សម្តេច ហ៊ុន សែន ប្រកាសប្រើវ៉ាក់សាំងចិន Sinopharm ខណៈព្រឹកនេះរកឃើញអ្នកឆ្លងកូវីដថ្មី ១០នាក់

2021-01-16 00:30:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានប្រកាសយប់មិញនេះ កម្ពុជាសម្រេចប្រើប្រាស់វ៉ាក់សាំងបង្ការជំងឺកូវីដ១៩ របស់ក្រុមហ៊ុនចិន Sinopharm ដែលជាជំនួយរបស់រដ្ឋាភិបាលចិន ផ្តល់ឱ្យកម្ពុជា ១លានដូស ហើយគ្រោងបញ្ជូនមកដល់ក្នុងពេលឆាប់ៗនេះ។

សម្តេចតេជោបញ្ជាក់ថា ការសម្រេចប្រើវ៉ាក់សាំងនេះ បន្ទាប់ពីមានប្រទេសជាច្រើនរួចមកហើយ បានចាក់វ៉ាក់សាំងនេះ ដូចជាថ្នាក់ដឹកនាំចិន និងប្រជាជនចិនរាប់លាននាក់ ឥណ្ឌូណេស៊ី ពិសេសប្រធានាធិបតីចូកូ វីដូដូ ប្រទេសអាហ្វ្រិច អេហ្ស៊ីប មជ្ឈិមបូព៌ា និងនៅអាមេរិកឡាទីនជាដើម បើទោះបីជាមិនទាន់មានការទទួលស្គាល់ពីអង្គការសុខភាពពិភពលោកក៏ដោយ។

លើសពីនេះ សម្តេច ហ៊ុន សែន លើកឡើងទៀតថា វ៉ាក់សាំងរបស់ចិន គឺងាយស្រួលគ្រប់គ្រងទុកដាក់ និងដឹកជញ្ជូន បើប្រៀបធៀបជាមួយនឹងវ៉ាក់សាំងរបស់ក្រុមហ៊ុនមួយចំនួនដែលតម្រូវការសីតុណ្ហភាព -៧០អង្សារសេ។ ជាមួយគ្នានេះ កម្ពុជាក៏គ្រោងនឹងប្រើប្រាស់វ៉ាក់សាំងកូវីដ១៩របស់ក្រុមហ៊ុនចិន Sinovac មួយទៀតផងដែរ។

សូមជម្រាបថា ក្រសួងសុខាភិបាលបានប្រកាសឱ្យដឹងនៅព្រឹកនេះថា កម្ពុជាបានរកឃើញករណីវិជ្ជមានថ្មី ១០នាក់ ដែលមកពីប្រទេសថៃ ខណៈម្សិលមិញនេះ ក៏បានរកឃើញអ្នកឆ្លងថ្មី ១៥នាក់ផងដែរ។

គិតត្រឹមថ្ងៃទី១៦ មករា ២០២១នេះ កម្ពុជាមានករណីឆ្លងកូវីដ១៩សរុប ៤៣៦នាក់ ក្នុងនោះជាសះស្បើយ ៣៨២នាក់៕