អ្នកគាំទ្រ​របស់​ក្លឹប​បិសាចក្រហម Manchester United មួយ​ចំនួន បាន​ទទូច​ឲ្យ​គ្រូបង្វឹក លោក Jose Mourinho ដក​ខ្សែ​ប្រយុទ្ធ Romelu Lukaku ចេញ​ពី​ជម្រើស​១១នាក់​ដំបូង មុន​ប្រកួត​ទល់នឹង​ក្រុម​កាំភ្លើង​ធំ Arsenal នៅ​ថ្ងៃ​អាទិត្យ​ខាងមុខ បន្ទាប់ពី​រូបគេ​មិន​អាច​រក​គ្រាប់​បាល់​បាន ក្នុង​ជំនួប​ដែល Man Utd យក​ឈ្នះ Watford ដោយ​លទ្ធផល ២-៤​ កាលពី​យប់មិញ នៅ​ក្របខ័ណ្ឌ English Premier League ។

Man Utd រក​បាន​ ៤គ្រាប់​ពី Ashley Young (២​គ្រាប់), Anthony Martial (១​គ្រាប់) និង Jesse Lingard (១គ្រាប់)។ ចំណែក Lukaku មិន​អាច​រក​បាន​នោះ​ទេ ហើយ​ទើបតែ​រក​បាន​មួយ​គ្រាប់​ប៉ុណ្ណោះ ក្នុង​ការ​បង្ហាញ​ខ្លួន ១០​ប្រកួត​ចុងក្រោយ​កន្លង​ទៅ។

គ្រាប់​បាល់​ចុងក្រោយ​របស់​ខ្សែប្រយុទ្ធ​សញ្ជាតិ​បែលហ្ស៊ិក​ខាងលើ ធ្វើ​បាន​សម្រេចកាល​ពី​ជួប Newcastle United ២​សប្ដាហ៍​មុន។

បញ្ហា​នេះ បាន​ធ្វើឲ្យ​អ្នកគាំទ្រ​មួយ​ចំនួន ខឹង​យ៉ាង​ខ្លាំង ដោយ​បាន​នាំ​គ្នា​បង្ហោះ​ក្នុង​បណ្ដាញ​សង្គម។ ខ្លះ​បាន​ទទូច​ឲ្យ​គ្រូ​បង្វឹក​ដាក់​ខ្សែប្រយុទ្ធ Zlatan Ibrahimovic ជំនួស Lukaku ​វិញ។

សូម​បញ្ជាក់​ថា Lukaku ធ្វើ​បាន​ល្អ កាលពី​ប៉ុន្មាន​ប្រកួត​ដំបូង ពេល​ចាប់ផ្ដើម​រដូវ​កាល ២០១៧-១៨ ហើយ​រូបគេ​អាច​រក​គ្រាប់​បាល់​បាន​ស្ទើរ​គ្រប់​ការ​ប្រកួត។ មក​ទល់​ពេល​នេះ រូបគេ​ធ្វើ​បាន​ចំនួន ៨គ្រាប់​នៅ​ក្របខ័ណ្ឌ English Premier League ៕