ទឹកមកពីភ្នំកំចាយ លែងហូរចាក់ចោលចូលសមុទ្រដូចមុនទៀតហើយ
- 2020-03-10 01:20:23
- ចំនួនមតិ 0 | ចំនួនចែករំលែក 0
ទឹកមកពីភ្នំកំចាយ លែងហូរចាក់ចោលចូលសមុទ្រដូចមុនទៀតហើយ
ចន្លោះមិនឃើញ
ក្រសួងឧស្សាហកម្ម និងសិប្បកម្ម និងក្រុមហ៊ុនវារីអគ្គិសនីកំចាយ Sinohydro បានចុះហត្ថលេខាលើអនុស្សារណៈយោគយល់គ្នាស្តីពីការកសាងទំនប់បង្ហៀរទឹកនៅព្រែកកំពង់បាយ ខេត្តកំពត កាលពីថ្ងៃទី៩ ខែមីនា ឆ្នាំ២០២០។
ក្រុមហ៊ុននេះ បានផ្តល់ជំនួយសាងសង់ទំនប់បង្ហៀរទឹកនៅព្រែកកំពង់បាយ ស្ថិតនៅក្នុងស្រុកទឹកឈូ តំបន់វារីអគ្គិសនីខេត្តកំពត ក្នុងទឹកប្រាក់ចំនួន៨០ម៉ឺនដុល្លារ។
លោក ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម និងសិប្បកម្ម បានលើកឡើងពីសារ:សំខាន់នៃមិត្តភាពដ៏ជ្រាលជ្រៅរវាងកម្ពុជា-ចិន និងផលប្រយោជន៍នៃការបង្កើតទំនប់បង្ហៀរទឹកនៅស្រុកកំពង់បាយ ស្រុកទឹកឈូ ដែលជាការយកចិត្តទុកដាក់ដ៏ខ្ពង់ខ្ពស់ របស់ប្រមុខរាជរដ្ឋាភិបាល និងក្រសួងឧស្សាហកម្មនិងសិប្បកម្ម ដើម្បីទាញប្រភពធនធានទឹកពីទំនប់វារីអគ្គិសនីកំចាយខេត្តកំពត ដែលហូរធ្លាក់ចូលសមុទ្រតាមព្រែកកំពង់បាយប្រមាណ១៧៧០លានម៉ែត្រត្រីគុណក្នុងមួយឆ្នាំ ស្របពេលដែលតម្រូវការទាញទឹកចូលរោងចក្រផលិតទឹកស្អាតស្ថិតក្នុងសមត្ថភាពត្រឹម ៦ ម៉ឺនម៉ែត្រត្រីគុណ ក្នុងមួយថ្ងៃ ស្មើនឹង ២២លានម៉ែត្រត្រីគុណ ក្នុងមួយឆ្នាំ។
លោកសង្ឃឹមថា ក្រុមហ៊ុនវារីអគ្គិសនីកំចាយ នឹងអនុវត្តការងារនេះ បានឆាប់រហ័សប្រកបដោយគុណភាព សុវត្ថិភាព សម្រាប់បម្រើផលប្រយោជន៍ដល់វិស័យទឹកស្អាតខេត្តកំពត ដែលកំពុងមានតម្រូវការកើនឡើង។
លោក Wang Tiefeng នាយកគ្រប់គ្រងទូទៅនៃក្រុមហ៊ុនSinohydro Kamchay Hydroelectric Project Co.,LTD បានបញ្ជាក់ថា ក្រុមហ៊ុនលោកនឹងប្តេជ្ញាចិត្តសាងសង់ទំនប់បង្ហៀរនេះឲ្យបានរួចរាល់នាពេលខាងមុខ ដើម្បីជាប្រយោជន៍បម្រើវិស័យទឹកស្អាតនៅខេត្តកំពត ស្របតាមតម្រូវការប្រជាពលរដ្ឋនិងទស្សនវិស័យរបស់ក្រសួងឧស្សាហកម្មនិងសិប្បកម្ម។
សូមបញ្ជាក់ថា បន្ទាប់ពីទំនប់បង្ហៀរទី១ អនុវត្តដោយក្រុមហ៊ុនវារីអគ្គិសនី Sinohydro ត្រូវបានសាងសង់រួច ការសាងសង់ទំនប់បង្ហៀរទី២ នៅផ្នែកខាងក្រោម នឹងត្រូវពិនិត្យលទ្ធភាពបន្តទៀតដែលត្រូវប្រេីប្រាស់ដោយថវិការបស់រាជរដ្ឋាភិបាលកម្ពុជា ដើម្បីប្រើប្រាស់ឲ្យអស់លទ្ធភាព និងសក្តានុពលនៃប្រភពធុនធានទឹកដែលមាន ដោយឈរលើកិច្ចការពារបរិស្ថាន និងផលប៉:ពាល់សង្គមខ្ពស់៕
ប្រភព៖ ក្រសួងឧស្សាហកម្ម និងសិប្បកម្ម