រឿងដ៏គួរឱ្យចាប់អារម្មណ៍ជាច្រើនដែលអ្នកមិនដឹង ជុំវិញការលិចកប៉ាល់ទិតានិច
- 2020-09-08 08:28:31
- ចំនួនមតិ 0 | ចំនួនចែករំលែក 0
រឿងដ៏គួរឱ្យចាប់អារម្មណ៍ជាច្រើនដែលអ្នកមិនដឹង ជុំវិញការលិចកប៉ាល់ទិតានិច
ចន្លោះមិនឃើញ
ឧបទ្ទវហេតុលិចកប៉ាល់ទិតានិច នៅមហាសមុទ្រអាត្លង់ទិច ក្នុងពេលធ្វើដំណើរពីអង់គ្លេស ទៅអាមេរិក នាខែមេសា ឆ្នាំ១៩១២ នៅតែដិតជាប់ពីមនុស្សជាច្រើនលើពិភពលោករហូតមកដល់ពេលនេះ។ ក្រោយហេតុការណ៍នេះ គឺមានការសរសេរបោះពុម្ពជាសៀវភៅ ថតជារឿងកុន និងការស្រាវជ្រាវពីកប៉ាល់នេះជាដើម ក្នុងនោះមានរឿងជាច្រើនដែលលោកអ្នកប្រហែលជាមិនដឹងឡើយ ជុំវិញការលិចកប៉ាល់នេះ។ សូមមើលខាងក្រោម៖
-កប៉ាល់ទិតានិច បានលិចចូលសមុទ្រ បន្ទាប់ពីបានបុកជាមួយដុំទឹកកកដ៏ធំមួយ។ មនុស្សជាង ១៥០០នាក់ ក្នុងចំណោមអ្នកដំណើរជាង ២២០០នាក់នៅលើកប៉ាល់ បានបាត់បង់ជីវិត។
-៧៣ឆ្នាំក្រោយមក គឺនៅខែកញ្ញា ឆ្នាំ១៩៨៥ ទើបបំណែកនៃកប៉ាល់នេះ ត្រូវបានគេរកឃើញ។
-តន្រ្តីករម្នាក់នៅលើកប៉ាល់ ឈ្មោះ Roger Bricoux ទើបតែត្រូវបានប្រកាសថាបានស្លាប់ក្នុងហេតុការណ៍លិចកប៉ាល់នេះ នៅឆ្នាំ ២០០០។
-តន្រី្តករទាំងអស់លើកប៉ាល់ បានលេងភ្លេងជុំគ្នា រហូតដល់ដំណាក់កាលចុងក្រោយនៃការលិចកប៉ាល់ទាំងស្រុង។
-មន្រ្តីនាវិកលើកប៉ាល់ ពេលផ្លាស់ប្តូរគ្នាប្រចាំការ អត់បានប្រគល់សោសម្រាប់ចាក់យកកែវយឹត ឱ្យគ្នាឡើយ ជាហេតុធ្វើឱ្យនាវិកមិនអាចមើលឃើញឆ្ងាយ និងទាន់ពេលវេលា ដែលបណ្តាលឱ្យកប៉ាល់ បុកផ្ទាំងទឹកកក។ គេបានដឹងថា កប៉ាល់បានបុកភ្លាមៗ ក្រោយនាវិកបានឃើញដុំទឹកកកនោះត្រឹម ៣៧វិនាទីប៉ុណ្ណោះ។ រហូតមកដល់ឆ្នាំ២០១០ សោនេះ ត្រូវបានដាក់បង្ហាញក្នុងការដេញថ្លៃមួយ ដែលលក់បានជាង ១៣ម៉ឺនដុល្លារ។
-មន្រ្តីនាវិកដែលបានឃើញដុំទឹកកកនោះ មានឈ្មោះថា Frederick Fleet។ គាត់ជាអ្នករស់រានពីការលិចកប៉ាល់នេះ ប៉ុន្តែគាត់បែរជាស្លាប់ដោយការធ្វើអត្តឃាតក្នុងឆ្នាំ ១៩៦៥ បន្ទាប់ពីប្រពន្ធរបស់គាត់បានស្លាប់។
-មានមនុស្ស ៨នាក់បានស្លាប់រួចមកហើយ ក្នុងពេលសាងសង់កប៉ាល់នេះ។
-ក្នុងចំណោមអ្នកស្លាប់ដោយការលិចកប៉ាល់នេះ ក៏មានរូបលោក John Jacob Astor IV ដែលជាអ្នកមានបំផុតក្នុងចំណោមអ្នកដំណើរទាំងអស់លើកប៉ាល់។ យ៉ាងណាមិញ ក្នុងពេលនោះ លោកក៏ត្រូវបានគេជឿជាក់ដែរថា ជាអ្នកមានបំផុតក្នុងពិភពលោកផងដែរ ដែលមានទ្រព្យសម្បត្តិ ១៥០លានដុល្លារ (តម្លៃបច្ចុប្បន្នប្រហែល ៣,៥ពាន់លានដុល្លារ)។ ក្នុងពេលស្រង់សាកសពរបស់គាត់ គេបានរកឃើញលុយ ២៤៤០ដុល្លារក្នុងហោប៉ៅរបស់គាត់ (បច្ចប្បន្នតម្លៃវាស្មើ ៦ម៉ឺនដុល្លារ)។
-កាសែតធំៗមួយចំនួន រួមមានទាំង Daily Mail និង Belfast Telegraph បានផ្សាយច្រលំថា ឧបទ្ទវហេតុលិចកប៉ាល់នេះ គ្មានអ្នកស្លាប់ឡើយ។
