រដ្ឋមន្រ្តី៖ ខេត្ត២នេះអំណោយផលលើអេកូទេសចរណ៍ កសិទេសចរណ៍ និងទេសចរណ៍ជនបទ

2020-09-22 02:05:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ថោង ខុន រដ្ឋមន្រ្តីក្រសួងទេសចរណ៍ បានថ្លែងឱ្យដឹងថា ខេត្តសៀមរាប និងកំពង់ធំ គឺមានអំណោយផលច្រើនបំផុតសម្រាប់ការវិនិយោគលើវិស័យអេកូទេសចរណ៍ កសិទេសចរណ៍ និងទេសចរណ៍ជនបទ ពិសេសការកសាងខ្សែក្រវាត់បៃតង។ លោកបានជម្រាបដូច្នេះ ទៅកាន់លោក Nabeshima Katsuhito អគ្គនាយកក្រុមហ៊ុន Yamato Green Co., Ltd ក្នុងជំនួបគ្នាមួយ នៅទីស្តីការក្រសួង កាលពីថ្ងៃទី២១ ខែកញ្ញា ឆ្នាំ២០២០។

ជាមួយគ្នានេះ លោក ថោង ខុន ចង់ឱ្យក្រុមហ៊ុនពិចារណាលើការវិនិយោគអភិវឌ្ឍវិស័យទេសចរណ៍នៅក្នុងខេត្តទាំងនេះ បន្ទាប់ពីបានវិនិយោគនៅបាត់ដំបង និងខេត្តមណ្ឌលគីរី។ ម្យ៉ាងទៀត ក្រុមហ៊ុនគប្បីកសាងឱ្យបានគំរូមួយក្នុងខេត្តនីមួយៗមុននឹងពង្រីកទៅខេត្តដទៃ។

លោករដ្ឋមន្ត្រីបានបន្ថែមទៀតថា ក្នុងបរិបទកូវីដ-១៩នេះ វិស័យអេកូទេសចរណ៍ កសិទេសចរណ៍ និងទេសចរណ៍ជនបទ កំពុងត្រូវបានសកលលោកយកចិត្តទុកដាក់ និងជំរុញលើកទឹកចិត្តយ៉ាងខ្លាំង។

ក្នុងជំនួបនេះដែរ លោកអគ្គនាយកក្រុមហ៊ុន បានលើកឡើងថា ក្រុមហ៊ុនលោកនឹងធ្វើឱ្យផលិតផលកសិកម្មរបស់កម្ពុជាក្លាយទៅជា «កសិទេសចរណ៍» ហើយភ្ញៀវទេសចរជាតិ-អន្តរជាតិ អាចទទួលទានអាហារ ដែលមានស្រាប់នៅតាមតំបន់ទេសចរណ៍នីមួយៗ ប្រកបដោយសុវត្ថិភាព។ ជាងនេះទៅទៀត ភ្ញៀវទេសចរក៏អាចចូលរួមទស្សនាបច្ចេកទេសនៃការដាំដុះ និងថែទាំបានដោយផ្ទាល់ផងដែរ។

គួរបញ្ជាក់ថា ក្រុមហ៊ុនជប៉ុននេះ បាននឹងកំពុងទទួលបានភាពជោគជ័យ និងមានភាពល្បីល្បាញណាស់ដែរ នៅក្នុងការអភិវឌ្ឍវិស័យកសិទេសចរណ៍ និងវិស័យអេកូទេសចរណ៍ នៅខេត្តបាត់ដំបង និងខេត្តមណ្ឌលគិរី។ ដោយសារកត្តានេះហើយ ទើបជំរុញឱ្យក្រុមហ៊ុនមានគម្រោងអភិវឌ្ឍន៍ថ្មីជាមួយរាជរដ្ឋាភិបាលកម្ពុជា គឺខ្សែក្រវាត់បៃតងខាងលើនេះឯង៕

ប្រភព៖ ក្រសួងទេសចរណ៍