ផលិតកម្មធំៗក្នុងស្រុក ប្រឈមបិទទ្វារឆាប់ៗ ប្រសិនរោងកុននៅតែបន្តបិទរយៈពេលយូរទៀត

2020-06-25 08:03:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ផលិតករភាពយន្ត និងម្ចាស់រោងភាពយន្តនៅកម្ពុជា ស្នើឲ្យរាជរដ្ឋាភិបាលពិចារណារកលទ្ធភាពបើករោងកុនឡើងវិញ មុនពេលជំនួញពួកគេត្រូវក្ស័យធន ឬបិទទ្វារបណ្ដោះអាសន្នក្នុងរយៈពេលដ៏ខ្លីខាងមុខនេះ។

អ្នកគ្រប់គ្រងផលិតកម្ម អិល ឌី លោក លៀក លីដា ប្រាប់ថា បើក្រុមហ៊ុនលោកនៅតែមិនអាចរកចំណូលបានអ្វីសោះតែកន្លះខែទៀត នោះលោកនឹងបិទក្រុមហ៊ុនបណ្ដោះអាសន្ន ពោលគឺត្រូវរង់ចាំរហូតដល់រោងភាពយន្ដបើកឲ្យដំណើរការឡើងវិញទើបលោកគិតទៀត។ បច្ចុប្បន្នលោកអស់លទ្ធភាពបើកប្រាក់ខែឲ្យបុគ្គលិកគ្រប់ចំនួន ដោយនៅឧសភា និងខែមិថុនា បើកឲ្យតែ៦០% សិនប៉ុណ្ណោះ។

លោក លៀក លីដា៖" ខ្ញុំមានបុគ្គលិកពេញសិទ្ធិ៥០នាក់ ហើយប្រាក់ខែសុទ្ធតែល្អៗ ដែលចំណាយប្រចាំខែរង្វង់៣ម៉ឺនដុល្លារ ហើយបើរោងកុននៅតែមិនទាន់បើក ឬស្ថានភាពនេះនៅតែអូសបន្លាយទៀត ខ្ញុំជឿថាត្រឹមពាក់កណ្ដាលខែ៧ដួលហើយ"។

បច្ចុប្បន្នផលិតកម្ម អិល ឌី មានខ្សែភាពយន្តខ្នាតធំសម្រាប់បញ្ចាំងតាមរោង៦ រឿងក្នុងដៃ គឺរង់ចាំតែថ្ងៃចាក់បញ្ចាំងប៉ុណ្ណោះ។ រីឯរឿងមួយចំនួនទៀត ថតបានតែពាក់កណ្ដាលក៏ផ្អាកទៅវិញ ដោយសារកញ្ចប់ថវិកាភាគច្រើនបានចំណាយទៅលើថ្លៃជួលតួសម្ដែងរឿងមុនៗអស់ហើយ ហើយថវិកាមួយភាគទៀតត្រូវចំណាយបើកឲ្យបុគ្គលិកប្រចាំខែ តាំងពីបាត់ចំណូលតាំងពីខែមករា ឆ្នាំ២០២០ មក។

ចំណែកម្ចាស់ផលិតកម្ម មហាហង្ស លោក អិន សុភិន និយាយថា បើទោះបីជារោងភាពយន្តបើកឲ្យដំណើរការឡើងវិញក៏លោកមិនសង្ឃឹមថានឹងមានមនុស្សចូលទស្សនាច្រើនដែរ ព្រោះគេនៅខ្លាចជំងឺកូវីដ-១៩។ ប៉ុន្ដែលោកថាប្រសើរជាងបិទទាំងស្រុងដូចសព្វថ្ងៃ ព្រោះយ៉ាងហោចទាំងផលិតករ និងម្ចាស់រោងកុនទទួលបានចំណូលខ្លះគ្រាន់ដោះស្រាយបញ្ហាប្រឈមនានាក្នុងគ្រាដ៏លំបាកនេះ។

