ខេត្តណាខ្លះនៅកម្ពុជា ដែលមានក្រុង ២?

2019-01-29 02:45:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បានចំណោមរាជធានី-ខេត្ត ទាំង ២៥ ទូទាំងព្រះរាជាណាចក្រកម្ពុជា មានខេត្ត ៣ ដែលមានក្រុង ២ ខណៈខេត្តផ្សេងទៀត មានក្រុងតែមួយប៉ុណ្ណោះ។

ខេត្តទាំង ៣ នោះ មានដូចខាងក្រោម៖

១. ខេត្តស្វាយរៀង

ខេត្តស្វាយរៀង ចែកចេញជាក្រុង ២ និងស្រុក ៦។

ក្រុង ២ របស់ខេត្តស្វាយរៀង គឺ ក្រុងស្វាយរៀង និងក្រុងបាវិត ។ ចំណែកស្រុកទាំង ៦ រួមមាន ស្រុករមាសហែក ស្រុកស្វាយជ្រុំ ស្រុកកំពង់រោទ៍ ស្រុករំដួល ស្រុកស្វាយទៀប និងស្រុកចន្ទ្រា។

២. ខេត្តបន្ទាយមានជ័យ

ខេត្តបន្ទាយមានជ័យ ចែកចេញជាក្រុង ២ និងស្រុក ៧។

ក្រុង ២ របស់ខេត្តបន្ទាយមានជ័យ គឺ ក្រុងសិរីសោភ័ណ និងក្រុងប៉ោយប៉ែត ។ ចំណែកស្រុកទាំង ៧ រួមមាន ស្រុកមង្គលបុរី ស្រុកព្រះនេត្រព្រះ ស្រុកស្វាយចេក ស្រុកថ្មពួក ស្រុកអូរជ្រៅ ស្រុកភ្នំស្រុក និងស្រុកម៉ាឡៃ។

៣. ខេត្តព្រះសីហនុ

ខេត្តព្រះសីហនុ ចែកចេញជាក្រុង ២ និងស្រុក ៣។

ក្រុង ២ របស់ខេត្តព្រះសីហនុ គឺ ក្រុងព្រះសីហនុ និងក្រុងកោះរ៉ុង (ក្រុងកោះរ៉ុង ជាក្រុងដែលទើបបង្កើតថ្មី នាដើមឆ្នាំ២០១៩ នេះ)។ ចំណែកស្រុកទាំង ៣ រួមមាន ស្រុកព្រៃនប់ ស្រុកកំពង់សីលា និងស្រុកស្ទឹងហាវ។

សូមបញ្ជាក់ថា ខេត្តកំពង់ចាម ក៏ធ្លាប់មានក្រុង ២ ដែរ គឺក្រុងកំពង់ចាម និងក្រុងសួង ប៉ុន្តែក្រោយមក ក្រុងសួង ត្រូវបានកាត់ចូលខេត្តត្បូងឃ្មុំ ពោលគឺក្រោយពេលបង្កើតខេត្តត្បូងឃ្មុំ។ ខេត្តកំពង់ចាម មានក្រុងតែមួយប៉ុណ្ណោះនាពេលបច្ចុប្បន្ន គឺក្រុងកំពង់ចាម៕

ចុចអានអត្ថបទទាក់ទង៖ ខណ្ឌដែលទើបបង្កើតថ្មី២ នៅរាជធានីភ្នំពេញ មានសង្កាត់ណាខ្លះ?

អត្ថបទ៖ សុខ សុវត្ថិ