ព្រះតេជគុណ តាក់ស៊ី ព្រមទទួលយកការរិះគន់កែលម្អ ដោយឈប់ចេញទេសនាហើយ

2019-07-12 07:13:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ព្រះតេជគុណ ប៉ុល សារឿង ហៅនាយ តាក់ស៊ី នៅថ្ងៃនេះ បានធ្វើកិច្ចសន្យានៅចំពោះព្រះភ័ក្ត្រព្រះមេគុណខេត្ត និងសង្ឃគ្រប់ថានានុក្រម ទទួលយកការផ្អាកការចេញទេសនាដូចដែលបានធ្វើប៉ុន្មានលើកនាពេលថ្មីៗនេះ។

កិច្ចសន្យានេះ ក្រោយពីមានអ្នកលេង Facebook ម្នាក់ ឈ្មោះ Sothea Yon ដែលជាអតីតអ្នកបួសរៀនម្នាក់ បានសរសេរលិខិតបើកចំហមួយ ជូនព្រះតេជគុណ តាក់ស៊ី តែម្ដង ដោយស្នើឲ្យអតីតតារាកំប្លែងគួរកុំទាន់ចេញប្រោសញាតិញោមតាមរយៈសំដែងធម៌ក្នុងខណៈពេលដែលការបដិបត្តិ និងការសិក្សានៅទន់ជ្រាយនៅឡើយ។

លិខិតចំហនេះ បានចេញតែប៉ុន្មានថ្ងៃបន្ទាប់ពីព្រះតេជគុណតាក់ស៊ី ត្រូវបានគេឃើញថា បានចេញសម្ដែងធម៌ ក្រោយពីទើបបានបួសរៀនបានប៉ុន្មានថ្ងៃប៉ុណ្ណោះ ជាហេតុធ្វើឲ្យសាធារណជនមើលឃើញថា ព្រះតេជគុណ តាក់ស៊ី កំប្លែងច្រើនជាងសម្ដែងធម៌។

តបនឹងបញ្ហានេះ អតីតតារាកំប្លែងរបស់ ស៊ីធីអិន បានធ្វើកិច្ចសន្យាចំពោះព្រះភ័ក្ដ្រមេគុណខេត្ត គឺព្រះមុនីសត្ថាចារ្យកោសល កែវ ចន្ថា និងសង្ឃគ្រប់ថានានុក្រម ដោយខ្លឹមសារសម្រេចដូចតទៅ៖ ១.ឈប់ចេញសម្ដែងធម៌មួយរយៈពេល។ ទី២. ឈប់សម្ដែងធម៌ទេសនាដោយប្រើកាយវិការមិនសមជាសាមណៈ ឬប្រើសំឡេងដូចអ្នកកំប្លែង និងទី៣. គឺរហូតដល់ខ្ញុំព្រះករុណា បួសបានយូរគួរសម និងរៀនព្រះធម៌វិន័យរបស់ព្រះពុទ្ធសាសនាបានច្រើន។

នៅក្នុងខ្លឹមសារបន្តដែលមានក្នុងកិច្ចសន្យាដដែល ព្រះតេជគុណ តាក់ស៊ី បានសន្យាទៀតថា នឹងទទួលការដាក់ទោសតាមច្បាប់ និងព្រមឲ្យព្រះមេគុណខេត្ត មន្ត្រីសង្ឃគ្រប់ឋានៈ និងប្រធានមន្ទីរធម្មការ និងសាសនាខេត្តកំពង់ស្ពឺ មានវិធានការណ៍តាមព្រះធម៌វិន័យរបស់ព្រះពុទ្ធសាសនា៕

អត្ថបទ៖ ទារិកា