លោក អិន សុភិន បញ្ជាក់ថា ផលិតកម្មលោកមានរឿងចំនួន៧ នៅក្នុងដៃ ហើយក្នុង១រឿងចំណាយមិនក្រោម៣ម៉ឺនដុល្លារឡើយ ដើម្បីសម្រេចបាន។ ប៉ុន្តែឥឡូវលុយត្រូវកប់នៅក្នុងរឿងទាំងនោះ ហើយចំណូលពីការបញ្ចាំងរឿងក៏គ្មាន។ បញ្ហានេះនឹងជំរុញឲ្យលោកកាត់បុគ្គលិកខ្លះ ឬត្រូវបិទទ្វាបណ្ដោះអាសន្នក្នុងរយៈពេល២ខែខាងមុខទៀតនេះ ហើយរង់ចាំរហូតដល់ស្ថានការណ៍ប្រសើរសិន។

ផលិតមួយរូបទៀត គឺលោក ហ៊ុយ យ៉ាឡេង ដែលត្បិតថា ពេលនេះ មិនទាន់មានរឿងដែលផលិតរួចនៅក្នុងដៃ ប៉ុន្តែលោកនៅតែទទូចចង់មានការបើកឡើងវិញនូវរោងភាពយន្តកន្លែងដែលផលិតករភាពយន្តអាចប្រមូលទុនមកវិញក្រោយបានវិនិយោគ។

លោកលើកឡើងថា សម្រាប់លោកដែលធ្វើជាលក្ខណៈ ឯកត្តជន មិនជាបញ្ហាចោទ ប៉ុន្តែដូចករណីផលិតករភាពយន្ត២រូបខាងលើ ក្នុងនាមជាក្រុមហ៊ុន គឺពួកគេជួបការលំបាកច្រើន នឹងឈានទៅដល់ការដួលរលំ ប្រសិនបើរោងកុននៅតែបន្តបិទទ្វារ។ ដូច្នេះហើយ លោកសង្ឃឹមថា ចំណាត់ការឲ្យដំណើររោងភាពយន្តឡើងវិញ នឹងកើតមានឆាប់ៗ ក្នុងនោះបើទោះត្រូវទទួលយកលក្ខខណ្ឌសុវត្ថិភាពបែបណាក៏ដោយ។

ទាក់ទងបញ្ហានេះម្ចាស់រោងកុនល្បីឈ្មោះមួយនៅកម្ពុជា ដែលជាដៃគូយ៉ាងសកម្មជាមួយផលិតករ ដើម្បីរកចំណូលពីវិស័យភាពយន្ត បានបង្ហើបថា រោងកុនលោកបានត្រៀមខ្លួនជាស្រេចក្នុងការបើកទ្វាឡើងវិញ ប្រសិនបើមានការអនុញ្ញាតពីរាជរដ្ឋាភិបាល។ ការត្រៀមខ្លួននោះ គឺសំដៅដល់ការរង់ចាំទទួលវិធានការផ្សេងៗ ឬសេចក្ដីណែនាំថ្មីស្ដីពីការពារពីមេរោគកូវីដ-១៩ ។

លោកបញ្ជាក់ថា ការអនុវត្តវិធានការវាស់កម្ដៅ លាងដៃនឹងអាល់កុល និងដាក់កៅអីអង្គុយទស្សនានៅឃ្លាតឆ្ងាយពីគ្នា ត្រូវបានអនុវត្តតាំងពីមុនពេលក្រសួងប្រកាសឲ្យផ្អាកភ្លាមៗមកម្ល៉េះ។ លោកចង់ឃើញអាជីវកម្មលើវិស័យភាពយន្តដំណើរការឡើងវិញ ព្រោះការដាក់បញ្ចាំងនូវរឿងល្បីៗ ជាពិសេសរឿងខ្មែរ គឺដូចជាបានលើកទឹកចិត្តផលិតករផង និងលើកកម្ពស់វិស័យភាពយន្តខ្មែរផង។

