ធនាគារ EU ចុះកិច្ចព្រមព្រៀងផ្តល់កម្ចី ៦០លានដុល្លារឱ្យកម្ពុជា សម្រាប់ «គម្រោងសាងសង់រោងចក្រប្រព្រឹត្តកម្មទឹកស្អាតបាក់ខែង»

2019-06-21 02:47:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ហែម វណ្ណឌី អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ តំណាងរាជរដ្ឋាភិបាលកម្ពុជា បានចុះហត្ថលេខាលើកិច្ចព្រមព្រៀងឥណទានសម្បទាន ដែលមានទឹកប្រាក់ចំនួន ៦០លានដុល្លារអាមេរិក ជាមួយតំណាងស្របច្បាប់ធនាគារវិនិយោគអឺរ៉ុប (EIB) សម្រាប់ការអនុវត្ត «គម្រោងសាងសង់រោងចក្រប្រព្រឹត្តកម្មទឹកស្អាតបាក់ខែង» កាលពីថ្ងៃទី១៨ ខែមិថុនា ឆ្នាំ២០១៩ នៅទីស្នាក់ការកណ្តាលរបស់សហភាពអឺរ៉ុប នាទីក្រុងព្រុចសែល ប្រទេសបែលហ្សិក។ នេះបើតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ។

រូបថត៖ ក្រសួងសេដ្ឋកិច្ច និងហិរញ្ញវត្ថុ

គម្រោងនេះ មានរយៈពេលអនុវត្តចំនួន៤ឆ្នាំ ចាប់ពីឆ្នាំ២០១៩ ដល់ ២០២២ និងមានគោលដៅបង្កើនសមត្ថភាពផលិតទឹកស្អាតបន្ថែមរបស់រដ្ឋាករទឹកស្វយ័តក្រុងភ្នំពេញក្នុងបរិមាណ១៩៥ ០០០ម៉ែត្រគូបក្នុងមួយថ្ងៃ នៅក្នុងឆ្នាំ២០២២ បន្ថែមលើសមត្ថភាពផលិតដែលមានស្រាប់បច្ចុប្បន្ន ៥៦០ ០០០ម៉ែត្រគូបក្នុងមួយថ្ងៃ។

គម្រោងនេះ មានទឹកប្រាក់សរុបចំនួន ២៤៧លានដុល្លារ ក្នុងនោះឥណទានសម្បទានពីទីភ្នាក់ងារបារាំងសម្រាប់អភិវឌ្ឍន៍ (AFD) ចំនួន ៨៥លានដុល្លារអាមេរិក, ឥណទានសម្បទានសរុបពី EIB ចំនួន ១០០លានដុល្លារអាមេរិក, ហិរញ្ញប្បទានឥតសំណងពីសហគមន៍អឺរ៉ុប ចំនួន១៥លានដុល្លារអាមេរិក និងថវិកាបដិភាគរបស់រដ្ឋាករទឹកស្វយ័តក្រុងភ្នំពេញចំនួន ៤៧លានដុល្លារអាមេរិក។

រដ្ឋាករទឹកស្វយ័តក្រុងភ្នំពេញ គឺជាភ្នាក់ងារប្រតិបត្តិការគម្រោងខាងលើនេះ និងជាអ្នកខ្ចីបន្តពីរាជរដ្ឋាភិបាលកម្ពុជា៕

អត្ថបទ៖ សំភី