តារាបាល់ទាត់ល្បី Ryan Giggs នឹងមកដល់កម្ពុជា ក្នុងគោលបំណងមួយ

2018-03-06 06:51:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អតីតកីឡាករលំដាប់ពិភពលោក Ryan Giggs នឹងមកដល់កម្ពុជានៅថ្ងៃសុក្រសប្ដាហ៍នេះ វេលាម៉ោង៨:៤៥នាទីយប់តាមច្រកទ្វា VIP នៃអាកាសយានដ្ឋានអន្តរជាតិភ្នំពេញ។

ទន្ទឹមនឹងការមកដល់នេះដែរ ខាងក្រុមហ៊ុន Tiger បានរៀបចំជ្រើសរើសអ្នកគាំទ្រពិសេសចំនួន ៥០នាក់ដើម្បីរង់ចាំទទួលដំណើរមកដល់របស់វិរបុរសក្រុមបិសាចក្រហមម្នាក់នេះ។ ក្នុងដំណើរមកកម្ពុជានេះដែរ Giggs នឹងស្នាក់នៅចាប់ពីថ្ងៃទី៩ដល់១១ ខែមីនា ឆ្នាំ២០១៨ នៅសណ្ឋាគារសូហ្វីតែលភ្នំពេញ។ បុរសដែលធ្លាប់ធ្វើជាគ្រូបង្វឹកបណ្ដោះអាសន្ននៅក្រុម Manchester United រូបនេះ នឹងចូលរួមសកម្មភាពជាច្រើនអំឡុងពេលនៅកម្ពុជានេះ ហើយនឹងមានវត្តមាននៅប្រកួត Tiger Street Football Festival 2018 វគ្គផ្ដាច់ព្រ័ត្រផងដែរ។

បុរសវ័យ ៤៤ឆ្នាំដដែល ជា brand ambassador របស់ក្រុមហ៊ុន Tiger ហើយបច្ចុប្បន្នក្រោយពីបញ្ចប់អាជីពជាកីឡាករបាល់ទាត់ជាមួយក្រុមបិសាចក្រហម លោកបានកាន់តំណែងជាគ្រូបង្វឹករបស់ជម្រើសជាតិវែល។ ក្នុងអាជីពជាកីឡាករដែលលេងឲ្យ Man Utd តែ១ក្លឹបគត់នោះ លោកបង្ហាញខ្លួនបាន ៦៧២ប្រកួត រកគ្រាប់បាល់បាន១១៤គ្រាប់ និងឈ្នះ ៣៤ពានរង្វាន់។

អតីតកីឡាករសញ្ជាតិវែលរូបនេះ គឺជាមនុស្សសុភាពបំផុត ពោលគឺក្នុងអាជីពជាកីឡាករបាល់ទាត់នេះ លោកមិនដែលស្គាល់កាតក្រហមម្ដងណាឡើយ។ លើសពីនេះទៀត Giggs ក៏ជាប់ឈ្មោះជាកីឡាករដែលមានគេគោរពស្រលាញ់ច្រើនផងដែរ៕

អត្ថបទ៖ មុន្នីរម្យ