កម្ពុជា និងប្រទេសមួយចំនួនទៀតក្នុងតំបន់ បូករួមទាំងប្រទេសជាច្រើនលើពិភពលោកបានរងការគំរាមកំហែងខ្លាំងពីមេរោគ ខូវីដ ១៩ ចាប់តាំងពីដើមឆ្នាំ ២០២០នេះមក ដែលក្នុងប្រទេសខ្លះបានប្រកាសបិទប្រទេស ដើម្បីទប់ស្កាត់ការរីករាលដាលនៃជំងឺសាហាវនេះ ដោយបានធ្វើឲ្យសេដ្ឋកិច្ចក្នុងប្រទេសស្ទើរជាប់គាំងទាំងស្រុង។

យ៉ាងណា ថៃ ដែលជាប្រទេសក្បែរខាងកម្ពុជា និងប្រទេសដែលមានអ្នកឆ្លងខូវីដ១៩ច្រើនជាងគេលេខរៀងទី៤នៅក្នុងតំបន់អាស៊ានបន្ទាប់ពី ឥណ្ឌូណេស៊ី សាំងហ្គាពួរ និងភីលីពីន បានបើកចំហរផ្នែកខ្លះឡើងវិញហើយ ដើម្បីសម្រួលលំហូរសេដ្ឋកិច្ច។ ២ថ្ងៃមុននេះ ប្រទេសរបស់លោក ប្រាយុទ្ធ ចាងអ៊ូចា បានឲ្យដំណើររោងភាពយន្តឡើងវិញ ប៉ុន្តែត្រូវអនុវត្តតាមគោលការណ៍សុវត្ថិភាពនានារបស់ក្រសួងពាក់ព័ន្ធ។ ក្រៅពីនេះ ប្រទេសក្បែរខាងកម្ពុជាមួយទៀត គឺវៀតណាម ក៏មានដំណឹងថា បានអនុញ្ញាតិឲ្យបើកដំណើររោងភាពយន្តឡើងវិញ ជាមួយលក្ខខណ្ឌសុវត្ថិភាពដូចគ្នាដែរ។

ដើម្បីសម្រួលលើបញ្ហារោងភាពយន្ត ក៏ដូចជាសម្រួលការលំបាកផលិតករដែលជាប់គាំងផលិតផលភាពយន្តផលិតរួច មិនអាចរកកន្លែងដាក់បញ្ចាំងបាន នាយកដ្ឋានភាពយន្ត ក៏មានដំណឹងថា បានរៀបចំឯកសារត្រៀមដាក់ជូនសម្ដេចនាយករដ្ឋមន្ត្រី ហ៊ុន សែន ពិនិត្យ និងសម្រេច។ យ៉ាងណាក៏ដោយជំុំវិញបញ្ហានេះ លោក ប៉ុក បូរក្ស ប្រធាននាយកដ្ឋានភាពយន្ត និងផ្សព្វផ្សាយវប្បធម៌មិនអាចសុំការអធិប្បាយបានទេនៅរសៀលថ្ងៃម្សិលមិញ។

រាជរដ្ឋាភិបាលកម្ពុជា តាមរយៈក្រសួងសុខាភិបាល បានប្រកាសឲ្យបិទ KTV និងរោងភាពយន្តទូទាំងប្រទេស កាលពីថ្ងៃទី១៧ ខែមីនា ឆ្នាំ២០២០ ដើម្បីទប់ស្កាត់ការឆ្លងរាតត្បាតជាសកល នៃមេរោគកូវីដ-១៩។ សំឡឹងមើលពីស្ថានភាពបច្ចុប្បន្នរបស់កម្ពុជាចំពោះករណី ខូវីដ ១៩ គិតត្រឹមម៉ោង ៧ព្រឹកថ្ងៃទី ២៤ម្សិលមិញ កម្ពុជាមានករណីវិជ្ជមានខូវីដ១៩សរុបចំនួន ១៣០នាក់ ស្ត្រី ៣៩នាក់ បុរស ៩១នាក់) ក្នុងនោះ កម្ពុជាបានព្យាបាលជាសះស្បើយអ្នកជំងឺខូវីដ១៩ចំនួន ១២៨ នាក់ នាំឲ្យអ្នកជំងឺដែលបាន និងកំពុងទទួលយកការព្យាបាលសល់ត្រឹម ២នាក់ប៉ុណ្ណោះ។