-ស្រ្តីជាគ្រូពេទ្យម្នាក់ឈ្មោះ Violet Jessop ដែលនៅរស់រានពីការលិចកប៉ាល់ទិតានិច គឺថែមទាំងបាននៅរស់រានពីការលិចកប៉ាល់មួយទៀតឈ្មោះ Britannica ឬ Titanic 2 ក្នុងឆ្នាំ១៩១៦ បន្ទាប់ពីកប៉ាល់នេះបានឆ្លងកាត់មីនបណ្តែតទឹករបស់អាល្លឺម៉ង់។ ប៉ុន្តែលើកនេះ គាត់មានគ្រោះថ្នាក់ដល់ក្បាលធ្ងន់ធ្ងរ ដែលជះឥទ្ធិពលដល់ការរស់នៅពេញមួយជីវិត។
-មានពាក្យចចាមអារ៉ាមថា មានបុរសមួយចំនួន បានស្លៀកសម្លៀកបំពាក់បន្លំជាស្រ្តី ដើម្បីបានជិះទូកតូច គេចចេញពីកប៉ាល់ទិតានិច ព្រោះពេលនោះកាពីទែនកប៉ាល់ បានបញ្ជាឱ្យតែស្រ្តី និងកុមារ មានសិទ្ធិអាទិភាពជិះទូកតូច ដែលបានដាក់សាគួរ ពេលមានអាសន្ន។ ហើយរឿងនេះ ធ្វើឱ្យប្តីប្រពន្ធមួយគូ បានលែងលះគ្នាផងដែរ។
-រឿងប្រលោមលោកមួយមានចំណងជើងថា «Futility» ដោយក្នុងសាច់រឿងនេះ ហាក់ដូចជាបានទស្សន៍ទាយទុកមុនពីការលិចកប៉ាល់ទីតានិច។ រឿងប្រលោមលោកនេះ ត្រូវបាននិពន្ធដោយជនជាតិអាមេរិកម្នាក់ឈ្មោះ Morgan Robertson និងចេញផ្សាយក្នុងឆ្នាំ ១៨៩៨ ពោលគឺមុន ១៤ឆ្នាំនៃការលិចកប៉ាល់នេះ។
-នាវាអាមេរិក SS Californian ត្រូវគេដឹងថា ស្ថិតនៅជិតកប៉ាល់ទិតានិចជាងគេបំផុត ពេលកំពុងលិច ប៉ុន្តែបែរជាមកជួយមិនទាន់។ ៣ឆ្នាំក្រោយពីការលិចកប៉ាល់ទិតានិច នាវាអាមេរិកនេះ ក៏បានលិចផងដែរ ដោយត្រូវគ្រាប់ផ្លោងរបស់ទ័ពអាល្លឺម៉ង់ ក្នុងឆ្នាំ១៩១៥។
-Rhoda Mary Abott ជាស្រ្តីតែម្នាក់គត់ដែលនៅរស់រានមានជីវិត បន្ទាប់ពីលិចចូលសមុទ្រជាមួយកប៉ាល់។ គាត់បានលិចចូលជាមួយកូនប្រុស២នាក់ ប៉ុន្តែកូនប្រុសទាំង២បានស្លាប់។ Abott ត្រូវបានទាញសង្គ្រោះឡើងមកលើទូកតូច ដោយក្រុមនាវិកនៃកប៉ាល់ទិតានិច។
-បំណែកកប៉ាល់ទាំងមូល ត្រូវគេសន្និដ្ឋានថា នឹងរលាយបាត់ទាំងស្រុងត្រឹមឆ្នាំ២០៣០ ដោយសារវាត្រូវស៊ីដោយពពួកបាក់តេរី។
-លោក Charles Joughin ដែលជាចុងភៅមួយរូបនៅលើកប៉ាល់ទិតានិច អាចទ្រាំយូរក្នុងការត្រាំទឹកដ៏ត្រជាក់នៃមហាសមុទ្រអាត្លង់ទិក (ប្រហែល ២ម៉ោង) ពោលគឺយូរជាងអ្នកផ្សេងទៀត ដោយសារគាត់បានផឹកស្រាវីស្គី អស់២ដប ពេលកប៉ាល់កំពុងលិច។
-ក្នុងចំណោម ១៥០០នាក់ ដែលបានស្លាប់ក្នុងឧបទ្ទវហេតុនេះ គឺមានតែសាកសព ៣០០នាក់ប៉ុណ្ណោះ ដែលត្រូវបានគេរកឃើញ។ ហើយក្នុងនោះទៀតសោត មានសាកសពក្មេង១នាក់ ដែលគេនៅតែមិនស្គាល់អត្តសញ្ញាណរហូតមកដល់ពេលនេះ។ ផ្នូរសាកសពនោះ ត្រូវបានគេដាក់ថា «Unkown Child»។
-អ្នករស់រានពីការលិចកប៉ាល់ទិតានិច ឈ្មោះ Millvina Dean គឺបានស្លាប់ចុងក្រោយគេបំផុតនៅក្នុងឆ្នាំ ២០០៩ ក្នុងអាយុ ៩៧ឆ្នាំ ដោយពេលមានឧបទ្ទវហេតុនោះ គឺគាត់មានអាយុត្រឹមតែ ២ខែប៉ុណ្ណោះ។
-មានមនុស្សប៉ុន្មាននាក់ប៉ុណ្ណោះដែលមានភ័ព្វសំណាងគេចផុតពីឧបទ្ទវហេតុនេះ ពោលគឺទិញសំបុត្រហើយ តែមិនបានឡើងជិះកប៉ាល់ទិតានិច។ ក្នុងនោះមានដូចជាឈ្មោះ Milton Hershey, J.P. Morgan និង Guglielmo Marconi ជាដើម៕