងលោក ដូចឈ្មោះផ្កាយរណបទីមួយក្នុងលោក

2020-08-12 02:29:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រុស្ស៊ី ជាប្រទេសដំបូងគេក្នុងលោកដែលយល់ព្រមឱ្យប្រើប្រាស់ជាផ្លូវការក្នុងប្រទេសនូវវ៉ាក់សាំងការពារជំងឺកូវីដ១៩។ នេះបើតាមការប្រកាសរបស់ប្រធានាធិបតីរុស្ស៊ី លោក វ្លាឌីមៀ ពូទីន ក្នុងកិច្ចប្រជុំគណៈរដ្ឋមន្រ្តីកាលពីថ្ងៃទី១១ ខែសីហា ឆ្នាំ២០២០។

ជាមួយគ្នានេះ លោក ពូទីន ក៏បានប្រាប់ទៅរដ្ឋមន្រ្តីសុខាភិបាល ឱ្យបន្តផ្តល់ព័ត៌មានមកលោកវិញអំពីការប្រើប្រាស់វ៉ាក់សាំង ខណៈលោកជឿជាក់ថាវាពិតជាមានប្រសិទ្ធភាពក្នុងការការពារជំងឺនេះបាន។ ក្នុងនោះ កូនស្រីរបស់លោក បានចាក់វ៉ាក់សាំងនេះរួចមកហើយ។

លោកប្រធានាធិបតីបន្តថា រុស្ស៊ីនឹងផលិតវ៉ាក់សាំងនេះជាទ្រង់ទ្រាយធំ សម្រាប់ប្រើប្រាស់នៅទីផ្សារពិភពលោកតែម្តង។

អ្វីដែលគួរឱ្យកត់សម្គាល់នោះ វ៉ាក់សាំងនេះត្រូវបានដាក់ឈ្មោះថា «Sputnik V» ដែលដូចនឹងឈ្មោះផ្កាយរណបទីមួយក្នុងលោក ដែលបាញ់បង្ហោះដោយសហភាពសូវៀតកាលពីសម័យសង្គ្រាមត្រជាក់ ក្នុងឆ្នាំ១៩៥៧ផងដែរ ពោលគឺផ្កាយរណបនោះមានឈ្មោះថា «Sputnik I»។ ការបង្ហោះផ្កាយរណបលើកដំបូង បានបើកផ្លូវសម្រាប់ការរុករកអវកាសរបស់មនុស្សជាតិ និងជាការចាប់ផ្តើមរត់ប្រណាំងប្រជែងគ្នារវាងមហាអំណាចសូវៀត និងអាមេរិកក្នុងវិស័យអវកាស ដែលគេហៅថា «សង្គ្រាមអវកាស»៕