ក្រៅពីនេះ កម្ពុជា ក៏បានបង្ហាញឲ្យពីប្រសិទ្ធភាពនៃការទប់ស្កាត់ជំងឺ មិនឲ្យមានតួលេខហក់ឡើងខ្ពស់ដូចកាលពីដំបូង ក្នុងរយៈពេលប្រមាណជាង១ខែមកហើយ ដោយក្នុងកំឡុងពេលនោះ គឺកម្ពុជាមានករណីវិជ្ជមានខូវីដ១៩ តែត្រឹម៣ករណីប៉ុណ្ណោះ សុទ្ធជាករណីនាំចូលពីបរទេស។

មើលឃើញស្ថានភាពប្រសើរឡើងនេះ ផលិតករភាពយន្តក្នុងស្រុក បានដាក់ក្ដីសង្ឃឹមខ្ពស់ថា រោងភាពយន្តនឹងត្រូវលើកយកមកពិភាក្សាដើម្បីឈានទៅដាក់ឲ្យដំណើរការឡើងវិញឆាប់ៗ ក្រោយពីរាជរដ្ឋាភិបាល ក៏បានដកបម្រាមផ្នែកខ្លះដើម្បីសម្រួលដល់ដង្ហើមសេដ្ឋកិច្ចប្រទេស ដូចករណីការសម្រេចឲ្យបើកដំណើរការសារមន្ទីរជាតិកាលពីខែមុនជាដើម។

បែបនេះក្ដី ចំពោះបញ្ហាខាងលើ លោកជំទាវ ឱ វណ្ណឌីន អ្នកនាំពាក្យក្រសួងសុខាភិបាលឆ្លើយតបតាមតេឡេក្រាមកាលពីថ្ងៃមុនថា ត្បិតថាពេលនេះកម្ពុជាស្ថានភាពខូវីដ១៩ហាក់ល្អប្រសើរក៏ពិតមែន ប៉ុន្តែពិភពលោកទាំងមូលនៅតែរងការគំរាមកំហែងខ្ពស់នៅឡើយ។ ដូច្នេះហើយ លោកជំទាវថ្លែងថា ក្នុងពេលនេះ រោងភាពយន្តទំនងមិនទាន់អាចដំណើរការបានទេ។ យ៉ាងណាលោកជំទាវបញ្ជាក់ថា អ្វីៗគឺអាស្រ័យគណៈកម្មការអន្តរក្រសួងជាអ្នកសម្រេចឯណោះទេ។

យោងតាមតួលេខរបស់ Worldometer ដែលសារព័ត៌មានចេញផ្សាយកាលពីថ្ងៃទី ១៦ មិថុនា បានឱ្យដឹងថាករណីឆ្លងវីរុសកូវីដ១៩ បានកើនឡើងដល់ ៨ ១០៨ ៦៦៧ នាក់នៅទូទាំងពិភពលោក ខណៈដែលមានអ្នកស្លាប់ចំនួន ៤៣៨ ៥៩៦ នាក់។

ស្ថានភាពនៅតែផុយស្រួយបែបនេះ ប្រធានអង្គការសុខភាពពិភព WHO លោក Tedros Adhanom Ghebreyesusបានក្រើនរំលឹកថា នេះមិនទាន់ជាពេលដែលប្រទេសណាមួយក្នុងពិភពលោកត្រូវបន្ធូរដៃ ឬព្រងើយកន្តើយពី ខូវីដ១៩នោះទេ៕

អត្ថបទ៖ ជិន សុភ័ក្ដ្រ