តើលោក ជីវ តាក្វាន់ ធ្លាប់រៀបរាប់អ្វីខ្លះអំពីប្រមាត់ប្រមង់?

2020-01-15 01:22:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រមាត់ប្រមង់ គឺជាពាក្យដែលពលរដ្ឋខ្មែរភាគច្រើនធ្លាប់បានឮ តែយ៉ាងណាមិញគេមិនសូវដឹងប្រវត្តិច្បាស់ឡើយថាវាកើតឡើងយ៉ាងដូចម្ដេចឲ្យពិតប្រាកដនោះទេ។ ថ្ងៃនេះ ខ្លីៗ សូមលើកយកការព័ណ៌នាខ្លះៗរបស់លោក ជីវ តាក្វាន់ អំពីប្រមាត់ប្រមង់ ដូចខាងក្រោម៖

បើតាមកំណត់ហេតុរបស់បេសកទូតចិនលោក ជីវ តាក្វាន់ បានសរសេររៀបរាប់ថា៖ "កាលពីមុនតែដល់ខែ៨ គេតែងធ្វើការចាប់មនុស្សយកប្រមាត់ ពីព្រោះស្ដេចក្រុងចាម្បក្នុង១ឆ្នាំគេសុំយកប្រមាត់មនុស្ស១ថូដែលមានចំនួនរាប់ពាន់។ នៅពេលយប់គេចាត់ពួកអ្នកយកប្រមាត់ (ប្រមាត់ប្រមង់) ដើរទៅតាមផ្លូវនានាក្នុងទីក្រុង និងក្នុងភូមិ។ បើប្រទះមនុស្សណាដើរក្នុងពេលយប់ស្ងាត់នោះ គេចាប់យកខ្សែចងក្បាលឲ្យជាប់ ហើយយកកូនកាំបិតចាក់ក្រោមក្លៀកខាងស្ដាំ ខ្វេះយកប្រមាត់ដាក់ក្នុងថូលុះត្រាតែបានចេញចំនួន ទើបគេយកទៅថ្វាយស្ដេចក្រុងចាម្ប"។

ក្នុងកំណត់ហេតុនោះបានបន្តថា៖ "ប៉ុន្តែគេមិនយកប្រមាត់នៃជនជាតិចិនទេ ពីព្រោះមានកាលមួយឆ្នាំនោះគេយកប្រមាត់របស់ចិនមួយទៅលាយនឹងគេ ក៏បណ្ដាលឲ្យស្អុយរលួយខូចប្រមាត់នៅក្នុងថូលែងប្រើការបានទាំងអស់ ពេលក្រោយមកគេលែងមានការដើរចាប់យកប្រមាត់ទៀតហើយ ហើយគេចាត់មន្ត្រីដោយឡែកសម្រាប់មុខងារខាងយកប្រមាត់ពីពួកក្រោមអំណាចខ្លួន ដែលតាំងឲ្យនៅជាយក្រុងក្បែរទ្វារខាងជើង"។

សូមបញ្ជាក់ថា នៅឆ្នាំ១២៩៦ បេសកទូតជនជាតិចិនមួយរូបឈ្មោះ ជីវ តាក្វាន់ (ZHOU DAGUAN: 1266-1346) បានមកធ្វើទស្សនកិច្ចនៅរាជធានីអង្គរ ហើយលោកបានកត់ត្រាព្រឹត្តិការណ៍នានានៅក្នុងប្រទេសកម្ពុជានាសម័យនោះ។ កំណត់ត្រារបស់លោកដែលមានចំណងជើងថា៖ "ប្រពៃណីនៃអ្នកស្រុកចេនឡា" បានក្លាយជាមូលដ្ឋានប្រវត្តិសាស្ត្រយ៉ាងសំខាន់មួយសម្រាប់កម្ពុជា។ ដោយយល់ឃើញពីសារៈសំខាន់របស់ឯកសារនេះទើបនាឆ្នាំ១៩៧៣ លោក លី ធាមតេង បានព្យាយាមបកប្រែឯកសារនេះមកជាភាសាខ្មែរ ដើម្បីទុកជាឯកសារគោលសំខាន់មួយ សម្រាប់ឲ្យជនជាតិខ្មែរយល់ពីកំណត់ត្រារបស់ជនជាតិចិនរូបនេះ៕

ដកស្រង់ចេញពីឯកសារ "លី ធាមតេង៖ កំណត់ហេតុរបស់ជីវតាក្វាន់អំពីប្រពៃណីនៃអ្នកស្រុកចេនឡា ឆ្នាំ១៩៧៣"

អត្ថបទ៖ ឈាង.