ដំរី ១៤ក្បាល នឹងត្រូវបញ្ឈប់សេវាដឹកជញ្ជូនភ្ញៀវទេសចរនៅតំបន់អង្គរត្រឹមឆ្នាំ២០២០

2019-06-21 08:12:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជ្ញាធរជាតិអប្សរា បានឱ្យដឹងថា សត្វដំរីចំនួន១៤ក្បាលនៅក្នុងតំបន់អង្គរ នឹងត្រូវបញ្ឈប់សេវាដឹកជញ្ជូនភ្ញៀវទេសចរ ដោយដំរីទាំងនេះ នឹងត្រូវបញ្ជូនទៅឱ្យរស់នៅតាមបែបធម្មជាតិនៅក្នុងព្រៃសហគមន៍ប្បុសធំ នៅស្រុកសូទ្រនិគម ខេត្តសៀមរាប សម្រាប់ឱ្យភ្ញៀវទៅទស្សនាវិញ។ នេះបើតាមការបញ្ជាក់របស់លោក ឡុង កុសល អ្នកនាំពាក្យរបស់អាជ្ញាធរជាតិអប្សរា បានឱ្យដឹងកាលពីថ្ងៃទី២០ ខែមិថុនា ឆ្នាំ២០១៩។

លោក ឡុង កុសល បាននិយាយថា បន្ទាប់ពីពិនិត្យឃើញថា ការប្រើប្រាស់សត្វដំរីដើម្បីដឹកអ្នកទេសចរកម្សាន្តនៅក្នុងតំបន់រមណីយដ្ឋានអង្គរ ធ្វើឱ្យប៉ះពាល់ដល់ការរស់នៅតាមបែបធម្មជាតិរបស់វា អាជ្ញាធរជាតិអប្សរាក៏បានប្រជុំពិភាក្សាគ្នាជាមួយអ្នកគ្រប់គ្រងដំរីនៅតំបន់អង្គរនេះ ដើម្បីរកដំណោះស្រាយ។

នៅក្នុងកិច្ចប្រជុំនោះ អ្នកគ្រប់គ្រងសត្វដំរី និងអាជ្ញាធរជាតិអប្សរា បានឯកភាពគ្នាឱ្យឈប់ការប្រើប្រាស់សត្វដំរីដើម្បីដឹកអ្នកទេសចរកម្សាន្តនៅតំបន់អង្គរនៅត្រឹមឆ្នាំ២០២០ ហើយបញ្ជូនសត្វដំរីទាំងនោះទៅមណ្ឌលអភិរក្ស និងមជ្ឈមណ្ឌលបង្កាត់ពូជ ដើម្បីឱ្យពួកវារស់នៅតាមបែបធម្មជាតិវិញ។

លោក អ៊ាន គីរី ប្រធានគណៈកម្មាធិការដំរីអង្គរបានឱ្យដឹងថា សត្វដំរីដែលដឹកអ្នកទេសចរកម្សាន្តនៅតំបន់អង្គរបច្ចុប្បន្ននេះមានចំនួន១៤ក្បាល ហើយចំពោះព័ត៌មានថាបញ្ឈប់សេវាកម្មយកសត្វដំរីដឹកអ្នកទេសចរកម្សាន្តនៅតំបន់អង្គរនេះ លោកនឹងអនុវត្តទៅតាមការសម្រេចរបស់ក្រុមហ៊ុន និងអាជ្ញាធរជាតិអប្សរា។

លោក ម៉ុង ប៊ុនលីម ប្រធានខណ្ឌរដ្ឋបាលព្រៃឈើខេត្តសៀមរាប បានឱ្យដឹងថា ដើម្បីរកកន្លែងដាក់សត្វដំរីឱ្យរស់នៅក្នុងព្រៃតាមបែបធម្មជាតិវិញ ខាងក្រុមហ៊ុនគ្រប់គ្រងដំរីនៅតំបន់អង្គរ បានទាក់ទងមកខាងរដ្ឋបាលព្រៃឈើ ដើម្បីរកព្រៃណាមួយក្នុងខេត្តសៀមរាបឱ្យពួកវារស់នៅ។ ខាងខណ្ឌរដ្ឋបាលព្រៃឈើបានឯកភាពឱ្យយកសត្វដំរីទាំងនេះ ទៅដាក់នៅក្នុងព្រៃសហគមន៍ប្បុសធំដែលមានផ្ទៃដី ៤០០ហិកតា។ ប៉ុន្តែកន្លែងសម្រាប់ឱ្យសត្វដំរីរស់នៅមានចំនួន៤០ហិកតា ដោយធ្វើការផ្លាស់ទីក្នុងមួយឆ្នាំម្តង។ ជាមួយគ្នានោះបើសិនការខូចខាតព្រៃឈើ ក្រុមហ៊ុនគ្រប់គ្រងសត្វដំរី នឹងត្រូវដាំដើមឈើឱ្យសហគមន៍វិញ។

លោកបញ្ជាក់ថា ចំពោះអ្នកទេសចរនៅតែអាចទៅទស្សនាសត្វដំរីនេះបាន ដោយខាងក្រុមហ៊ុន និងរៀបចំកម្មវិធីឱ្យអ្នកទេសចរទៅទស្សនាសត្វដំរីទាំងនេះនៅក្នុងព្រៃ ដោយខាងអ្នកគ្រប់គ្រងដំរី និងបង្ហាត់បង្រៀនពួកវាឱ្យចេះគូរគំនូរឬធ្វើសកម្មភាពផ្សេងៗ ដែលធ្វើឱ្យអ្នកទេសចរចង់ទស្សនារូបភាពប៉ិនប្រសប់របស់ពួកវា៕

ប្រភព៖ រស្មីកម្ពុជា