អ្នកជំនាញ បង្ហាញពីដំណើរការជួសជុលស្ពានហាលខាងលិចអង្គរវត្ត
- 2020-09-11 07:21:22
- ចំនួនមតិ 0 | ចំនួនចែករំលែក 0
អ្នកជំនាញ បង្ហាញពីដំណើរការជួសជុលស្ពានហាលខាងលិចអង្គរវត្ត
ចន្លោះមិនឃើញ
ដើម្បីបង្ហាញដល់សាធារណជនដែលមានបំណងចង់ឈ្វេងយល់ពីដំណើរការលម្អិតពី ប្រវត្តិនៃការជួសជុលស្ពានហាល ជាពិសេសរៀបរាប់ពីដំណើរការក្នុងការដ្ឋានដែលកំពុងជួសជុលបច្ចុប្បន្ត អ្នកជំនាញអ្នកជំនាញអាជ្ញាធរអប្សរា បានធ្វើបាឋកថាស្ដីពី «វឌ្ឍនភាពនៃការជួសជុលស្ពានហាលខាងលិចអង្គរវត្ត» នៅថ្ងៃទី១០ ខែកញ្ញា ឆ្នាំ២០២០។
លោក អន សុភាព បុរាណវិទូ និងជាអ្នកគ្រប់គ្រងដឹកនាំគម្រោងជួសជុលស្ពានហាលខាងលិចអង្គរវត្ត បានចាប់ផ្តើមធ្វើបទបង្ហាញនិងរំលឹកនូវប្រវត្តិនានាទាក់ទងនឹងការជួសជុលស្ពានហាល ដែលក្នុងនោះការស្រាវជ្រាវរកឃើញថា ផ្នែកខ្លះនៃស្ពានហាលនេះ ត្រូវបានជួសជុលដំបូងនៅអំឡុងសតវត្សទី១៦ បន្ទាប់មកនៅសម័យបារាំងគ្រប់គ្រងចន្លោះពីឆ្នាំ ១៩៥៣ ដល់ឆ្នាំ១៩៧២។
ក្រោយមកទៀត នៅឆ្នាំ១៩៩៦ ប្រទេសជប៉ុនតាមរយៈសាកលវិទ្យាល័យសូហ្វីយ៉ា បានចាប់ផ្ដើមគម្រោងជួសជុលជាដំណាក់កាលដំបូងរបស់ខ្លួនដោយសហការជាមួយអាជ្ញាធរអប្សរា និងបានបញ្ចប់នៅឆ្នាំ២០០៧ ដែលមានប្រវែង១០០ម៉ែត្រ។ គម្រោងជួសជុលក្នុងដំណាក់កាលទី២នេះ គឺជាគម្រោងកិច្ចសហប្រតិបត្តិការរវាងសាកលវិទ្យាល័យសូហ្វីយ៉ា និងអាជ្ញាធរជាតិអប្សរា ចាប់ផ្តើមពីពាក់កណ្ដាលឆ្នាំ២០១៦មក ដើម្បីបង្ហើយផ្នែកដែលនៅសល់ប្រវែង៩០ម៉ែត្រនិងកំពុងទឹក ហើយគ្រោងនឹងបញ្ចប់ឱ្យបានមុនឆ្នាំ២០២៤។
លោក អន សុភាព មន្រ្តីនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការនៃអាជ្ញាធរជាតិអប្សរា បានប្រាប់ពីមូលហេតុដែលការដ្ឋាននេះត្រូវបិទចរាចរណ៍មិនឱ្យទេសចរធ្វើដំណើរឆ្លងកាត់ ដ្បិតថា ក្នុងការដ្ឋានត្រូវប្រើគ្រឿងចក្រធុនធ្ងន់ និងធំ ហើយការបិទនេះដើម្បីបញ្ចៀសហានិភ័យនានាដែលកើតជាយថាហេតុ។
លោកបន្ថែមថា គម្រោងជួសជុលនេះមានការត្រួតពិនិត្យនិងតាមដានយ៉ាងលម្អិតពីអ្នកជំនាញនៃគណៈកម្មាធិការអន្ដរជាតិ អាយស៊ីស៊ី-អង្គរ ដោយបច្ចេកទេសភាគច្រើនគោរពទៅតាមទម្រង់ពីបុរាណ។ យ៉ាងណា អ្នកជំនាញរូបនេះប្រាប់ថា ចំណុចប្រឈមនៃគម្រោងជួសជុលនេះ គឺបញ្ហាទឹក ដែលពេលខ្លះបានធ្វើឱ្យអាក់ខាននៃដំណើរការជួសជុល។
លោក ម៉ៅ សុខនី ស្ថាបត្យករ ដែលធ្វើការក្នុងគម្រោងនេះដែរ ឱ្យដឹងថា ស្ពានហាលខាងលិចអង្គរវត្តមានប្រវែងសរុប ១៩៧,៤ម៉ែត្រ ឬប្រមាណ២០០ម៉ែត្រ ទទឹង ១១,៦៤ម៉ែត្រ និងមានកម្ពស់ ៣,៣៨៥ម៉ែត្រ។ ស្ពាននេះមានគ្រឹះធ្វើពីថ្មបាយក្រៀម៧ស្រទាប់។ ស្ថានភាពស្រុតចុះនៃកម្រាល ថ្មភក់ ជាចំណុចប្រឈមខ្លាំងដែលជំរុញឱ្យពន្លឿននៃគម្រោងជួសជុលនេះ៕
ប្រភព៖ អាជ្ញាធរអប្សរា