រដូវបើកនេសាទ ចាប់ផ្តើមវិញហើយ ខណៈមន្ត្រីជំនាញថា ផលត្រី ឆ្នាំនេះ នឹងកើនឡើង

2017-10-06 10:14:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក អេង ជាសាន ប្រធានរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ បានប្រកាសថា ចាប់ពីពេលនេះតទៅ រដ្ឋបាលជលផល បានបើកឲ្យប្រជាពលរដ្ឋ ធ្វើសកម្មភាពនេសាទឡើងវិញហើយ ក្រោយបិទរដូវនេសាទជាង ៣ខែកន្លងមក។

លោកបញ្ជាក់ថា តាមការប៉ាន់ស្មាន នៅឆ្នាំ ២០១៧នេះ បរិមាណផលត្រី នៅតាមដងទន្លេនានា ក្នុងប្រទេសកម្ពុជា អាចនឹងកើនជាងឆ្នាំទៅ ដោយសារតែកម្ពស់ទឹកទន្លេសាប និងអាកាសធាតុអំណោយផលល្អ គួរឱ្យកត់សម្គាល់។ បច្ចុប្បន្ន ជាមធ្យម ប្រជានេសាទម្នាក់ ចាប់ត្រីបានចន្លោះពី ១០ ទៅ ២០គីឡូក្រាម ក្នុង១ថ្ងៃ។

រូបថត៖ អង្គការ WWF

លោក អេង ជាសាន បន្តថា ការវាស់ស្ទង់អំពីបរិមាណត្រីក្នុងផ្ទៃទឹកទន្លេសាប ទន្លេមេគង្គលើ ដែលក្រុមមន្រ្តីជំនាញ បានចុះពិនិត្យសិក្សានាពេលថ្មីៗ បង្ហាញថា បរិមាណត្រីនៅឆ្នាំនេះ នឹងមានការកើនឡើងខ្ពស់ជាងឆ្នាំមុន។ កាលពីឆ្នាំមុន កម្ពុជាទទួលបានទិន្នផលនេសាទត្រីសរុបជាង ៨០,២ម៉ឺនតោន គិតទាំងវារីវប្បកម្ម ឬត្រីចិញ្ចឹម។ ក្នុងនោះ ការនេសាទធម្មជាតិតាមទន្លេ មានប្រមាណ ៥០,៤ម៉ឺនតោន។

ជាមួយគ្នានោះ ប្រធានរដ្ឋបាលជលផល បានបន្ថែមថា កន្លងមកនេះ ក៏មានការបង្ក្រាបបទល្មើសនេសាទទ្រង់ទ្រាយធំជាប្រចាំ ព្រមទាំងផ្សព្វផ្សាយអប់រំណែនាំ និងការពារអភិរក្សដែននេសាទសហគមន៍តាមមូលដ្ឋាន។ ក្នុងនោះ មន្រ្តីរដ្ឋបាល និងមន្ត្រីជំនាញ បានបង្រ្កាបសកម្មភាពនេសាទប្រើប្រាស់ឧបករណ៍នេសាទខុសច្បាប់ ចំនួន ២ពាន់ករណី និងរឹបអូសដកយកឧបករណ៍នេសាទ ប្រភេទស្បៃមុង ដុតបំផ្លាញចោលជាង ១លាន ៣សែនម៉ែត្រផងដែរ៕

អត្ថបទ៖ លីហៀង