អ្នកគាំទ្រភ្ញាក់ផ្អើលពេលឃើញ ទិន ហ្វីបង្ហាញមុខក្នុងបុណ្យសពរបស់ Ng Man Tat

2021-03-09 02:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មនុស្សជាច្រើនបានសម្ដែងភាពភ្ញាក់ផ្អើលនៅពេលឃើញវត្តមានរបស់កំពូលតារាសម្ដែងហុងកុង Stephen Chow នៅក្នុងបុណ្យសពរបស់តារាសម្ដែង Ng Man Tat។

កាលពីថ្ងៃទី ៧ ខែមីនាកន្លងទៅនេះ ពិធីបុណ្យសពរបស់តារាសម្ដែងជើងចាស់ហុងកុង Ng Man Tat ត្រូវបានប្រព្រឹត្តឡើងនៅកោះហុងកុង តាមសាសនាព្រះយេស៊ូ។ នៅក្នុងកម្មវិធីនេះដែរ សិល្បករ និងសិល្បការិនីជាច្រើនរូបបានមកចូលរំលែកទុក្ខតាំងពីពេលរសៀលម្ល៉េះ។ កូនប្រុសច្បងរបស់អតីតតួរឿង និស្សិតផ្ដាច់សង្ខារគឺជាអ្នករៀបចំចាត់ចែងពិធីបុណ្យ។

ខ្ទង់ប្រហែលម៉ោងជិត៦ កំពូលតារាសម្ដែងប្រុស ទិន ហ្វីបានបង្ហាញខ្លួននៅក្នុងកម្មវិធីបុណ្យ ជាមួយប្អូនស្រីរបស់ខ្លួន។ សិល្បករ ៥៨ឆ្នាំ ពាក់ម៉ាស និងមួកដើម្បីការពារកុំឲ្យមានការចាប់អារម្មណ៍ខ្លាំងពេក។ បណ្ដាញព័ត៌មាន Appledaily បានឲ្យដឹងថា ទិន ហ្វីបានឈរសញ្ជឹងនៅមុខមឈូសរបស់អតីតមិត្តរួមសម្ដែងប្រហែល១០នាទី ហើយក៏ប្រញាប់ចេញមកវិញ។

វត្តមានរបស់តួរឿង តុលាការមុខដែក ទទួលបានការចាប់អារម្មណ៍ខ្លាំង ត្បិតមុននោះ មានព័ត៌មានបង្ហើបប្រាប់ថា ដោយសារមិនឲ្យជ្រួលច្របល់នៅកន្លែងរៀបចំបុណ្យ ដូចនេះ Stephen Chow នឹងមិនចូលរួមពិធីបុណ្យសពរបស់អតីតក្លើរបស់ខ្លួនឡើយ។ យ៉ាងណាក្ដី មនុស្សជាច្រើនជឿជាក់ថា លោកទ្រាំមិនបានឡើយ ដែលជាហេតុធ្វើឲ្យលោកដាច់ចិត្តមកទាល់តែបាន។ ប៉ុន្មានឆ្នាំចុងក្រោយនៃជីវិតខ្លួន Ng Man Tat និង ទិន ហ្វីបានជានាគ្នាឡើងវិញ ដោយលោកស្ម័គ្រចិត្តចេញថ្លៃព្យាបាលជំងឺដល់រៀមច្បងរបស់ខ្លួនទៀតផង។ មុន ទិន ហ្វី កំពូលតារាសម្ដែងមួយទៀតគឺ លី តឺហួរ ក៏បានចូលរួមក្នុងពិធីបុណ្យសពនេះដូចគ្នា៕