ក្រុមជើងខ្លាំងមកពីឧត្តរមានជ័យ លើកពាន Tiger Street Football 2020 នៅសៀមរាប

2020-01-21 03:01:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រោយពីធ្វើការប្រកួតរយៈពេល៣ថ្ងៃ ពានរង្វាន់ Tiger Street Football 2020 មណ្ឌលសៀមរាប ដែលមានរហូតដល់ ១១៩ក្រុមនោះ បានរកឃើញជើងឯកហើយ គឺក្រុម Samrong FC មកពីឧត្តរមានជ័យ។

ក្រុម Samrong FC

ក្រុម Somrong FC បានយកឈ្នះក្រុមជើងខ្លាំងម្ចាស់ផ្ទះ Kiridongrek ដោយលទ្ធផល ៣-០ ក្នុងវគ្គផ្ដាច់ព្រ័ត្រ ខណៈការប្រកួតដណ្ដើមចំណាត់ថ្នាក់លេខ៣ ក្រុម The Brother FC បានយកឈ្នះក្រុម Fratelo FC (B) ដោយលទ្ធផល ១-០។

ក្រោយការប្រកួត លោក ហួត លាងហឹម ប្រធានក្រុម Samrong FC បាននិយាយថា៖ “យើងមិនអាចប្រាប់បច្ចេកទេសលេងច្រើនទេ ប៉ុន្តែអ្វីដែលច្បាស់គឺយើងលេងជាមួយគ្នា ១០ឆ្នាំមកហើយ។ បើទោះជាក្រុមយើងមកពីឆ្ងាយហើយនឿយហត់យ៉ាងណាក្ដី ប៉ុន្តែដោយសារតែក្នុងចិត្តជាអ្នកកីឡាចង់ឈ្នះ ទើបធ្វើឱ្យការលេងរបស់ក្រុមមិនហត់ឡើយទោះលេងជាប់ៗគ្នាក៏ដោយ”។

ហួត លាងហឹម ប្រធានក្រុម Samrong FC

សម្រាប់ប្រាក់រង្វាន់ដែលទទួលបានគឺ ក្រុមលេខ១ Samrong FC បាន ១៥០០ដុល្លារ ក្រុមលេខ២ Kiridongrek បាន ១០០០ដុល្លារ ក្រុមលេខ៣ The Brother FC បាន ៥០០ដុល្លារ និងក្រុមលេខ៤ Fratelo FC (B) ទទួលបាន ២០០ដុល្លារ។ ក្រុមទាំង៤នេះ រួមជាមួយក្រុម ៨ផ្សេងទៀត នៅមណ្ឌលសៀមរាប នឹងមានឱកាសបានឡើងទៅលេងវគ្គផ្ដាច់ព្រ័ត្រនៅរាជធានីភ្នំពេញ ចាប់ពីថ្ងៃទី ២៩ កុម្ភៈ ដល់១មីនាឆ្នាំ២០២០។

ក្រោយពីចប់មណ្ឌលសៀមរាបនេះហើយ Tiger Street Football 2020 នឹងធ្វើដំណើរទៅកាន់មណ្ឌលប៉ោយប៉ែតបន្ដទៀត ដោយឈប់ទទួលពាក្យក្រុមចូលប្រកួតនៅថ្ងៃ ២២ ខែមករា ឆ្នាំ២០២០ ហើយចាប់ផ្ដើមប្រកួតនៅថ្ងៃទី២៥-២៦ ខែមករា ឆ្នាំ២០២០៕