អ៊ីស្រាអែល ចាប់ផ្តើមឃើញពន្លឺនៃការងើបចេញពីជំងឺកូវីដ១៩ហើយ
- 2021-01-18 04:01:52
- ចំនួនមតិ 0 | ចំនួនចែករំលែក 0
អ៊ីស្រាអែល ចាប់ផ្តើមឃើញពន្លឺនៃការងើបចេញពីជំងឺកូវីដ១៩ហើយ
ចន្លោះមិនឃើញ
ប្រជាជនអ៊ីស្រាអែល ដែលបានចាក់វ៉ាក់សាំងបង្ការកូវីដ១៩ ពេញលេញទាំង២លើកហើយ គឺមិនតម្រូវឱ្យធ្វើចត្តាឡីស័កទៀតទេ ក្រោយប៉ះពាល់ជាមួយអ្នកជំងឺកូវីដ១៩។ នេះបើតាមការបញ្ជាក់របស់លោក Nachman Ash មន្រ្តីសុខាភិបាលជាន់ខ្ពស់របស់រដ្ឋាភិបាលអ៊ីស្រាអែលដែលទទួលបន្ទុកដោះស្រាយជំងឺកូវីដ១៩ កាលពីថ្ងៃទី១៧ ខែមករា ឆ្នាំ២០២១។
លោកបានឱ្យដឹងថា ក្រសួងសុខាភិបាលអ៊ីស្រាអែល កំពុងខិតជិតដល់ការបញ្ចប់នូវការធ្វើប្រព័ន្ធទិន្នន័យអនឡាញ ជាមួយពលរដ្ឋទាំងអស់ដែលបានចាក់វ៉ាក់សាំងរួច។ ពួកគេនឹងទទួលបានវិញ្ញាបនបត្រ «Green Passport» ដែលអនុញ្ញាតឱ្យពួកគេ អាចធ្វើដំណើរបានដោយសេរី។
ការចេញវិញ្ញាបនបត្រនេះ នឹងធ្វើឡើងបន្ទាប់ពីអ៊ីស្រាអែល បញ្ចប់ការបិទប្រទេសនៅថ្ងៃទី២១ ខែមករា ឆ្នាំ២០២១ខាងមុខ។
គួរដឹងថា អ៊ីស្រាអែល កំពុងនាំមុខគេក្នុងពិភពលោកដែលមានអត្រាចាក់វ៉ាក់សាំងបង្ការកូវីដ១៩លឿនជាងគេ ប្រមាណ ២៧,១% ឬជាង២,៤លាននាក់ នៃចំនួនប្រជាជនសរុប៩លាននាក់ គិតត្រឹមថ្ងៃទី១៧ ខែមករា ឆ្នាំ២០២១។
ជាមួយនឹងការសម្រេចបានការចាក់វ៉ាក់សាំងដ៏សកម្មនេះ លោកនាយករដ្ឋមន្រ្តី បេចាមីន នីទេនយ៉ាហ៊ូ បានអះអាងថា ប្រជាជនអ៊ីស្រាអែលគ្រប់គ្នានឹងទទួលបានការចាក់វ៉ាក់សាំងហើយវិលទៅរកជីវិតធម្មតា បើកសេដ្ឋកិច្ច ហើយនឹងក្លាយជាប្រទេសដំបូងគេដែលងើបចេញពីជំងឺនេះ។
គិតត្រឹមព្រឹកថ្ងៃទី១៨ ខែមករា ឆ្នាំ២០២១នេះ អ៊ីស្រាអែលមានករណីឆ្លងកូវីដ១៩សរុបជាង ៥៤,៨ម៉ឺននាក់ ក្នុងនោះស្លាប់ជាង ៤០០៥នាក់ និងជាសះស្បើយជាង ៤៦ម៉ឺននាក់៕
ប្រភព៖ Ynetnews