មន្ទីពេទ្យ ៨ កន្លែងនៅភ្នំពេញទទួលអ្នកស្ម័គ្រចិត្តចង់ចាក់វ៉ាក់សាំងកូវីដ១៩

2021-02-21 10:09:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងសុខាភិបាល ថ្មីៗនេះបានប្រកាសសេចក្តីជូនដំណឹងមួយអំពីទីតាំងដែលមានផ្តល់សេវាចាក់វ៉ាក់សាំងកូវីដ១៩ ដោយឈរលើ គោលការណ៍ស្ម័គ្រចិត្ត ចាប់ពីថ្ងៃទី ២២ ខែកុម្ភៈ។ សម្រាប់រាជធានីភ្នំពេញមានទីតាំងទាំង ៨ ខាងក្រោមនេះដែលអ្នកអាចទៅរកសេវាចាក់វ៉ាក់សាំងបាន ដូចជា៖ ១) មន្ទីរពេទ្យបង្អែករាជធានីភ្នំពេញ, ២) មន្ទីរពេទ្យបង្អែកព្រែកព្នៅ, ៣) មន្ទីរពេទ្យបង្អែកដង្កោរ, ៤) មន្ទីរពេទ្យបង្អែកច្បារអំពៅ, ៥) មន្ទីរពេទ្យបង្អែកមិត្តភាពកម្ពុជា-ចិនសែនសុខ, ៦) មន្ទីរពេទ្យបង្អែកចតុមុខ, ៧) មន្ទីរពេទ្យបង្អែកសម្តេចឪ-សម្តេចម៉ែ និង៨) មន្ទីរពេទ្យបង្អែកពោធិ៍ចិនតុង។

ការទទួលចាក់វ៉ាក់សាំងកូវីដ-១៩ ស៊ីណូហ្វាមនេះធ្វើឡើងរៀងរាល់ថ្ងៃធ្វើការចាប់ពីម៉ោង ៨ព្រឹកដល់ម៉ោង ៥ ល្ងាច។ (ម៉ោងសំរាកចន្លោះពីម៉ោង ១២ថ្ងៃត្រង់ដល់ ២ រសៀល)។

ប្រភពរូបថតដោយ៖ មន្ទីរពេទ្យបង្អែកច្បារអំពៅ

យោងទៅតាមសេចក្ដីជូនដំណឹងពីក្រសួងសុខាភិបាល បញ្ជាក់ថាការចាក់វ៉ាក់សាំងនេះផ្ដល់អាទិភាពដល់ក្រុមគ្រូពេទ្យ បុគ្គលិកមន្ដ្រីសុខាភិបាលទាំងអស់ និងកងកម្លាំងនគរបាលជាតិ ឈរលើគោលការណ៍ស្ម័គ្រចិត្ត និងសម្រាប់អ្នកមានអាយុចាប់ពី១៨ ដល់៥៩ឆ្នាំ។

មួយវិញទៀត អ្នកដែលបានទទួលវ៉ាក់សាំងដូសទី១រួច ក្រសួងក៏បានស្នើឲ្យមកទទួលវ៉ាក់សាំងដូសទី២ទៀតស្របទៅតាមបច្ចេកទេសនៃវ៉ាក់សាំងបង្ការជំងឺកូវីដ១៩។ សម្រាប់ប្រជាពលរដ្ឋសាធារណជន ដែលមិនស្ថិតនៅក្នុងក្រុមអាទិភាពទេ តែស្ម័គ្រចិត្តចាក់វ៉ាក់សាំង ក្រសួងក៏ស្នើឱ្យរង់ចាំបន្តិចសិនព្រោះវ៉ាក់សាំងពេលនេះមានកំណត់៕

អត្ថបទ៖ រក្សា