បើអត់មានវ៉ាក់សាំងចិន តើពេលនេះកម្ពុជាចាក់បានប៉ុន្មាននាក់? សម្តេចតេជោបញ្ជាក់បែបនេះ
- 2021-09-13 02:23:25
- ចំនួនមតិ 0 | ចំនួនចែករំលែក 0
បើអត់មានវ៉ាក់សាំងចិន តើពេលនេះកម្ពុជាចាក់បានប៉ុន្មាននាក់? សម្តេចតេជោបញ្ជាក់បែបនេះ
ចន្លោះមិនឃើញ
សម្តេចនាយករដ្ឋមន្រ្តី ហ៊ុន សែន បានអះអាងថា បើមិនមានវ៉ាក់សាំងចិនទេ មកដល់ពេលនេះគឺកម្ពុជាចាក់វ៉ាក់សាំងជូនដល់ប្រជាជនយ៉ាងច្រើនណាស់ បានត្រឹម ២លាននាក់ប៉ុណ្ណោះ។ ការថ្លែងនេះ ធ្វើឡើងក្នុងពិធីប្រគល់-ទទួល ពហុកីឡដ្ឋានជាតិមរតកតេជោ កាលពីថ្ងៃទី១២ កញ្ញា ២០២១។
ថ្លែងចំពោះមុខរដ្ឋមន្រ្តីការបរទេសចិន លោក វ៉ាង យី សម្តេចតេជោ បានលើកឡើងយ៉ាងដូច្នេះថា៖ «វ៉ាក់សាំង បើសិនជាខ្ញុំមិនច្រលំទេ បើកុំមានចិនជួយផ្តល់ កុំមានចិនជួយផ្គត់ផ្គង់ មកដល់ពេលនេះច្រើនណាស់ កម្ពុជាចាក់បាន ២លាននាក់។ ប៉ុន្តែឥឡូវនេះ សូមជម្រាបជូន យប់នេះអាចដល់ ១១លានកន្លះដែលបានចាក់។ ក្នុង១១លានកន្លះនេះ មានអ្នកចាក់ដូសទី៣ ប្រមាណ ៨០ម៉ឺននាក់រួចស្រេចទៅហើយ។ ហើយកូនក្មេង ១លាន ៦សែននាក់រួចស្រេចទៅហើយ»។
សម្តេចបន្តថា «នៅទូទាំងពិភពលោក កម្ពុជាតែមួយគត់ ដែលមានវ៉ាក់សាំងស្រោចនៅរាជធានី។ សូម្បីតែទីក្រុងប៉េកាំង ប្រហែលជាពេលនេះមិនទាន់ចាក់បាន ៩៩% នៃប្រជាជន ប៉ុន្តែនៅភ្នំពេញ ស្រោចវ៉ាក់សាំងយកតែម្តង»។
យោងតាមរបាយការណ៍អ្នកចាក់វ៉ាក់សាំងនៅកម្ពុជា បង្ហាញថា គិតពីថ្ងៃទី១០កុម្ភៈ ដល់ ១២ កញ្ញា ២០២១ កម្ពុជាបានចាក់វ៉ាក់សាំងដល់មនុស្សចំនួនជាង ១១,៤៤លាននាក់ ស្មើនឹង ៧១,៥៤% នៃប្រជាជនសរុប ១៦លាននាក់។ ក្នុងនោះអ្នកចាក់គ្រប់ដូស មានចំនួនជាង ៩,៥១លាននាក់ និងអ្នកចាក់បានដូសទី៣ ចំនួនជាង ៧៦,៧១ម៉ឺននាក់៕