នគរបី សាមកុក៖ ផ្នូររបស់ឆាវឆាវ ត្រូវគេរកឃើញ ចុះផ្នូររបស់ លីវ ប៉ី និង ស៊ុន ឈាន?

2020-08-04 09:21:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងសម័យកាលចុងរាជវង្សហាន ប្រទេសចិន មានការបែងចែកតំបន់គ្រប់គ្រង៣ធំៗ ហើយធ្វើសង្គ្រាមរវាងគ្នាទៅវិញទៅមក ដោយមួយផ្នែកក្រោមការគ្រប់គ្រងរបស់ឆាវឆាវ ដែលជាឧបរាជ, មួយផ្នែកគ្រប់គ្រងដោយ លាវ ប៉ី និងមួយផ្នែកទៀតគ្រប់គ្រងដោយ ស៊ុន ឈាន។ ចម្បាំងរវាងភាគីទាំង៣ ដ៏ល្បីបំផុតក្នុងប្រវត្តិសាស្រ្ត គឺ សង្គ្រាមឆឺពី (Battle of Red Cliffs) ក្នុងឆ្នាំ២០៨នៃគ.ស។

ផែនទីនៃនគរទាំង៣

ឆាវឆាវ បានស្លាប់ក្នុងឆ្នាំ២២០ នៅអាយុ ៦៥ឆ្នាំ ហើយក៏ជាពេលដែលរាជវង្សហានត្រូវបញ្ចប់ទាំងស្រុង ដោយកូនប្រុសរបស់ឆាវឆាវ ឈ្មោះ ឆាវ ភី បង្ខំឱ្យស្តេចផ្ទេររាជ្យ ហើយប្រកាសខ្លួនជាស្តេចនៃនគរអ៊ូយ (Wei)។

មុនពេលស្លាប់ ឆាវឆាវ បានហាមឃាត់មិនឱ្យធ្វើផ្នូរខ្លួនធំដុំ ឬក៏ដាក់ឈ្មោះនោះទេ ព្រោះខ្លាចសត្រូវបំពានកម្ទេច។ ទោះជាយ៉ាងណា ដើម្បីជាការគោរពដល់ឪពុក ឆាវភី បានសាងសង់ផ្នូរដ៏ធំមួយសម្រាប់ដាក់សពឆាវឆាវ ប៉ុន្តែក្រោយមកក៏រុះរើវិញ ព្រោះខ្លាចផ្នូរនេះក្លាយជាគោលដៅរបស់ចោរ និងសត្រូវ។

ផ្នូររបស់ឆាវឆាវ ត្រូវបានរកឃើញក្នុងឆ្នាំ២០០៩ នៅក្រុងអានយ៉ាង ខេត្តហ៊ើណាន ពោលគឺជាតំបន់ដែលឆាវឆាវកាន់កាប់ក្នុងអំឡុងសម័យសាមកុក។ រហូតមកដល់ឆ្នាំ២០១៨ ទើបអ្នកជំនាញនៅវិទ្យាស្ថានបេតិកភណ្ឌវប្បធម៌ខេត្តហ៊ើណាន បញ្ជាក់ថា ឆ្អឹងបុរសម្នាក់ដែលស្ថិតក្នុងផ្នូរនេះ គឺជាឆ្អឹងរបស់ឆាវឆាវ។

ការរកឃើញផ្នូរ និងសាកសព (ឆ្អឹង) របស់ឆាវឆាវនេះ បានធ្វើឱ្យបុរាណវិទូ កាន់តែជំរុញបន្ថែមទៀតក្នុងការស្វែងរកផ្នូររបស់ លាវ ប៉ី និង ស៊ុន ឈាន ដែលមកដល់ពេលនេះ នៅតែជាអាថ៌កំបាំង។

បើយោងតាមរឿងប្រលោមលោក The Romance of the Three Kingdoms ឱ្យដឹងថា សាកសពរបស់ លាវ ប៉ី ត្រូវបានកប់ក្នុងផ្នូរជាមួយ ជូគឺ លៀង ក្នុងវិហារ Wuhou នៅក្រុងឆឹងទូ ខេត្តស៊ីឈួន ដែលជាទឹកដីនគរស៊ូហាន (Shu Han) របស់ លាវ ប៉ី ក្នុងសម័យនោះ។

វិហារ Wuhou

យ៉ាងណាមិញ អ្នកជំនាញមួយចំនួនមិនយល់ស្របឡើយ ពោលគឺកាលណោះ លាវ ប៉ី ស្លាប់ក្នុងក្រុងហ្វឹងជី (បច្ចុប្បន្នក្រុងឆុងឈីង) ដែលមានចម្ងាយជាង ៦០០គីឡូម៉ែត្រឯណោះពីក្រុងឆឹងទូ។ ដូច្នេះទម្រាំតែដឹកសពដល់នោះ គឺចាយពេល ១ខែ ហើយសពក៏រលួយបាត់ទៅហើយ ព្រោះពេលនោះក៏ជារដូវក្តៅផង។ ដូច្នេះពួកគេជឿជាក់ថា សព លាវ ប៉ី ត្រូវបានកប់នៅក្រុងហ្វឹងជី ឬឆុងឈីង ដែលនៅជិតច្រាំងទន្លេយ៉ង់សេ។

ចំណុចសន្និដ្ឋានមួយទៀតរបស់បុរាណវិទូ អំពីផ្នូររបស់ លាវ ប៉ី គឺស្ថិតក្នុងតំបន់ភ្នំផឹងស្យាន ចម្ងាយ ៦០គីឡូម៉ែត្រពីក្រុងឆឹងទូ។ ក្នុងនោះមានភ្នំមួយឈ្មោះ Muma ដែលគេប៉ាន់ស្មានថា អាចជាទីកន្លែងបញ្ចុះសពរបស់ លាវ ប៉ី។ ប៉ុន្តែការស្រាវជ្រាវរុករកកន្លងមក គឺមិនបានរកឃើញផ្នូរបុរាណណាមួយទាល់តែសោះ។

ចំណែកផ្នូររបស់ ស៊ុន ឈាន ដែលជាស្តេចនគរអ៊ូ (Wu) បើតាមកំណត់ត្រាប្រវត្តិសាស្រ្តបញ្ជាក់ថា សពត្រូវបានកប់នៅភ្នំ Meihua ជិតក្រុងណានជីង ខេត្តជាំងស៊ូ ប៉ុន្តែមិនដឹងច្បាស់ថានៅត្រង់ណានោះទេ។

កាលពីដើមទសវត្សរ៍ឆ្នាំ២០០០ ក្រុមបុរាណវិទូ ១ក្រុមត្រូវបានបញ្ជូនឱ្យទៅស្វែងរកផ្នូរបស់ ស៊ុន ឈាន។ ពួកគេបានរកឃើញផ្លូវក្រោមដីដ៏ធំមួយដែលដំបូងគិតថាប្រហែលជាផ្នូរហើយ ប៉ុន្តែការស្រាវជ្រាវរបស់ពួកគេ ហាក់ដូចជាគ្មានបានរកឃើញអ្វីបន្ថែមទៀតសោះ៕