កាលពី​ចុង​សប្ដាហ៍​កន្លងទៅ លីគ​កំពូល​ម៉ាឡេស៊ី បាន​ចាប់ផ្ដើម​ដំណើរការ​រដូវ​កាល​២០១៨ ជា​ផ្លូវ​ការ បន្ទាប់ពី​ឈប់​សម្រាក​ជា​ច្រើន​ខែ។ ទន្ទឹម​នេះ កីឡាករ​កម្ពុជា ៤រូប​ដែល​បាន​ផ្ទេរ​ទៅ​លេង​នៅ​ទីនោះ ក៏​បាន​បង្ហាញ​ខ្លួន​នៅ​តាម​ក្លឹប​របស់​ពួកគេ​ផងដែរ។ ក្នុង​នោះ គេ​សង្កេត​ឃើញ កីឡាករ កែវ សុខផេង បាន​បង្កើត​រឿង​ដ៏​គួរ​ឲ្យ​ចាប់​អារម្មណ៍​មួយ ដោយ​រក​គ្រាប់​បាល់​បើក​ឆាក​បាន​មួយ​គ្រាប់។

ក្នុង​ចំណោម​ក្រុម​ទាំង​៤ រួមមាន PKNP FC របស់ កែវ សុខផេង, Pahang FA របស់ ចាន់ វឌ្ឍនាកា, Negeri Sembilan FA របស់ ប្រាក់ មុន្នីឧត្តម និង Terengganu FC របស់ ធារី ចន្ថាប៊ីន គឺ​មាន​តែ​ក្រុម​របស់ កែវ សុខផេង មួយ​គត់​ដែល​បាន ៣​ពិន្ទុ ក្នុង​សប្ដាហ៍​ដំបូង​នៃ​លីគ​កំពូល​ម៉ាឡេស៊ី រដូវ​កាល​២០១៨ ដោយ សុខផេង ជា​អ្នក​ស៊ុត​បញ្ចូល​ទី​គ្រាប់​បាល់​ជ័យជម្នះ ឲ្យ PKNP លើ​ក្រុម Negeri Sembilan FA ដោយ​លទ្ធផល ១-០ ។

ដោយឡែក ក្រុម Pahang និង Terengganu ទទួល​បាន​ត្រឹម ១ពិន្ទុ​ប៉ុណ្ណោះ។ Pahang បាន​ស្មើ​ជាមួយ Perak ០-០ ខណៈ Terengganu ស្មើ​នឹង PKNS FC ២-២ ។

បើ​មើល​លើ ​តារាង​ពិន្ទុ ក្រុម PKNP ឈរ​នៅ​លេខ​៤, Terengganu ឈរ​លេខ៦, Pahang នៅ​លេខ៧ និង Negeri Sembilan ឈរ​លេខ១១ ក្រោយ​បញ្ចប់​សប្ដាហ៍​ទី​មួយ៕