ភ្ញាក់ផ្អើលខ្លាំង ពេលដឹងថាប្រទេសនេះមានពីឡុតប្រើបណ្ណបើកបរយន្តហោះក្លែងក្លាយច្រើន

2020-06-29 07:21:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ជាង ៣០% នៃពីឡុតស៊ីវិលក្នុងប្រទេសប៉ាគីស្ថាន បានប្រើប្រាស់បណ្ណបើកបរយន្តហោះក្លែងក្លាយ ហើយពិតជាមិនស័ក្តិសមក្នុងការបើកយន្តហោះឡើយ។

លោក Ghulam Sarwar Khan រដ្ឋមន្រ្តីក្រសួងអាកាសចរណ៍នៃប្រទេសប៉ាគីស្ថាន បានថ្លែងក្នុងសភាកាលពីសប្តាហ៍មុនថា ពីឡុតចំនួន ២៦២នាក់ ក្នុងប្រទេស បានជួលគេឱ្យប្រឡងបើកបរយន្តហោះជំនួសខ្លួន ដោយពួកគេពុំមានបទពិសោធន៍ហោះហើរឡើយ។

លោកបានឱ្យដឹងថា ក្នុងប្រទេសប៉ាគីស្ថាន មានពីឡុតសកម្មចំនួន ៨៦០នាក់ ដែលធ្វើការងារឱ្យក្រុមហ៊ុនអាកាសចរណ៍ក្នុងស្រុក និងបរទេស។

ក្រុមហ៊ុនអាកាសចរណ៍អន្តរជាតិនៃប្រទេសប៉ាគីស្ថាន (PIA) បានផ្អាកការងាររបស់ពីឡុតណាដែលកាន់បណ្ណបើកបរក្លែងក្លាយ។ អ្នកនាំពាក្យក្រុមហ៊ុនបញ្ជាក់ថា ការប្រើប្រាស់បណ្ណបើកបរក្លែងក្លាយនោះ មិនមែនត្រឹមតែជាបញ្ហារបស់ក្រុមហ៊ុនខ្លួនឡើយ ពោលគឺក្នុងវិស័យអាកាសចរណ៍របស់ប្រទេសទាំងមូលតែម្តង។

គួររំលឹកថា កាលពីខែឧសភាកន្លងទៅ មានយន្តហោះមួយគ្រឿងរបស់ក្រុមហ៊ុន PIA បានធ្លាក់នៅភាគខាងត្បូងក្រុងការ៉ាឈី បណ្តាលឱ្យមនុស្សស្លាប់ ៩៧នាក់។ ប៉ុន្តែក្រុមហ៊ុនមិនបានបញ្ជាក់ទេថា ពីឡុតដែលបើកយន្តហោះនេះ កាន់បណ្ណបើកបរក្លែងក្លាយ ឬយ៉ាងណា។ យ៉ាងណាមិញ បើតាមរបាយការណ៍ស៊ើបអង្កេត ឱ្យដឹងថា ពីឡុតទាំងពីរនោះ បាននឹងកំពុងជជែកគ្នាពីជំងឺកូរ៉ូណា ដោយមិនខ្វល់ពីការព្រមានរបស់អ្នកគ្រប់គ្រងចរាចរណ៍លើអាកាស មុនពេលយន្តហោះធ្លាក់៕

ប្រភព៖ CNN