សម្តេចក្រុមព្រះ ដកតំណែងនិងបញ្ចប់សមាជិកភាពមន្ត្រីបក្សហ៊្វុនស៊ិនប៉ិច ចំនួន ៨រូប

2018-01-26 08:09:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចក្រុមព្រះ នរោត្តម រណឫទ្ធិ ប្រធានគណបក្សហ៊្វុនស៊ិនប៉ិច បានសម្រេចដកតំណែង និងបញ្ចប់សមាជិកភាពពីមន្រ្តីគណបក្សចំនួន ៨រូប កាលពីថ្ងៃទី២៥ ខែមករា ឆ្នាំ២០១៨។ មន្រ្តីទាំង៨រូបរួមមាន៖

១. លោក សេង ហាក់ស្រ៊ុន (អគ្គលេខាធិការរង)។ ២. លោក ណុប ផន។ ៣. លោក មៀច សំរួល និង៤. លោក ភាព ភាជន៍។ មន្រ្តីជាន់ខ្ពស់ ៤រូបនេះ ត្រូវបានបញ្ចប់សមាជិកភាព។

លោក មៀច សំរួល

ចំណែកមន្ត្រីជាន់ខ្ពស់ចំនួន ៤រូបទៀត ដែលត្រូវបានដកតំណែង មានដូចជា៖ ១. លោក ឆឹង ចំរើន ផ្ទេរពីប្រធានក្រុមការងារបោះឆ្នោតរាជធានីភ្នំពេញ ឲ្យមកបម្រើកិច្ចការផ្ទាល់សម្តេចក្រុមព្រះ នរោត្តម រណឫទ្ធិ។ ២. លោក ហេង ចាន់ថា ផ្ទេរភារកិច្ចពីប្រធានក្រុមការងារបោះឆ្នោតខេត្តកំពង់ចាម ឲ្យមកបម្រើកិច្ចការផ្ទាល់សម្តេចក្រុមព្រះ នរោត្តម រណឫទ្ធិ។ ៣. លោក ផាន ចន្ថា ផ្ទេរភារកិច្ចពីប្រធានក្រុមការងារបោះឆ្នោតខេត្តពោធិសាត់ ឲ្យមកបម្រើកិច្ចការផ្ទាល់សម្តេចក្រុមព្រះ នរោត្តម រណឫទ្ធិ។ ៤. លោកថាវ គឹមឡុង ឲ្យមកបម្រើកិច្ចការផ្ទាល់សម្តេចក្រុមព្រះ នរោត្តម រណឫទ្ធិ។

លោក ឆឹង ចំរើន

ការសម្រេចនេះ ធ្វើឡើងបន្ទាប់ពីមន្ត្រីទាំងនោះ មានការពាក់ព័ន្ធនឹងការធ្វើចលនាប្រមូលស្នាមមេដៃសមាជិកនៅតាមបណ្តារាជធានី ខេត្ត ដើម្បីធ្វើញ្ញត្តិដាក់ថ្វាយសម្តេចក្រុមព្រះ ស្នើដកតួនាទីលោក ប៉ោ ប៊ុនស្រ៊ឺ អនុប្រធានគណបក្ស និងលោក យឹម សាវី អគ្គលេខាធិការគណបក្សហ៊្វុនស៊ិនប៉ិច។

លោក ហេង ចាន់ថា

សូមរំលឹកថា កាលពីថ្ងៃទី២៤ ខែមករា ថ្នាក់ដឹកនាំគណបក្សហ៊្វុនស៊ិនប៉ិច នៅរាជធានី ខេត្ត ក្រុង ស្រុក ខណ្ឌ បានធ្វើញ្ញត្តិទូលថ្វាយសម្តេចក្រុមព្រះ នរោត្តម រណឫទ្ធិ ស្នើសុំបញ្ចប់មុខតំណែងលោក ប៉ោ ប៊ុនស្រ៊ឺ អនុប្រធានគណបក្ស និងជាតំណាងរាស្ត្រមណ្ឌលកំពង់ឆ្នាំង និងលោក យឹម សាវី អគ្គលេខាធិការគណបក្សហ៊្វុនស៊ិនប៉ិច និងជាតំណាងរាស្ត្រមណ្ឌលសៀមរាប ដោយសារតែធ្វើឲ្យសមាជិកបាត់ទំនុកចិត្ត និងបង្កើតឲ្យមានបក្ខពួកនិយម៕