សម្ដេច ស ខេង៖ ឆ្នាំ២០២០ កម្ពុជាត្រូវដើរតួនាទីយ៉ាងសំខាន់ដើម្បីសម្រេចកិច្ចការធំៗរបស់ជាតិ

  • 2020-01-29 06:35:19
  • ចំនួនមតិ 0 | ចំនួនចែករំលែក 0

ចន្លោះមិនឃើញ


សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានថ្លែងថា​នៅ​ក្នុង​ឆ្នាំ​២០២០ នេះ ក្រសួង​មហា​ផ្ទៃ​ត្រូវ​ចូលរួម​នឹង​ដើរតួនាទី​យ៉ាង​សំខាន់​ក្នុង​ការ​គ្រប់គ្រង​សភាពការណ៍​ដើម្បី​ឲ្យ​កិច្ចការ​ធំៗ​របស់​ជាតិ ប្រព្រឹត្ត​ទៅបានជោគជ័យដូចជា កិច្ចប្រជុំកំពូលអាស៊ី-អឺរ៉ុប លើកទី១៣ ដែល​នឹង​ប្រព្រឹត្ត​ទៅ​នៅ​ថ្ងៃ​ទី១៦-១៧ ខែវិច្ឆិកា ឆ្នាំ២០២០ នៅរាជធានីភ្នំពេញ។ កិច្ចប្រជុំកំពូលអាស៊ី-អឺរ៉ុប គឺ​ជាព្រឹត្តិការណ៍​មួយយ៉ាងធំ ដែលកម្ពុជាធ្វើជាម្ចាស់ផ្ទះ។ ការថ្លែងនេះ ធ្វើឡើង​នៅ​ក្នុង​ពិធី​ប្រគល់​រថយន្ដ​ជូនស្នងការនគរបាលរាជធានី-ខេត្ត នៅ​ថ្ងៃទី២៩ ខែមករា ឆ្នាំ២០២០ នៅ​ទីស្តី​ការ​ក្រសួង​មហាផ្ទៃ។

សម្តេចក្រឡាហោម ស ខេង បានបញ្ជាក់ថា កិច្ចប្រជុំកំពូលអាស៊ី-អឺរ៉ុប មានការចូលរួមពីប្រមុខរដ្ឋ រដ្ឋាភិបាល និងតំណាងមន្ត្រីជាន់ខ្ពស់នៃប្រទេសក្នុងតំបន់អាស៊ី និងអឺរុប។ យើង​ត្រូវ​ខិតខំ​ប្រឹងប្រែង​រក្សា​សន្តិសុខ សុវត្ថិភាព ដល់ព្រឹត្តិការណ៍ដ៏សំខាន់នេះ។ កិច្ចប្រជុំកំពូលអាស៊ី-អឺរ៉ុប លើកទី១៣ នេះ​ នឹងប្រព្រឹត្តទៅនៅថ្ងៃទី១៦-១៧ ខែវិច្ឆិកា ឆ្នាំ​២០២០ នៅរាជធានីភ្នំពេញ ក្រោមមូលបទ «ការ​ពង្រឹង​ពហុភា​គី​និយមដើម្បីកំណើនរួមគ្នា» ។

កម្ពុជា​ក៏​នឹងរៀបចំព្រឹត្តិការណ៍ក្រៅកិច្ចប្រជុំកំពូលចំនួន ០៧ រួមមាន៖ (១) កិច្ច​ប្រជុំ​ភាព​ជា​ដៃ​គូ​សភា​អាស៊ី-អឺរ៉ុប (២) វេទិកាសេដ្ឋកិច្ច និងធុរកិច្ចអាស៊ី-អឺរ៉ុប (៣) កិច្ច​ប្រជុំ​កំពូល​ថ្នាក់​ដឹកនាំ​វ័យក្មេង​មូល​និធិ​អាស៊ី-អឺរ៉ុប (៤) វេទិកាតុមូលនិពន្ធនាយកមូលនិធិអាស៊ី-អឺរ៉ុប (៥) វេទិកាការងារអាស៊ី-អឺរ៉ុប (៦) វេទិកា​ប្រជាជនអាស៊ី-អឺរ៉ុប និង (៧) មហោស្រពវប្បធម៌កិច្ចប្រជុំអាស៊ី-អឺរ៉ុប។

កិច្ចប្រជុំអាស៊ី-អឺរ៉ុប ជាវេទិកាសន្ទនាដែលមានគោលដៅជំរុញ និង​លើក​ស្ទួយ​កិច្ច​សហប្រតិបត្តិការ​ជិតស្និទ្ធ​រវាង​ប្រទេសអាស៊ី និងអឺរ៉ុប ដែលឈរលើគោលការណ៍ស្មើភាពគ្នា និងដើម្បីប្រយោជន៍រួម។ សមាជិកនៃវេទិកានេះមានប្រទេសអាស៊ី និងអឺរ៉ុបសរុបទាំងអស់ ៥១ បូក​ជាមួយ​លេខាធិការដ្ឋាន​អា​ស៊ាន និង សហភាពអឺរ៉ុប។ នេះ​គឺជាលើកទី១ ហើយ តាំងពីឆ្នាំ ១៩៩៦មក ដែល​កម្ពុជា​បាន​ទទួល​ធ្វើ​ជាម្ចាស់​ផ្ទះ​កិច្ចប្រជុំ​កំពូល​អាស៊ី​អឺរ៉ុប ដែលរៀបចំធ្វើ ២ឆ្នាំម្តង។

កិច្ច​ប្រជុំ​នេះ គឺ​ជាការ​បើកផ្លូវ​ឲ្យមាន​ជំនួប​ពិភាក្សា​ក្នុង​ក្របខណ្ឌ​តំបន់ និងសកលលោកទាំងមូល រួមមានទាំងបញ្ហានយោបាយ ការទូត ការអភិវឌ្ឍ បរិស្ថាន អាកាសធាតុ ការលើកកម្ពស់សមភាពស្រ្តី និងកុមារី ការផ្សារភ្ជាប់ទំនាក់ទំនងរវាងអាស៊ី និង​អឺរុប សន្តិសុខ ការទប់ស្កាត់ភេរវកម្ម ជនអន្តោប្រវេសន៍ សេដ្ឋកិច្ច ការវិនិយោគ ទេសចរណ៍ និង​បច្ចេក​វិទ្យាព័ត៌មានវិទ្យាជាដើម៕

អត្ថបទ៖ ម៉េងងី

អត្ថបទថ្មី
;