បក្សមូលដ្ឋាន ស្នើឲ្យសមាជិកអតីត CNRP វិលទៅរកគណបក្សភ្លើងទៀន ឬសិទ្ធិមនុស្សវិញ

2018-01-21 03:41:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អគ្គលេខាធិការ និងជាអ្នកនាំពាក្យគណបក្សប្រជាធិបតេយ្យមូលដ្ឋាន លោក សាម អ៊ីន បានស្នើឲ្យក្រុមអតីតនៃគណបក្សសង្គ្រោះជាតិ វិលទៅរកគណបក្សភ្លើងទៀន (អតីតគណបក្សសមរង្ស៊ី) ឬគណបក្សសិទ្ធិមនុស្ស ដែលជាទ្រនំចាស់របស់ពួកគេវិញ ដើម្បីបំបែកសំឡេងរបស់គណបក្សប្រជាជនកម្ពុជា។

លោក សាម អ៊ីន

សូមរំលឹកថា គណបក្សសង្គ្រោះជាតិ គឺកើតឡើងចេញពីការរួបរួមគ្នារវាងគណបក្សសមរង្ស៊ី និងគណបក្សសិទ្ធិមនុស្ស កាលពីឆ្នាំ២០១៣ ដើម្បីរួមកម្លាំងគ្នាចូលរួមបោះឆ្នោតនាពេលនោះ។ ប៉ុន្តែកាលពីខែវិច្ឆិកា ឆ្នាំ២០១៧កន្លងទៅ គណបក្សសង្គ្រោះជាតិ ត្រូវបានតុលាការកំពូលប្រកាសរំលាយ ហើយមិនអាចចូលរួមបោះឆ្នោតនាខែកក្កដាខាងមុខនេះឡើយ។

ថ្មីៗនេះ លោក សម រង្ស៊ី ក៏បានប្រកាសបង្កើតចលនាសង្គ្រោះជាតិ ដើម្បីស្តារស្ថានការណ៍នយោបាយនៅកម្ពុជាឡើងវិញ ដោយទាមទារឲ្យមានការដោះលែងលោក កឹម សុខា និងទាមទារឲ្យមានការបោះឆ្នោតដោយសេរី ត្រឹមត្រូវ និងយុត្តិធម៌។ ប៉ុន្តែមេធាវីរបស់លោក កឹម សុខា បញ្ជាក់ថា លោក កឹម សុខា មិនចូលរួម និងគាំទ្រចលនាសង្គ្រោះជាតិនេះទេ។

លោក កឹម សុខា និងលោក សម រង្ស៊ី លើកដៃគ្នាកាលពីពេលកន្លងមក

ហេតុដូច្នេះ លោក សាម អ៊ីន អះអាងថា បើក្រុមអតីតនៃគណបក្សសង្គ្រោះជាតិ ចូលរួមប្រកួតប្រជែង ក្រោមដំបូលគណបក្សភ្លើងទៀន ឬគណបក្សសិទ្ធិមនុស្ស ហើយបូករួមទាំងសន្ទុះកើនឡើង នៃគណបក្សប្រជាធិបតេយ្យមូលដ្ឋាន ដែលកំពុងទទួលបានការចាប់អារម្មណ៍គួរឲ្យកត់សម្គាល់ពីម្ចាស់ឆ្នោតពេលនេះ នោះសេណារីយោនយោបាយ ឆ្នាំ២០១៨ នឹងបង្កើតបានមុំ៣។ លោកថា មុំ៣នេះ នឹងបំបែកសំឡេង ៥០%+១ របស់គណបក្សកាន់អំណាច មិនឲ្យគណបក្សនេះ ធ្វើអ្វីស្រេចតែចិត្ត ដូចសព្វថ្ងៃនេះបានឡើយ៕

ប្រភព៖ Vayo Fm ប្រែសម្រួល៖ សំភី