លាក់ជិតណាស់! មិនដឹងសោះថាលោក អូបាម៉ា ជក់បារី៩ដើមក្នុង១ថ្ងៃ ពេលធ្វើជាប្រធានាធិបតី

2020-11-19 00:14:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងសៀវភៅបោះពុម្ពថ្មីមានចំណងជើងថា "A Promised Land" របស់លោក បារ៉ាក់ អូបាម៉ា បានលាតត្រដាងនូវទម្លាប់អាក្រក់បំផ្លាញសុខភាពមួយរបស់អតីតប្រធានាធិបតីអាមេរិករូបនេះ។ លោក អូបាម៉ា បានទម្លាយឲ្យដឹងថា កាលនៅសេតវិមាន លោកមានទម្លាប់ជក់បារី ពេលកើតមានអារម្មណ៍ស្ត្រេសជាមួយការងារម្ដងៗ។

អតីតប្រធានាធិបតីទី៤៤របស់អាមេរិករូបនេះ បានបញ្ជាក់ថា ក្នុង១ថ្ងៃលោកបានជក់បារីចំនួន ៨ ឬ៩ដើមឯណោះ ហើយរាល់ពេលជក់ លោកតែងរកកន្លែងស្ងាត់ដើម្បីលាក់បាំងពីភ្នែកមហាជន។ ប៉ុន្តែក្រោយមក លោកក៏បានផ្ដាច់បារី ព្រោះមានការជំរុញពីកូនស្រីច្បង Malia។ លោកថា ពេលធុំក្លិនស្អុយបារីពីមាត់ឪពុកម្ដងៗ Malia តែងតែចងចិញ្ចើមដាក់លោក។ លោក អូបាម៉ា បានប្រើការទំពារស្ករកៅស៊ូដែលមានជាតិនីកូទីនក្នុងការផ្ដាច់បារី។

សូមបញ្ជាក់ថា នៅអំឡុងពេលកាន់តំណែងជាប្រធានាធិបតីរបស់លោក អូបាម៉ា បណ្ដាសារព័ត៌មានជាច្រើនឧស្សាហ៍ចុះផ្សាយអំពីការសង្ស័យដែលថា លោក អូបាម៉ា មិនបានចោលទម្លាប់ជក់បារីតាំងពីនៅវ័យក្មេងនោះទេ បើទោះជាលោកធ្លាប់និយាយក្នុងសន្និសីទមួយកាលពីឆ្នាំ២០០៩អំពីភាពជោគជ័យនៃការផ្ដាច់បារីក៏ដោយ។ ពេលនៅធ្វើការក្នុងសេតវិមានចន្លោះឆ្នាំ២០០៩ដល់ឆ្នាំ២០១៧ គេមិនដែលចាប់បានលោក អូបាម៉ា ជក់បារីឡើយ គឺគ្រាន់តែឃើញតម្រុយខ្លះៗប៉ុណ្ណោះ។ ជាឧទាហរណ៍ក្នុងឆ្នាំ២០១៥ ពេលធ្វើដំណើរទៅអាល្លឺម៉ង់ក្នុងកិច្ចប្រជុំ G-7 អ្នកនាំពាក្យរបស់អតីតនាយករដ្ឋមន្ត្រីអ៊ីតាលីបានបង្ហោះរូបមួយសន្លឹកលើបណ្ដាញសង្គម ដែលក្នុងនោះគេសង្កេតឃើញលោក អូបាម៉ា កំពុងកាន់កញ្ចប់បារីក្នុងដៃ។ ប៉ុន្តែព័ត៌មាននេះបែរជាត្រូវខាងសេតវិមានបដិសេធទៅវិញ៕